Lucas 20:24-45

²⁴―Bloo goo thib temi lon. ¿Cho yek nke loy? ¿Ne cho le nke loy? Tsa lee re zha mkab, ne nzhab: ―Chaan César, zha kuu nabee Roma nke loy.

²⁵Tsa lee Jesús nzhab lo re zha: ―Mbay, btaa goo chaan César lo César, ne btaa goo chaan Diox lo Diox.

²⁶Ne mzalt zha neeka thib kuu went lo re kuu nloo Jesús lo re men. Ne leettsa mbin re zha kuu mkab Jesús, kwathoz mzegey leettsoo zha ne zheta mtow roo zha.

²⁷Tsa lee chop tson zha saduceo re zha kuu nyelaazt lee re zha nguth roban, ngwa mnaabdiz lo Jesús, ne nzhab:

²⁸―Maestr, lee Moisés mkee lo xkeets Diox nzhab: “Os lee thib zha gath, ne lee tsaal zha yaan ne ngopt tsaal zha neeka thib zhiinn zha, tsa lee wets zha ndoblo tseya kon byuda, tsa keno wets zha zhiinn zha, ne lee zhiinn wets zha yaan taxal zhiinn zha ngutha”.

²⁹Thib welt ngoo gaz re wets zha. Lee zha kuu ner mtseya, ne nguth. Ne mkenot zha neeka thib zhiinn zha.

³⁰Tsa lee tedib wets zha kuu ndeke dits zha, mtseya kon byuda, ne noga zhaʼa nguth, ne neeka mkenot zha zhiinn zha.

³¹Ne tataka ngok kon wets zha kuu myon. Ne re gazta wets zha mtseya kon byuda ne neeka thib zha mkenot zhiinn.

³²Ne bluz noga ngot nguth.

³³Os lee re men roban, ¿cho thib re zhaʼa gak tsaal ngota, tak kon re gazta wets zha mtseya ngot?

³⁴Tsa nzhab Jesús lo re zha: ―Lee re men yezlyu ree ntseya zha.

³⁵Per lee re zha kuu ndoblo ndya yibaa ne roban xid zha nguth, neeka tseyat zha ne neeka taat raa zha zhiinn zha tseya.

³⁶Ne gatht raa zha, tak mroban zha tsa gak zha zhiinn Diox, ne gak zha taxal re mandad chaan Diox.

³⁷Ne asta Moisés mloo lee re men roban, leettsa mndaa Moisés kwent chaan ya yits kuu ngeyeek, or mni Zha Nabee lo Moisés, ne nzhab zha: “Na nak Diox Abraham, Diox Isaac ne Diox Kob”. Ex. 3:6

³⁸¡Ne lee Diox nagt Diox Diox re zha nguth, lee Diox nak Diox lo re men kuu naban, tak lo Diox reta zha naban!

³⁹Tsa lee thib maestr kuu nloo xkiiz Diox, nzhab lo Jesús: ―¡Kwathoz wen mkaba!

⁴⁰Ne ngwalo mriid re koree, myet raa leettsoo zha ganaabdiz zha masraa kwaa lo Jesús.

⁴¹Tsa lee Jesús nzhab lo re men: ―¿Xomod mbez goo lee Crist Kuu Mtaal Diox Nabee nak xgann David?

⁴²Ne leeka David mkee lo yeets chaan salm, ne nzhab: Lee Diox kuu nak Zha Nabee lo reta kwaa, nzhab lo Zha Nabee lon: “Btob lad ban lon,

⁴³asta tsiin na re zha kuu nayii neʼa, tsa tobxub zha loʼa”. Sal. 110:1

⁴⁴’Ne leeka David nzhab: “Lee zha nak: Zha Nabee lon”. ¿Xomod tak gak zha xgann David tsa?

⁴⁵Reta men nzi ngeyon leettsa lee Jesús nzhab lo re zha kuu ngeteed lo Jesús: