Job 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹«Jämaynëpis ushacaycannami. Wañuypis janächönami. Pampacunäpaj sepultürapis caycannami.

²Manacajman churamaj runacunallami ñaupächo carcaycan. Pagasta junajtapis chayno runacunallami täparaycäman.

³Ichanga Tayta Dios gammi nogapa faburnë rimarcunqui. Gam mana rimarcuptiquega ¿pitaj rimarconga ari?

⁴Gammi manacajman churamajcuna mana tantiyananpäpis camacächishcanqui. Ama camacaycachiychu paycuna binsimänantaga.

⁵Imatapis chasquinan-rayculla amïguncunata ima mana allimanpis jitarpoj cäga wamrancunatapis ñacajtami ricanga.

⁶«Tayta Dios, gammi camacächishcanqui llapan runacunapis waccho caycho rimamänanpaj, manacajman churamänanpaj. Waquenga asta cärächöpis togapämanmi.

⁷Nanächicuycaptillämi ñawëpis chacaycanna. Cuerpöpis llantuynöllanami ushacaycan.

⁸Chayta ricarmi alli runacunaga almirasha ricacun. Rabyacarcärir ‹¡Masqui ricay juchayoj runata!› nir rimarcaycäman.

⁹Quiquincunaga ‹juchaynajmi cä› nircaycanmi; ‹ima mana allitapis manami rurashcächu› nircaycanmi.

¹⁰«Llapaniqui cayman shamuy tapunacunanchïpaj. Gamcunachöga manami ni jucnayllatapis yachajta tarishächu.

¹¹Manapis aycällatanami wañucushaj. Imata rurayta yarpashäpis, munashäpis manami camacannachu.

¹²Gamcunami ichanga chacaytapis junajman ticrarachinqui. ¡Sinchi chacay caycaptinpis ‹pacha achicyanganami› nircaycanqui!

¹³Nogataga wañuyllami shuyaraycäman. Yanauyaycaj chacayllanami wasëpis canga.

¹⁴Pampacunä uchcutanami ‹gammi canqui taytä› nishaj. Curucunatanami ‹gammi canqui mamä pañë› nishaj.

¹⁵Chaura shuyarar yarpaycashäga ¿imanötaj canga? ¿Pillaga noga rurayta yarpashäcunata rurangachuraj?

¹⁶Manami. Yarpashäcunawanga iwalmi pampacushaj. Allpaman ticrar iwalmi ushacäshaj.»