Job 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Chayno niptin Job cutichishpan niran:

²«Chay nishayquitanöga achca cutinami wiyashcä. Gamcunaga shacyachimänayquipa ruquin masmi llaquicaycächimanqui.

³¿Imaycamaraj manacajcunallata rimarcaycanqui? ¿Imataj togripaycäshunqui chayno nimänayquipäga?

⁴Gamcuna nogano ñacaycaptiquega nogapis gamcunanömi nëman. Asipashpä umätapis jajtachëmanrämi. Nircur tucuy-niraj parlarmi nëman.

⁵Nogaga gamcunata alli shimëpami parlapäman. Shacyachëman. Masta balurta göman.

⁶Imano parlaptëpis nanaynëga manami chawanchu. Upälla cacuptëpis manami päsarpunchu.

⁷«Diosga pasaypanami callpäta ushacächisha. Llapan famillyäcunatanami ograshcä.

⁸Intëröpa curalaraycämajtanömi mayaycä. Chayno caycashätaga cayno yamajna caycashämi musyacaycächin.

⁹Tayta Diosga micucoj animalnömi manchachiman. Gaticachämar rachir usharaman. Chiquimaj-jinarämi mana cachaypa ricapacarcamashapis.

¹⁰Nogata chiquimarmi runacuna gotucan. Ricapämashpan umancunatapis jajtachinraj. Manacajman churamashpan lagyar-ushaman.

¹¹Diosmi cachaycamasha fiyu runacunapawan wañuchicojcunapa maquinman.

¹²Nogaga allimi goyäcuycarä. Paymi illajpita cuncapita charimasha. Nircurmi llapir usharamasha. Lëchawan chayachinanpämi apuntaraycäman.

¹³Wacpita caypita lëchawan chayaycächiman. Mana cuyapaypami intëröman yaycoj-yaycoj chayachimasha. Aguillëcunapis pampachömi mashtaraycan.

¹⁴Jananman-jananman pasaypa ñacaycächiman. Runa pillyaman yaycojnörämi nogamanga yaycaycämun.

¹⁵«Fiyupa llaquicushpämi gachga röpacunata jaticushcä. Umätapis ñuchu allpacunamanmi jatishcä.

¹⁶Wagaycaptillämi gaglläpis jacacurcusha. Ñawëpis pucayacäcusha.

¹⁷Chaynömi päsamasha imatapis mana ruraycaptë, llapan shongöpa mañacuycaptëpis.

¹⁸«¡Cay pacha, yawarnëtaga ama pacaycuchunchu! ¡Ama pacaycuchunchu mañacushätaga!

¹⁹Janaj pachachöga faburnë parlananpaj caycanmi. Janajchöga abogädö caycanmi.

²⁰Amïgöcunaga manacajmanmi churaman. Nogami ichanga Tayta Diosta mañacur wagä.

²¹Juc runa runa-masinpaj parlashanno pillapis Tayta Diospa ñaupancho nogapaj faburnë parlarcuchun.

²²Wallca watallapis cawanäpaj caj watacuna ushacaycannami. Manapis aycällatanami imaypis mana cutimoj aywacushaj.