1Leettsa ngwalo mni Jesús lo re men, tsa nda Jesús yez Capernaúm.
2Ne yeza nzo thib zha Roma, kuu nak thib soldad kuu nabee lo thib gayoo soldad, ne lee zhaʼa nap thib mos kuu kwathoz nke leettsoo zha, kuu ne ndak ne mer gath.
3Ne leettsa mbin soldad kuu nabee lo thib gayoo soldad re kuu mtsow Jesús, tsa mtaal soldad chop tson zha bye zha Israel, tsa yachez zha Jesús, tsa tegwe Jesús mos zha.
4Ne leettsa mzin re zhaʼa lo Jesús, tsa mnaab zha lo Jesús ne nzhab zha: ―Ndoblo tsowa ayud soldad kuu nabee lo thib gayoo soldad,
5tak kwathoz nke leettsoo zha re tawlazaa, ne mdexkwaa zha thib ta nkaltaaʼaa nteedaa xkiiz Diox.
6Tsa lee Jesús mndeke dits re zhaʼa, per leettsa mera tsin re zha liz soldad kuu nabee lo thib gayoo soldad, tsa lee soldad kuu nabee lo thib gayoo soldad, mtaal zha chop tson amig zha nzhab lo Jesús: ―Zha Nabee,tsowta xgab taba leen lizʼn, tak thitanax ndoblot nay,
7kona neeka myaltʼn gakwaan na lu. Beeta nabee tsa lee mos da gwe.
8Tak noga na napʼn zha kuu nabee lon, ne tataga, napʼn soldad kuu nabeen lo. Leettsa mbezʼn lo thib zha: “Gwa” ne nda zha, ne leettsa mbezʼn lo tedib zha: “De”, ne nyaad zha, ne leettsa nabeen lo mos da tsow mos thib kwaa, ntsow zhay.
9Kwathoz mzegey leettsoo Jesús or mbin Jesús kona, ne mwii Jesús lo re zha kuu ndeke dits Jesús, ne nzhab Jesús: ―Wlipaa na nin lo goo, ¡neeka thib tawlazaa nyelaazt Diox taxal mbyi ree!
10Ne leettsa mretab re zha kuu mtaal soldad lo Jesús, liz soldad kuu nabee lo thib gayoo soldad, lee mos soldad kuu nabeeʼa mgweʼa.
11Bluz leettsa ngwalo mriid re koree, tsa lee Jesús kon re zha kuu ngeteed lo Jesús nda yez kuu le Naín. Ne kwaro men mndeke dits Jesús.
12Per or ndetsin gaxa re zha yeza, tsa mwii re zha, kwaro men yeza nda ndakaats thib thebol, ne thita zha kuu ngutha lo xnaa zha, ne byud xnaa zha.
13Tsa mwii Zha Nabee lo xnaa thebol, ne mlat leettsoo Zha Nabee mne xnaa thebol, tsa nzhab Jesús lo ngot: ―Gonnta.
14Ne ora mbig Jesús gax cho kaj, ne lee re zha kuu ndano kaj mlet, tsa lee Jesús mdiinn cho kaj, ne nzhab Jesús lo zha kuu ngutha: ―Mndyeen, loʼa nin: ¡Gwache!
15Tsa lee zha kuu ngutha, cha mndob ne mndelo mndediz, ne lee Jesús mzhen yaa zha ne mteli zha, ne mndaa Jesús zha lo xnaa zha.
16Ne kwathoz mzeb re men mwii re men kuu ngok, ne mndelo zha mbil zha lo Diox, ne nzhab zha: ―Thib profet kuu kwathoz nataak mzin loʼaa nzhee nal. Noga nzhab re zha: ―Diox ndyaad tsow ayud re tawlazaa.
17Ne dita yezlyu Judea mbin re men kuu mtsow Jesús, ne noga tedib net re zha kuu nzo yezlyu gax mbin re koree.
