Job 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elihú jinalla willapaycaran:

²«Ichicllata shuyaycuy. Noganami willapar yachachishayqui. Tayta Diospa faburnin rimanäpäga achcarämi caycan.

³Yachashätaga llapantami willapäshayqui. Camamajninchi rasun cajta rurashantami musyachishayqui.

⁴Manami imatapis llullacuypaga nishayquichu. Nogaga rasunpa yachaj runami cä.

⁵«Diosga fiyupa munayniyojmi; fiyupa yachajmi. Juchaynajcunataga manami castiganchu.

⁶Fiyu runacunataga wallca diyallami cawachin. Ñacaycajcunatami ichanga alli yanapan.

⁷Allillata ruraj runacunataga imapitapis simrimi chapan. Raycunawan goturänanpärämi camacächin. Paycunataga yanapan allilla mandananpämi.

⁸Capaschari alli runacunaga cadinacunawan wataranman. Capaschari nanaywan ñacanman.

⁹Chaura Diosga musyachin ima mana allita rurashancunatapis alli runapita ushasha cashantapis.

¹⁰Chay runata corrijishpan willapan. Juchata ruraycashanta cachaycunanpaj willapan.

¹¹Diosta wiyacur cumlishpanga imaypis cawashanyäga cushisha allilla goyan.

¹²Mana wiyacushpanmi ichanga wañun. Manaräpis imatapis yachallar wañun.

¹³Fiyu runacunami ichanga ñacarpis fiyupa rabyan. Tayta Dios cadinarächiptinpis manami mañacunchu yanapänanpäpis.

¹⁴Manaraj edäman chayallarmi wañun. Fiyupa cuyapaypämi wañun.

¹⁵Ñacachir-rämi Tayta Diosga runata tantiyachin. Chayno ñacachiyparämi Diosga salban.

¹⁶«Gamtapis salbaycäshunqui fiyupa ñacaycajta, alli pachaman chayachishunayquipaj, jauca goyächishunayquipaj, alli micuycunata tarichishunayquipaj.

¹⁷Fiyu runacunata castïgu chayashallanpämi gamga yarpachacuycanqui. Ichanga jusgar castigashuptiqui manami imanöpapis chapacunquipächu.

¹⁸Rabyashpayqui Tayta Diosta manacajman churargunquiman. Manacajman churar-imarga manami ima-aycata gorpis salbacunquipächu.

¹⁹Ñacar llaquicuycashayqui öraga may-jina gaparaptiquipis may-jina alliyayta munaptiquipis yanganami canga.

²⁰Pacha chacänanta ama munaychu. Chacaychöga runacunata tucuy mana allicunami päsan.

²¹Imano ñacay cashantapis musyaycashpayquinaga yapayga mana allicunata ama ruraynachu.

²²«Sumaj tantiyacuy Dios fiyupa munayniyoj cashanta. Paymanga manami pï yachachicojpis tincunchu.

²³Paytaga imata rurananpäpis manami pipis ninchu. Ni pipis manami ‹Mana allitami rurashcanqui› ninchu.

²⁴Pay camashantaga llapan runami alaban. Gampis alabaytaga ama gongaycuychu.

²⁵Llapan runami Tayta Dios rurashantaga rican. Carullapitapis ricanmi.

²⁶Diosga fiyupa munayniyojmi. Noganchëga manami imanöpa tantiyaytapis atipanchïchu. Ni manami musyanchïchu ayca watayoj cashantapis.

²⁷Paymi yacuta jutuy-jutuylla juc pachaman shuntacächin. Nircur tamyamanna ticrachin.

²⁸Tamyaga pucutaycunapitami shicwaycämun. Nircur cay pachamanga achca yacu machiypana chayamun.

²⁹¿Pitaj tantiyan pucutaycuna imano aywashantapis, räyucuna syëlucho imanir junrurushantapis?

³⁰Diosmi intëru lamar jananpa illguyta achicyächin. Chayno achicyachishpan lamarpa rurintapis ricacächin.

³¹Chaycunawanmi runacunatapis castigan. Tamyawanpis aypalla micuycunatapis shuntachin.

³²Räyutapis chararan. Chaura räyuga imapis mana cashallanmanna chayan. Tayta Dios munashallanman maymanpis chayan.

³³Tayta Diosga räyuchimur musyachimanchi rabyaycashantami. Chaynöpami musyachimanchi juchasapacunapaj rabyaycashanta.