Job 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹«Nogaga shongöcho yarparä japalla jipashtapis mana munapänäpaj mana ricapänäpaj.

²Nogaga musyämi munayniyoj Tayta Dios janaj syëlupita-pacha cada runata imata rurashallanpitapis gonanpaj cashanta.

³Fiyu runacunatami disigrasya chayan. Juchasapacunatami mana alli goyay chayan.

⁴Tayta Diosga ricaycanmi noga rurashäta; ricaycämanmi imanölla goyashätapis.

⁵«¿Llutantachuraj rurashcä? ¿Pitapis llullapayta yarpashcächuraj?

⁶Mä alli caj balansawan Tayta Dios pësamächun. Chayrämi musyanga juchaynaj cashäta.

⁷Alli cajta ruraycashäpita mana allita rurasha captëga, pipa imantapis munapasha captëga, jucpa imanpis nogapa maquëcho taricasha captenga

⁸murushäcunatapis juccunana micuchun. Lantashätapis sapipita achurichun.

⁹«Pï warmiwanpis cacuyta camasha captëga, runapa warminta watgasha captëga,

¹⁰warmëpis jucpa warmin cachun, jäpa runacunapis paywan cacuchun.

¹¹Chayno rurasha captëmi ichanga jamurpaypaj canman. Chauraga castigashami cäman.

¹²Chayno rurasha captëga canman nina rupar ushacurcushanömi. Llapan charashätami illgarachinman.

¹³«Warmi ollgu uywaynëcuna ruwacamashanta mana aunisha carga

¹⁴¿imataraj ruräman Tayta Diospa ñaupacho? Imata rurashäpitapis jusgamaptenga ¿imataraj nëman?

¹⁵Tayta Diosllami ruramashcanchi mamanchïpa pachancho. Payllami cawachisha uywaycunatapis, nogatapis.

¹⁶«Pobri pishipacajcunata yanapaytaga imaypis manami dëjashcächu. Manami dëjashcächu biyüdacuna yargaypita canantapis.

¹⁷Manami imatapis quiquilläga micojchu cä. Wacchacunatapis yawachejmi cä.

¹⁸Wacchacunapaga papäninnömi cashcä. Biyüdacunataga imallawanpis yanapashcämi.

¹⁹Pipapis röpan mana captin gasaywan wañuycajta ricar, juc pobri imawan pitucunanpäpis mana cajta ricar,

²⁰uyshäcunapa millwanwanmi goñönanpaj pitucachej cä. Chayno ruraptë chay runaga fiyupa cushicushpan ‹grasyas› nimaj.

²¹Pobripa contranga manami imaypis maquëta jogarishcächu ‹autoridäcunami charimanga› nir yarpashpä.

²²Chayno mana rasunpa rurasha captëga ricräpis paquicäcuchun, matancäpita rachir shicwacuchun.

²³Nogaga Dios castigamänanta manchacojmi cä. ¡Munayniyoj Tayta Diospa ñaupancho manami puydëmanchu imanöpa chapacuytapis!

²⁴«Gorillamanga manami yäracushcächu. Ni yarparashcäpischu chayllamanga.

²⁵Manami cushicushcächu ima-aycäpis aypalla captin ni aypalla guellay captinpis.

²⁶Inti shanshaypa shanshar achicyaptin ricärir rispitasha captëga, quillatapis achicyaycajta almirasha ricapasha captëga,

²⁷pacayllapapis adurasha captëga, quillata ricar maquillätapis muchasha captëga

²⁸castigasha canäpis camacanmanmi. ¡Chayno rurarga syëlucho caycaj Tayta Diosta manacajmanmi churäman caran!

²⁹«Chiquimajnëcuna mana alliman chayaptin manami cushipashcächu. Chayno manami cushipashcächu disigrasya chayaptinpis.

³⁰‹Chay runa wañunman› nillarpis manami imaypis juchata rimashcächu.

³¹Wasëcho cajcunapis llapanmi micusha upusha goyaj.

³²Jäpa runataga noga manami cällicho puñucunanta dëjajchu cä. Caminanti purejcunataga imaypis pachächejmi cä.

³³Adannöga juchäta manami imaypis pacashcächu. Mana allita rurashäcunatapis manami amucurcushcächu

³⁴runacunata manchacuypitaga. Manami imaypis wasi wichgacusha upällalla cacushcächu famillyäcuna jamurpamänanta manchacushpäga.

³⁵«¡Pillapis wiyaycamächun! Cay firmämi llapan nishäta willacuycan. Cananga munayniyoj Tayta Dios nimächun. Imapitapis jagachamarga papilman isquirbishata ricachimächun.

³⁶Chaytaga cushisha rispitarmi chasquishaj. Corönatanömi charäshaj.

³⁷Nogaga ima rurashäcunatapis Tayta Diostaga llapantami willashaj. Paypa ñaupanmanga alli mandajnömi chayashaj.

³⁸«Nogapita jagayar chacräcunapis manami syëluman gayacunchu. Chacrächo camilluncunapis manami llaquicuywan waganchu.

³⁹Pipatapis micuynincunata suwapasha captë, arupacoj runacunata dibaldilla aruchisha captëga,

⁴⁰chacräcunachöpis rïgu wayunanpa ruquin cashacunallana wiñamuchun; sebäda wayunanpa ruquinpis mana alli jachacunallana wiñamuchun.» Chaynömi Jobga chapacushpan parlayta usharan.