Job 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elihú sïguir niycaran:

²«Job, gamga Diosta ‹juchaynajmi cä› nishcanqui. Chayno nerga ¿allitachuraj nishcanqui?

³Mastapis tapushcanqui: ‹¿Imatataj gocushunqui juchata ruraptëpis? ¿Imatataj chasquë juchata mana rurasha carpis?› Chayno nerga ¿allitachuraj nishcanqui?

⁴Cananmi gamtapis amïguyquicunatapis noga nishayqui.

⁵Masqui syëluta ricäriy. Pucutayta ricärirpis masqui tantiyacuy ari. Chay pucutayga gampita may altuchöshi caycan.

⁶Juchata ruraptiquipis Diospäga manami imananpischu. Maychica juchayqui captinpis Diostaga manami imananpischu.

⁷Allita ruraptiquipis paytaga manami imatapis gonquichu. Paypäga manami ima allitapis ruranquichu.

⁸Mana allita rurashanpis quiquin runallatami chayan. Allita rurashanpis quiquin runallapämi alli.

⁹«Imapis päsaptinrämi runacunaga yarpachacur gaparpan. Munayniyojcunapa maquinpita pillapis salbananpaj ruwacun.

¹⁰Chayno caycarpis camamajninchi Tayta Diostaga manami yarpanchu. Paymi chacaycunapapis cushicachimashpanchi cantachimanchi.

¹¹Uywacunapitapis mas yachaj cananchïpaj paymi yachachimanchi. Paymi äbicunapitapis mas yarpaysapa cananchïpaj tantiyachimanchi.

¹²Ñacar gaparpaptinpis Diosga manami yanapanchu alli runapita ushasha purej fiyu runacuna captin.

¹³Munayniyoj Tayta Diosga manami cäsupanchu mana cumbënejcunata mañacushanta.

¹⁴«Tayta Diosta ‹Gamta manami ricächu› nishpayquipis shuyaycuy ari. Paypa maquinchömi caycanqui arriglashunayquipäga.

¹⁵Gamga ninqui ‹Diosga manami rabyacunchu ni castigacunpischu, ima juchata rurashanchïtapis manami cäsupanchu› nir.

¹⁶Job, gamga niycanqui manacajcunatami. Mana tantiyacurmi wichaypa uraypa rimaycanqui.»