18Reta kona mbin Juan, tak lee re zha kuu ngeteed lo Juan nzhabe lo Juan. Tsa mrez Juan chop zha kuu ngeteed lo Juan,
19ne mtaal Juan zha yanaabdiz zha lo Jesús, tsa naa chu lee Jesús nak Zha Kuu Mtaal Diox Nabee, o chu leet zhay, par kwet zha yaad tedib zha.
20Tsa lee rop zha kuu mtaal Juan mbig lo Jesús, ne nzhab: ―Juan kuu ntsowleyy re men, mtaal nee tsa naabdiz nee loʼa, “¿naa chu lu nak Zha Kuu Mtaal Diox Nabee o chu tebet nee tedib zha?”
21Ne leeka ora mtegwe Jesús kwathoz men lo relota yiz, noga mloo Jesús re mbi fyer kuu nzo leettsoo re men kuu nteti re men, ne noga mtsow Jesús mzhaal ngutlo re syeg.
22Tsaraa mkab Jesús lo rop zha kuu mtaal Juan, ne nzhab Jesús: ―Tyee goo ne guz goo re kuu mwii goo ne re kuu mbin goo lo Juan. Guz goo lo Juan lee ngutlo re syeg nzhaal, lee re zha mthans nde, lee re zha kuu ndak yiz kuu ndezhoz ngwe, lee re zha kuu nakwee nzhaal nza, lee zha nguth ndroban, ne lee lo re zha prob ndaa zha kwent Diiz Chul chaan Diox.
23¡Wen nda re zha kuu nzhagt chop xgab, tak nyelaaz zha na!
24Or lee rop zha kuu mtaal Juan mbi lo Jesús, tsa lee Jesús mndelo mndaa kwent chaan Juan lo re men, ne nzhab Jesús: ―Leettsa ngwa goo yubiz, ¿kwan ngwatwii goo? ¿Chu lo thib nith kuu nkwin mbi ngwatwii goo?
25Ne os nagte tata, ¿cho lo ngwatwii goo tsa? ¿Chu ngwa goo ngwatwii goo lo thib zha kuu nzhok lar wen? Wen ne goo lee re zha kuu nzhok lar wen ne re zha kuu ntsow kuu nlaaz, nak re zha kuu nzo liz rey.
26Mbay, ¿kwan mroo goo ngwatwii goo tsa? ¿Chu ngwatwii goo lo thib profet? Wlipaa na nin, lee Juan nak thib zha kuu mas nataak nake thib re profet kuu ngoo ndala.
27Juan nak zha kuu ndaa xkeets Diox kwent, ta nzhab: Leen taal thib mos da kuu tener loʼa, tsa to list zha leettsoo re men par kayaa re mena. Mal. 3:1
28’Per lee na ni lo goo, neeka thib zha ngok nataagt taxal Juan. Per tegal tata nake lee zha kuu nataagt ta nabee Diox, zhaʼa nak zha kuu mas nataak nake Juan.
29Leettsa mbin reta men kona, noga re zha kuu ntsow kobral temi chaan yezlyu kuu nzhax lo zha Roma mbine, tsa reta zha kuu ngokleyy lo Juan, nzhab zha: “Nali nak Diox”.
30Per lee re fariseo ne re maestr kuu nloo xkiiz Diox, ngokleyyt zha lo Juan, ta mod mkayaat zha kuu nap Diox par re zha.
31Tsa lee Jesús nzhab: ―Nal nin lo goo naa xa nzhak re men tyemp ree ne xa nak zha.
32Lee re men nzhak taxal re ndyeen bzhizh, kuu nzi nke byith lo xbi, kuu mbez lo altaa: “Naley mbil nee flaut, per mkanit goo, mbilga nee nabil ne mbinnt goo”.
33Tbaa nin, tak leettsa myaad Juan kuu mtsowleyy, ndowt Juan pan neeka ngwiit Juan xit ub, tsa nzhab goo: “Mbi fyer nzo leettsoo Juan”.
34’Lee nal ndyal na, Kuu Mzin Ngok Men, nzhowʼn ne nzhuun reta kwaa, tsa mbez goo, lee na nak thib zha kuu kwathoz nzhowcho ne kwathoz nzhuu xit ub, noga mbez goo, nakʼn zha kuu nzaal leettsoo, kon re zha kuu ntsow kobral temi chaan yezlyu kuu nzhax lo zha Roma, ne noga mbez goo, nakʼn zha kuu nzaal leettsoo kon re zha kuu ntsow kuu went.
35Per lee zha kuu nap yalnzhaak chaan Diox, por re kuu ntsow zha nabee lee zha nap yalnzhaak.
36Tsa lee thib fariseo kuu le Simún mndeno Jesús lize, tsa wu Jesús kon lee zha. Ne leettsa ngeyow zha,
37tsa lee thib ngot kuu nzo yeza, kuu ndab kwathoz falt ngwa lo Jesús, tak mbin ngot lee Jesús ngeyow liz fariseo, ne ngwano ngot thib bot kuu natexkwaa kon thib ke kuu le alabastr, kuu tseta nzo perfum kuu kwathoz wen ndetsi.
38Ne mndelo ngot mbinn ngot xann nii Jesús, ne leeka kon nit kuu nzhonn ngot mtenit ngot nii Jesús, ne mtekwiiz ngot nii Jesús kon yitsek ngot, ne mtselo ngot nii Jesús, tsaraa mdaab ngot perfum nii Jesús.
39Ne ora lee fariseo kuu mndeno Jesús lize, mwii kuu mtsow ngota, tsa mnda leettsoo zha: “Os lee mbyi ree nak thib profet, teyeen mbyi naa cho men kuu ngediinn cho mbyi, tak thib ngot kuu ntsow kuu went nak ngot baa”.
40Tsa lee Jesús nzhab lo fariseo: ―Simún, nlazʼn nin thib kwaa loʼa. Tsa lee fariseo mkab, ne nzhab: ―Ne, naa kwan nlaaza neʼa maestr.
41Tsa lee Jesús nzhab: ―Nal tan thib kwent loʼa. Thib welt ngoo chop zha kuu mdinn temi lo thib zha. Thib zha mdinn gaay gayoo temi plat; lee tedib zha mdinn chop galbtsii temi plat.
42Ne napt rop zha temi par kix zha lo zha kuu mtseche temi lo zha, tsa lee zha kuu mtseche temi lo rop zha, mtsow perdon temi kuu ndab rop zha. Per nal naabdizʼn loʼa Simún: Lo rop zhaʼa, ¿cho zha masraa ke leettsoo zha kuu mtseche temi?
43Tsa lee Simún mkab, ne nzhab: ―Ndakʼn zha kuu mdinn masraa temiʼa, masraa ke leettsoo zha. Tsa lee Jesús nzhab lo Simún: ―Wen mkaba.
44Tsa lee Jesús mwii lo ngota, ne nzhab Jesús lo Simún: ―¿Chu ngwiiʼa ngot ree? Leettsa mndaabʼn liza mndaata nit gateechʼn niin, per lee ngot ree mteech niin kon nit kuu mbinn ngot, ne mtekwiiz ngot niin kon yitsek ngot.
45Leettsa mndaabʼn leen liza, neeka mtselota lon, per lee ngot ree, lo lal mzin ngot ne asta nal ngetselo ngot niin.
46Ne neeka aseyt mdaabta yekʼn, per ngot ree si mdaab perfum nin.
47Kona nin loʼa, lee reta falt chaan ngot ree mtuyya nay, tak kwathoz mke leettsoo ngotʼn. Per lee zha kuu lutta nke leettsoo na, lutta falt chaan zha tuyʼn.
48Tsa nzhab Jesús lo ngot: ―Reta falt chaana mtuyya na.
49Tsa lee re zha kuu nzi tya, mnda leettsoo re zha ne nzhab zha: ―¿Cho nak mbyi ree? ¿Chebee ndak mbyi tak tuyy mbyi falt?
50Tsa lee Jesús nzhab lo ngota: ―Tak nyelaaza na, kona mtuyʼn reta falta, tyee ne wen bloo leettsooʼa.
