Luk 20:24-45

²⁴«Nəmentər’im pəsam gbəleŋ bin. Kəro ka ana kəyi pəsam papɔkɔ-ɛ, kɔ tewe ta wəkayi?» Kɔ ŋaloku, «Wəbɛ wəka Rom.»

²⁵Kɔ Yesu oloku ŋa: «Awa, nəsɔŋ wəbɛ wəka Rom pɔkɔ pɔyɔnɛ pɔn mɔ, kɔ Kanu sɔ pɔkɔ pɔyɔnɛ pa Ki mɔ.»

²⁶Afum aŋɛ ŋantam fɛ kəsumpər kɔ dəmoloku kənay nkɛ dacɔ; mba ntɛ moloku ma Yesu meŋciyanɛ ŋa mɔ, kɔ ŋaŋcaŋk.

²⁷Kɔ aSadisi alɔma ŋander nnɔ Yesu eyi mɔ. ASadisi akakɔ ŋaŋc-loku a k’afi-ɛ, kəyɛfɛ kəyi fɛ sɔ. Kɔ ŋayif Yesu moloku mmɛ:

²⁸«Wətəksɛ, ntɛ tɔ Musa ɛnacicɛ su: ‹Kɔ wɛŋc ka fum efi pənɛŋcɛ mba ta ɔyɔ wan-ɛ, wɛŋc wəkɔ eyi doru mɔ, ɛntam kənasər wəran ka wəfi pəkomɛ kɔ awut.›

²⁹Mba awɛŋc camət-mɛrəŋ ŋanayi tɔlɔma. Kɔ wəcɔkɔ-cɔkɔ ɛnɛŋcɛ, k’efi ta ɛsak wan-ɛ.

³⁰Kɔ wəka mɛrəŋ ɛnasər wəran kɔn,

³¹kɔ tɛyɛfɛ dənda kɔ wəka maas ɛnasər kɔ. Tatɔkɔ tɔ tɛnakɔ haŋ kɔ awɛŋc aŋa aŋɛ camət-mɛrəŋ fəp ŋanɛŋcɛ wəran wəkin nwɛ, ta nwɛ o nwɛ ɛsak wan-ɛ.

³²Tɛləpəs oŋ, kɔ wəran nwɛ efi.

³³Kɔ dɔsɔk dɛyɛfɛ da afi dendebəp-ɛ, anɔ endelɛk wəran wəkawɛ-ɛ? Bawo awɛŋc aŋa akaŋɛ camət-mɛrəŋ fəp ŋananɛŋcɛ kɔ!»

³⁴Kɔ Yesu oloku ŋa: «Arkun kɔ aran a doru dandɛ ŋaŋnɛŋcɛnɛ.

³⁵Mba nde doru dakɔ dender mɔ, Kanu kənəŋk fɔ pəmar alompu ŋayɛfɛ defi, a ŋasɔtɔ kəyi wəyeŋ doru dadɔkɔ-ɛ, ŋafɔde ŋac-nɛŋcɛnɛ.

³⁶Ŋafɔtam sɔ kəfi, bawo pəyi ŋa pəmɔ mɛlɛkɛe, ŋa ŋandeyɔnɛ awut a Kanu, bawo Kanu kəyekti ŋa defi.

³⁷Musa oloku pəsoku pɛs a afi ŋandeyɛfɛ defi. Kəfo nkɛ aŋcic teta tɛrəntəm ntɛ tɛŋc-mar mɔ, Musa ewe Kanu dənda ‹Kanu ka Abraham, Kanu ka Isiyaka, Kanu ka Yakuba.›»

³⁸Kɔ Yesu ɔnɔcər, «Kanu bafɔ ka afi kɔ, mba ka ayi wəyeŋ; bawo nnɔ Kanu kəyi mɔ, fəp fəŋyi wəyeŋ.»

³⁹Kɔ acicəs a sariyɛ alɔma ŋalɛk moloku, kɔ ŋaloku: «Wətəksɛ, məloku bel-bel!»

⁴⁰Kɔ ŋaŋc-nesɛ sɔ kəyif kɔ moloku mɔlɔma.

⁴¹Kɔ Yesu oloku ŋa: «Cəke cɔ antam kəloku a Wəyɛk-yɛk wəka Kanu wəka Dawuda ɔyɔnɛ-ɛ?

⁴²Bawo Dawuda nkɔn yati oloku buk ba Yabura Dawuda disrɛ: ‹Wəbɛ ɛnaloku wəbɛ kem: Məder məndɛ nnɔ kəca kem kətɔt,

⁴³Ifaŋ kəbocər’əm aterɛnɛ am dəntɔf mənas-nas ŋa.›

⁴⁴Kɔ Dawuda ewe wəsom ka Kanu «wəbɛ kɔn»-ɛ, cəke cɔ wəkakɔ ɛntam kəyɔnɛ wan kɔn-ɛ?»

⁴⁵Ntɛ afum ŋayi kəcəŋkəl Yesu mɔ, k’oloku acɛpsɛ ɔn darəŋ: