Noca 20:24-45

²⁴¡Jjequicue bejjo esodojjo ebajji, emeshi meseja epanaꞌyojji! Majoya oya cuaa oe bejjo jjequi ca cua. Jjequi cajo, Jesosaa jama huohuiꞌajjame aca cua baꞌa: —¿Bejjojo ae ecajjaꞌyo ani? ¿Ae bajjani tehuemeꞌya bejjo? —jamaya Jesosa cua. —Emeshi mese oja cajjaꞌyo, Sesa bajjani.

²⁵Majoya aje Jesosa jama cua baꞌa: —Jamajjeya ¡Sesaja bejjo quiaquicue ohua sa cajo! ¡Eyacuiñajji aꞌa pajeaꞌyojji; oya bihuiacue; shajjaꞌajjacue peaꞌai!

²⁶Ma epeejji nisho cuana quea mete nee nee cua Jesosaja ojaya ejjashahuabaquijji ebajojo. Jamajjeya jama cuana cua baꞌa: —Quea jjashahuabaqui jaꞌa nee oya, Jesosa. Jjadasia meequi ajja, de —jamaya cua ma epeejji nisho cuana. Jamajjeya mimi oꞌoya sa po ajja Jesosa nijje. Jamajjeya Jesosa iña jjima cuanaja cua.

²⁷Ma pojjajo tii Sanoseo dejja cuana poquia cua Jesosa huohuiꞌajjaa. Sanoseo dejja cuana jamatii jjashahuabaquia cua pea cuana manoꞌyo majje eshequi oꞌoyajji pojjeama. Jesosaja ca ca jama sohui huohuime ajjima cua. Jamajjeya Sanoseo dejja cuaa oya edasiajji nisho aca cua. Majoya aje jama huohuiꞌajjame aca cuaa cua baꞌa:

²⁸—Esohui huohuijji, Moisesiya jama tehueme aca cua yahuajo nei nei baꞌa: “Oe dejja jjahuanaquinaje. Majoya aje manoꞌya cua bacuamahua. Ojaya ehuanase quijjojea ca cua. Ahuemaꞌ aniꞌya cua jjamejoqui jjimahua quijjojea. Majoya aje ahuemanoꞌyajo oja chahuaa cahuana caꞌyahua, oja doeja bacua jea jayojja nei epojji”.

²⁹Jamajjeya jama cuaje pojjaꞌa baꞌa: Oe dejja quea doe huiso cua, me oejje pea becanejjijji peaꞌai nequia cua. Ma dejjaa epona huana ca cua. Majoya manoꞌya cua; bacuamahua quijjojea ca cua.

³⁰Ma dejjaja quijjojea ani echahua meseya huana ca oꞌoyanaje. Bacua jea jjimahua quijjojea ca oꞌoyanaje.

³¹Majoya pea echahua meseya huana ca oꞌoyanaje. Majoya pea echahua meseya huanaꞌajja ca poquiapoquia cua.

³²Majoya aje oya epona manoꞌyonaje yahueja quijjojea ani tiiya. Jjamejoqui ajja cuanaje, bacuamaꞌ nei nei tii pona cuanaje, de.

³³Jamajjeya miquea esohui jama cuani eyajo shequi oꞌoya majje ¿ajea ehuanase jiquio cuaje eyajo; ache oja doeja? O huanacoojji epoja pojjaꞌa, pea echahua meseja pojjaꞌa; oja chahua cuana ahuiaꞌajjaꞌyo epo —jamaya cua Sanoseo dejja cuana.

³⁴Jesosaa jama aca cua baꞌa: —De, miquianajaya ba jjima. Jiquio meshijo dejja cuana jjahuanaquiani; epona cuana jjahuiaquiani.

³⁵Jamajjeya jiquio meshijo Eyacuiñajjija epeejji manoꞌyo majje eyahuasijje poquijeꞌyo. Ejjahuanaquiꞌyojji pojjeama cuajeꞌyo eyajo; epona cuana peaꞌai ejjahuiaquiꞌyojji pojjeama cuajeꞌyo eyajo. Jjamejoqui ajja peaꞌai cuajeꞌyo eyajo.

³⁶Manoꞌyo ajja cuaje jomajo; esohuidojojji jayojja jama cuajeꞌyo. Eyajo ojjaña Eyacuiñajjija ebacua cuajeꞌyo, eshequiꞌyo jjejojo.

³⁷¿Aꞌa miquea ba jjima dejja cuana ojjaña manoꞌyo majje shequije oꞌoya? Jamajjeya Eyacuiñajjiya yahuajo nei esohui tehue mee ca cua miquiana jjabahuejjaquijji. Moisesiya tehue ca cua yahuajo nei nei ma acui jijiqui ba majje. Eyacuiñajji mimia cua onijje jama baꞌa: “Eyaya miquea etiiquiana cuana jaahuanaña, Amajama, Isaaca, Jacobo peaꞌai ecuea epeejjijojo. Oya cuana enijje enequi tii tii”.

³⁸Eyacuiñajji emanoꞌyo cuana meshijo eꞌohuajeajaa jaahuanajji pojjeama cuani. Eshe nequi cuana, emanoꞌyo shequiꞌyo cuana peaꞌai eyajo ohuaya jaahuana cani ojaya epeejjijojo —jamaya aca cua Jesosaa.

³⁹Pea Moisesija etehueꞌyo huohuijji cuaa jama huohuime aca cua baꞌa: —Eꞌe de, quea jaꞌa nee nee miquea esohui, Jesosa. Quea bame nee nee, de.

⁴⁰Majoya huohuiꞌajja becaꞌyo jjima tii aca cuaa cua quea meteya jjejojo, jjadasia meequi ajjajojo.

⁴¹Jesosaa oya cuana jama aca cua baꞌa: —Miquianaya jama jjashahuaba taiquime cuani baꞌa: “Jesosa Dabija osecua poso nequiaa aña. Jamajjeya oya Eyacuiñajjija Bacua pojjeama poso nequiaa aña” jamaya jjashahuaba taiquimeya nequiana cuani. Dabi emeshi mese yahuajo nei nei baꞌya cua. Eya ojaya eba nei nei, de. Ojaya eya eba dejjaja bacua ejja pojjeama, Eyacuiñajjija Bacua Ejja.

⁴²Jamajjeya ohuaya esohuicuayajji tehue ca cua Salmojo; jama cua baꞌa: “Eyacuiñajjiya ecuea Emeshi Mese Quito jama huohuime acanaje baꞌa: —¡Enijje anioquecue ebañei mijijje ojjañaja Emeshi Mese epojji!

⁴³Eyaya mi quecuaꞌyojji epo jeabichajea jeyojeyojeꞌyo. Majoya aje miyaya oya cuana jeajeajeꞌyo cuaqui yasijje cajaajojo —jamaya aca cua Eyacuiñajjiya”. Jamaya Dabiya ejo tehue ca cua yahuajo nei nei.

⁴⁴Jamajjeya Dabiya Quito oja Emeshi Mesejojo bajjani ca cua. Jamajjeya Quito Dabija osecua cua, ojaya Emeshi Mese nei. Eya jja iña iquio Quito, de, dejjaja bacua pojjeama; Eyacuiñajjija Bacua Ejja, jamajjeya eya ojjañaja Emeshi Mese nei —jamaya Jesosa cua.

⁴⁵Ojjañaa Jesosaja esohui shajjaꞌajja canijo, Jesosaa o shajjaꞌajjajji cuana jama aca cua baꞌa: —Coya mi oe Moisesija etehueꞌyo huohuijji jayojja po chanaꞌ. Oya cuana poꞌayequiequi daqui aojji ojjañaja quea bame ebajji nishoya. Oya cuana quea bihui cuani shajjaꞌajja majje ojjañaja esohui jama cuani baꞌa: “Ma esohui huohuijji quea bame cuani, oja daqui quea bame, oja esohui quea jaꞌa nee” jamaya shajjaꞌajja saya cuani ma esohui huohuijji cuana. ¡Eꞌe jojo nei pojjeama! Jodioja equi ejjachichajji yasijje dobiqui majje ebionei anioque sa cuani Eyacuiñajjija esohui huohuijji pejjejo. Eꞌijjiaꞌijjiajjijo peaꞌai anioque sa cuani equi mese pejjejo. Beca cuaa quea bame poso acani.