LUKA 20:24-45

²⁴“Mugoonihe korowa ya gwingwi emohi. Kove elivo sa wani? Ki ndina nilebiwevo tha wani?”

²⁵Vano, yahaakulaga: “Ya Sezari.” Yesu ahawiirelaga: “Mumvahege Sezari eli ya Sezari, Mulugu eli ya Mulugu.”

²⁶Kayoonile yomwihiddana mmadhuni vameentoni va athu. Vano motikiniheya ni dhowaakula dhaaye, yahimaalaga.

²⁷ASaduseyi amohiwa, ayene yaharumeedha wi ohukalawo ovenyihiwa muukwani, yahimwaaddamela Yesu.

²⁸Yahimukohaga, wiira: “Namasuuziha, Mozezi ohunilebela nlamulo niiriliye wi akwa ddibila ammohiwa, akala ahitela amwihiya mwihiyana, ahibalana ahima; ddibilaye amutele maamukweleya wi ambalihedhe aana a addibilaye ole.

²⁹Vowi yahikalawo addibila atanu ni abiili. Owambeela otela, okwa, ahibalilena ahima.

³⁰Anabiili,

³¹anethaaru, emodha-modhave atanu ni abiili ala yahikwa ehimbalihedhe ahima.

³²Teto omakuthulowa mwihiyana ole okwa.

³³Mwihiyana ola nlabo novenyihiwa muukwani, onaakale mwadha wani, vowi atanu ni abiili ala yahimutela?”

³⁴Yesu ahawaakulaga, wiira: “Athu eli elabo ya vativano enotela, enoteliwa.

³⁵Mbwenye ale enakale oofwanelela ofiya elabo enadha eyo, vovenyihiwa muukwani kawuli otela naari oteliwa.

³⁶Vowi kinaakwege, enaakale woona angero. Vano enakala ahima a Mulugu, mwaha wovenyihiwa muukwani.

³⁷Mozezi ahiwoga wi anookwa enovenyihiwa, vawogiliye thalako ya nikupu nahiddaga munddo, veriliiye wi Nabwiya di, ‘Mulugu a Abarahamu, Mulugu a Ezaaki, Mulugu a Yakobo.’

³⁸Mulugu kahuwo Mulugu anookwa, di Mulugu athu ookalawo. Vowi wa Oliye ateene ehikanna egumi.”

³⁹Vano, amohiwa mwa anamasuuziha a malamulo yahiira: “Namasuuziha, muhaakula pama!”

⁴⁰Egeere ndo, yowoovaga omukoha dhimohidhiwa.

⁴¹Vano Yesu ahaakohaga, wiira: “Dhinawogeliwa ddi wi Kirixtu di mwaana a Davidi?

⁴²Vowi mwinyeene Davidi ohuwoga mManiivuruni a Masaalimu wiira: “‘Nabwiya ohuwoga wa Nabwiya aaga: Okaraati omoononi-waaga-wooja,

⁴³ofiyedha Gaasaddule amwiiddani aawo ekale vonyingala manyalo aawo.’

⁴⁴Ki akala Davidi onowiithana ‘Nabwiya.’ Onadha addi okala mwaanaye?”

⁴⁵Athu ateene emvuruwanaga, Yesu ahawaaddelaga anamasuuza aaye: