Job 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹«Runaga wallca watallami cawan. Fiyupa ñacallarmi goyan.

²Payga wayta pashtarcur wañuytacäcojnöllami. Cawanpis llantuy päsacojnöllami.

³Tayta Dios, ¿chaynölla caycaj runamanrächi ricärinqui? ¿Chayno caycaptëchu jusgamayta munaycanqui?

⁴¿Piraj ganra caycajta limyuyächinman? ¡Pipis manami puydinchu!

⁵Runa ayca wata cawananpäpis gammi camacächinqui. Imay junajcama cawananpäpis gammi señalapanqui.

⁶Runataga amana ricapaynachu. Jauca goyäcuchun piyun aruyta ushashanno.

⁷«Juc yörata sajtarirpis yarparaycanchïmi chillguimunanpaj cashanta, chillguimur yapay wiñananpaj cashanta.

⁸Sapin auquisyasha caycaptinpis, tumpun ismuycaptinpis sapin alli caycaptenga

⁹yacu chayaptenga yapaymi chillguimonga. Mallwa yörapanörämi rämancunapis cupösu wiñanga.

¹⁰Runami ichanga imaypis mana cutimunanpäna wañucun. Wañorga ¿maymantaj chayan?

¹¹Lamar yacu chaquishannömi, mayucuna päsashannömi

¹²runapis wañorga manana imaypis cawarimunnachu. Syëlu caycashancamaga runa pamparashanpita manami jatarimongarächu. Puñuycajno caycashanpita manami ricchamongarächu.

¹³«¡Ima alliraj canman rabyashayqui gasacänancama wañushacuna caycashanman pacaycamaptiqui! ¡Ima alliraj canman rabyashayquipita alliyärishpayqui yarparcamaptiqui!

¹⁴Ichanga runa wañushpan ¿cawarimongachuraj? Cawarimunan captenga may-jina ñacashpäpis noga shuyarämanmi cawarimunäpaj.

¹⁵Chaura gam gayamaptiqui nogaga wiyämanmi. Camamashayqui captëmi alli ñawillayquiwan ricäramanquiman.

¹⁶Llapanpitami chapämanquiman. Juchäcunataga mananami cäsupämanquimannachu.

¹⁷Custalman wiñarcojnömi llutanta rurashäcunata gongaycunquiman. Llapan mana allita rurashäcunatami perdunamanquiman.

¹⁸«Juchuycällar jircacuna illgashannömi, gagacunapis juc-läman witishannömi,

¹⁹yacu wagruypa wagrur rumicunata ushacurcushannömi, tamya yacupis ñuchu allpata apacushannömi gampis runa yarpaycashancunata mana camacänanpämi ninqui.

²⁰Imaypis mana cananpämi runacunataga illgächinqui. Cay pachachöpis gongaycächinquina. Runaga chachayaycällarmi wañucun.

²¹Wamrancuna alliman chayaptinpis wañucoj runaga manami musyannachu. Wamrancuna mana alliman chayaptinpis wañucoj runaga manami tantiyannachu.

²²Chay runapäga nanayllanami, almanpis llaquicuyllachönami.»