Ruka 20:24-45

²⁴—Tineru enepotoko ya, tykase eya xine. —Seny, tykase toh tonepose. Mame ynara tykase Jezu, —Onoky ekuhtopõpyry ipoko nah? Onoky esety roropa tymerose ipoko nah? tykase, tõturupose eya xine. Ynara tykase toto, —Romano tuisary konõto mose, Seza, tykase toto.

²⁵Mame ynara tykase Jezu eya xine, —Seza kyryry ekarotoko Seza a. Yrome Ritonõpo kyryry ekarotoko Ritonõpo a, tykase Jezu eya xine.

²⁶Mame aomiry onezuhpyra toehse toto zae rokẽ exiryke. Jezu onyhxiropyra tokurehse toto imoihmãkõ rãnaka. Onyporemãkapopyra tokurehse toto. Naeroro mynyhme rokẽ toehse toto tõsenuruhkarykõke. —To! tykase rokẽ toto.

²⁷Morarame satuseu tõ tooehse Jezu a. Juteu tõ mokaro. Ynara ãko mã toto azahkuru, “Aorihtyã ẽsemãpyra ropa mana. Orihnõko rokene,” ãko toh mã repe. Ynara tykase toto Jezu a,

²⁸—Amorepatõ mase. Etako pahne. Ynara tymerose Moeze a Ritonõpo poe, “Orutua toorihse ahtao tumũkue pyra ro ahtao, kure zakorõnỹpyry a ipytỹpyry apoiry typytyme, emũkuatohme, turuĩpyry poenõme, aorihtyã myakãme toto ehtohme,” me tymerose, tykase toto.

²⁹—Etako pahne, 7mãkõ kynexine atakorõmãkomo. Morarame osemazupu typytase. Morotoino toorihse tumũkue pyra ro tahtao.

³⁰Mame ĩkaponato a turui pytỹpyry tapoise eya typytyme. Mame toorihse roropa ynororo emũkuara ro tahtao.

³¹Mame ĩkaponato a turui pytỹpyry tapoise roropa. Toorihse roropa ynororo emũkuara ro tahtao roropa. Morararo 7mãkomo, tumũkue pyra toorihse toto.

³²Mame etyhpyryme toorihse nohpo roropa, ipytỹpyrykomo.

³³Naeroro aorihtyã ẽsemãkatoh po onoky pytyme exĩko mokyro nohpo nae 7mãkõ pytyme toehse exiryke, tykase toto Jezu a.

³⁴Morarame Jezu a tozuhse toto, ynara tykase, —Serõkõ pytãko mã toto, niotãko roropa mã toto.

³⁵Yrome tyyrypyrykõ rumekahpõkõ ẽsemãkapõko ropa Ritonõpo mana jũme tymaro toto ehtohme. Mame pytazomopyra kapu ao toh mana. Morararo nohpo tõ niotazomopyra mã toto.

³⁶Ritonõpo nenyohtyã sã orihzomopyra exĩko mã toto ẽsemãkapotyamo. Ritonõpo poenõme mã toto, tõsemãse ropa toexirykõke orihxĩpo.

³⁷Azahkuru matose ynara karyhtao oya xine, “Aorihtyã ẽsemãpyra ropa mana, orihnõko rokẽ mã toto,” karyhtao oya xine azahkuru matose. Ẽsemãnõko ropa toh mana. Moeze a roropa tutuarõtanohpose aorihtyã ẽsemamyry ropa poko. Pika zatyry poko ekaroryhtao ynara tymerose eya, “Ritonõpo Aparão esẽme mana, Izake esẽme roropa, Jako esẽme roropa,” tykase Moeze, mokaro poko aorihtyã poko.

³⁸Aorihtyã ekepyry esẽme rokẽ pyra Ritonõpo mana. Isene exiketõ esẽme roropa mana. Morara exiryke aorihtyã ẽsemamyry ropa enetupuhnõko sytatose. Ritonõpo a emero isene mã toto, tykase Jezu eya xine.

³⁹Morarame ynara tykase Moeze omihpyry warõkõ Jezu a, —Emese kure kuezuhtou. Ajohpe pyra mase, tykase toto.

⁴⁰Typenekehse toto Jezu ekaropory poko orẽpyra Jezu exiryke. Mynyhme rokẽ toehse toto.

⁴¹Mame ynara tykase Jezu eya xine, —Oty katohme ynara ãko matou, “Tawi parỹpyryme mã Ritonõpo nymenekahpyry,” ãko matou?

⁴²Ynara tymerose exiryke Tawi a eremiatoh tymerose ahtao eya, “Ynara tykase Ritonõpo Jesemy a, ‘Oporohko seino, japotunuru wino.

⁴³Ozehnotokõ esẽme orĩko ase. Opupuru apõme sã oepe tõ kara rĩko ase,’ tykase Ritonõpo,” me tymerose Tawi a.

⁴⁴Morara exiryke, “Jesemy,” karyke Tawi a Ritonõpo nymenekahpyry poko, otara Tawi parỹpyryme exiry? tykase Jezu eya xine.

⁴⁵Ynara tykase Jezu typoetory tomo a, 12mãkomo a emero toto netaryme,