Luke 20:24-45

²⁴“Kau tatea vaniu mai na rongo. ?Ahei na totoghalena, mana ahana raini igaa?” Mara bosa tughu gaira, “A Caesar.”

²⁵Ge bosa Jesus, “Kau sosoni vania Caesar tana hava te nina Caesar, ma kau vahea vania God tana hava te nina God.”

²⁶Mara mua tangomana ge kara liubokia nia siki totobo tana mata ni tinoni, keri ge ra beto vamua, mara nia hare anina bosatughu.

²⁷Na lei Sadducee tara bosa ke me ke mua tughuru oli tana mate na tinoni. Mana balu Sadducee tara mai ta Jesus mara bosa vania,

²⁸“Tarai, a Moses te gerea vanighita idania na vetena eni, ke ba mate sania tauna sakai na mane, tana bona toro mua dalegha mua, ma tahina te vola so, ke ghoi tauna mughua na samu, ge koro vahuhu gari vania hoghona te mate tua!

²⁹Ma sakai na bona ra vitu tamahoghoni, na kamanagho itadira te taulaghi, ge mate, me taho dalena.

³⁰Na ruani te ghoi tauna na vaivine, ge ghoi mate, me taho soo dalena,

³¹mana toluni ghua. Agaira udolu ra vitu tamahoghoni, tara sopa tauna na vaivine, ma ra mate udolu, me taho ghua siki daledira.

³²Murina eni vaho, ge mate na vaivine.

³³?Mi tana bongi ni tughuru oli tana mate, ahei tadira ke tauna na vaivine eni, na pukuna gaira udolu ra vitu tara sopa taulaghi itatana na vaivine eni?”

³⁴Jesus te bosatughu vanira, “Na lei mane mana vaivine ni maramana eni tara taulaghi,

³⁵mana lei mane mana vaivine te ulaghadira ge kara tughuru oli tana mate, ma kara vola tana maramana ke mai, kara mua taulaghi.

³⁶Ke vaghara na lei angel, ma kara mua ghoi mate tua. Dalena God gaira, na pukuna tara tughuru oli tua tana mate.

³⁷Moses te bosa kaekalea gaira tara mate kara ghoi vola oli. Lokana na tutugu te bosaa na ghai te vavu, Moses te bosa tatea God, ‘Aeni ke a God nina Abraham, ma God nina Isaac, ma God nina Jacob!’

³⁸Agaia, a God vanira tara vola, me mua God vanira tara mate, na pukuna na lei tinoni soko ara vola vania Lord.”

³⁹Na balu manetarai ni vetena nina Moses tara bosa tate, “Tarai, e uto nimua na bosa tughu!”

⁴⁰Gaira tara mataghu ge kara mua tabotabo ge kara huatia nia ghua siki huahuati.

⁴¹Murina keri Jesus te ghoi huatira, “?E ghua ge ra bosa ke, mana vaivarina na vunaghi haba David na Messiah, ra ghaghua?

⁴²Na pukuna David heghena te bosa tana buka ni linge holouto, ‘A Lord God te bosa vania nigua na Lord, Ko sopou tana lima madologu,

⁴³polo ku talura ghamua na levunimate sarana na tuamu te tughunitatea te sarana nina maana.’

⁴⁴?Mana pukuna David te vatua nia Lord a Messiah ke, mi vei tea ge a Messiah ke ghoi vaivarina David so? ?Ivei ka nera erua na ghanaghana raini ge ke utuni?”

⁴⁵Na vuresubo tara rongo mai so itatana tana hava te nia kokoe, ge bosa Jesus, vanira nina vaovarongo,