Lucas 20:24-45

²⁴“Omipaila kayo kod si esay pilak. Sinoy nakin ropa ya nakin ngadan isna?”

²⁵“Din Emperador,” insongbat da. “Mo siya sa,” kanan Jesus, “din okan Emperador et idawat yo en sisya, ya din okan Diyos et idawat yo abe en Diyos.”

²⁶Siya di et enggay naabak da sin namadasan da ay nangietek en Jesus sin sangoanan di kaipoipogaw, isonga pag dan gomiginek, tan nasdaaw da sin insongbat na.

²⁷Wada da abe di Sadduceo ay inmey en Jesus. Daida di esa ay bonggoy di Judio ay mangmangwani en adi kasin matago di natey. Kanan da en sisya,

²⁸“Apo maestro, kanan din linteg tako ay insolat Moses, ‘Mo waday sin-asawa ay magay anak da ya matey din lalaki, masapol ay asawaen din agi na din nalasang ta say mo way anak da, kaman say anak din natey.’

²⁹May kod, wada kano di pito ay sisiag-i ay lallalaki. Nangasawa din pangpangoan, ngem natey ay iwed anak da.

³⁰Isonga naisokat iyogtana et inasawa na din balo, ngem natey ay iwed abey anak da.

³¹Iso na abe sin maikatlo. Pag siyasiya di. Am-in din doy pito ay sisiag-i et nansososkat da ay nangasawa sin balo ay sana, yan natey da am-in ay magay anak da.

³²Pag omanongos ay matey din babai.

³³May kod, mo sin tapin di agew sin katagoan kasin di natnatey, sino ngin en daida di kosto ay akin asawa en sisya? Tan inasawa da am-in.”

³⁴Kanan Jesus en daida, “Aw kayman, mo din ipogaw ed wani et man-aasawa da,

³⁵ngem din ibilang Diyos ay maikari ay matago kasin ya maitapi en sisya ed langit et adi da man-aasawas di.

³⁶Tan kaman da din aanghel ay adi da katkatey. Daida di an-ak Diyos tan kasinan tagoen daida.

³⁷“Et mo maipanggep abe sin kasin katagoan di natey, olay si Moses et dadlonan pinaneknekan ay matago kasin di natey. Tan mo din insolat na ay maipanggep sin manbidbidang ay kaiw et kanana en si Diyos di deda ay Diyos da Abraham en Isaac ya si Jacob. Say kanana di olay mo nabayag ay nanatey da Abraham.

³⁸Di layden nina ay kalien et matago kasin di natey, tan si Diyos et baken Diyos di natey ay ipogaw mo adi et din matmatago, tan am-in da ay mamati et matmatago da sin pangila na.”

³⁹Pag kanan di odom ay mamaestron di linteg, “Kosto met kayman din insongbat mo.”

⁴⁰Et manlogi isdi, maga di mangitoled ay manpoot en Jesus.

⁴¹Pag kanan Jesus en daida, “Apay nga kanan da en polin David din Messias?

⁴²Tan olay si David et insolat na sin libro ay Salmo en, ‘Kanan Apo Diyos en Apok: Tomokdo ka sin makannawan ko

⁴³engganas abakek din kaibaw mo.’”

⁴⁴Pag itoloy Jesus ay nangwani, “Mo say kanan David en Apo na din Messias, intoy iyat na ay polin David?”

⁴⁵Idi nandengdenge din am-in ay kaipoipogaw, kanan Jesus sin papasolot na,