Luk 20:24-45

²⁴“Homkwe silva imon hane kwa kow, ha lira ley. Hai, uwr ine-kasaw ohiy o, uru o, poso mo?”

²⁵Hom Jisas se lonuayk me, “Sisar so.” Jisas hiy me, “Sisar se kokwe omeme Sisar so ma lwak me kwa kow, seyr God se kokwe omeme God so ma lwak me kwa kow.”

²⁶Uwr, hyo ok me ma nakrok sue onuayk somokwe, homkwe hiy ok irweyk eyn me lohruw-a se lonuayk pa, uwrsa mo inour mon kokwe. Homkwe ok, Jisas hiy ma lonuayk me ke preiryay, sa ok lopa seme nuw-wak.

²⁷Sei, Sadyusi, senkin ma me, uwrsa ma lokrue homkwe ma-loksian lopa, hom Jisas so owh mon le nok, mesopok,

²⁸“Hiymon sorasor uwr ara, Moses hiykwe hremekwe senkin mey kow, ‘Uwr prueyn hiykwe hyo sah ke ney lopa lokrue okriy hain ankin, hyo nay-ih hiykwe sa-win sokwe kwa ma-huon. Sa nay-ih hiykwe ney kekie ankin, ney somokwe oryay-ih ma lokrue so ney ok me.’

²⁹Paraw kokwe, uwr eynay orhey non mokwe, iha sirom mu nareysyar non, senkin lwak. Peyr sa kokwe oryay-ih hiykiaw huon pie. Sa hiykwe ney lopa lokrue.

³⁰Hyo sa-win sokukwe sawk hyo nay-ih arian prueyn sohiy ma-sahre huon kok. Hiykwe seyr ney lopa lokrue.

³¹Sei, nay-ih hyo meyki ko hiy sa-win sokwe ma-huon, sawk ney lopa lokrue. Sei, nay-ih sohiy so meyki ko hoke ma-huon, senkin-awaw, uwr eynay iha sirom mu nareysyar non somokwe sa sokwe-aw ney lopa nuw-huon okrue-sa-okrue.

³²Pariawey-ar kokwe sa hok lokrue.

³³Hai, uwrsa ma lokrue ha, hom su ma-loksian wayr ankin, sa sokukwe poso sa lwak ey ko? Uwr eynay iha sirom mu nareysyar somokwe hoke-aw nuw-huon.”

³⁴Sawk Jisas hiykwe hmekwe senkin makiy-sahre mekow, “Uwrsa enekwei pokon enkin ko homkwe, sa senaw huon.

³⁵Sawk uwrsa ma lokrue ha, God hiy yaprue ma lira hom su ma-loksian wayr ankin, God so enekwei iwon sok, homkwe sa liy ma-huon ley.

³⁶Uwrsa somokwe ensel me hieyn lwak ey, liy ma-lokrue ley. Homkwe sawk God so ney-ar lwak ey, payhokuaw God hiykwe hmekwe po ma-me-sian.

³⁷Moses so ok kokwe hremekwe senkin mesair kow, God hiykwe uwrsa ma lokrue ha me liy ma-me sian. Moses hiy now sapa-pru non, ya ma loum se ohriar ma ley hokwe, God hiykwe penkin me so? Hiykwe Moses se senkin mekow, ‘Hakwe Abraham so God, seyr Aisak so God, seyr Jekop so God.’

³⁸Ok somokwe hremekwe senkin mesair kow, God hiykwe lokrue mo God korey. Hiykwe seyr inaw ma lwayr mo God. Payhokuaw, God so nene mon kokwe uwrsa ma lokrue ha mokwe, su lwayr.”

³⁹Juda mo sow ke hiymon-sorasor uwr har hom Jisas so ok seme lonuayk menkin, homkwe sawk hye senkin mekow, “Hiymon sorasor uwr ara, hno ok somokwe, yaprue-ar.”

⁴⁰Wo, unsaney prueyn Jisas se pase ma-mesopok e, payhokuaw, homkwe Jisas se mesopok ey se nak-hok.

⁴¹Jisas hiykwe uwrsa me senkin mesopok, “Hai, sow ke hiymon sorasor uwr homkwe senkin panoke me o, Krais hiykwe Devit so ney-nona?

⁴²Yayh ko mamey kokwe Devit hiykiaw kokwe senkin me, ‘Hakamay hiykwe hano Hakamay se senkin me: Hano sayar mon kiy-iwak,

⁴³peyr ha hno awia me hno sune ouon mon yay sowkriy kow sehe.’

⁴⁴Devit hiykiaw kokwe hye kokwe, ‘Hakamay’ ok me. Hai, senkin lwak ankin, Krais hiykwe Devit so ney-nona penkin lwak a?”

⁴⁵Jisas hiykwe ok har mokwe hyo ki-wayh me lohruw-a kow, uwrsa kraiar mo inour mon.