Job 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Chayno niptin Job cutichishpan niran:

²«¿Fiyupa ñacaycajta chaynöchi yanapanchi? ¿Callpaynajna caycajta chaynöchi salbanchi?

³Gam ichanga willapayta alli yachanqui ¿au? Mana yachajtapis tantiyachinqui ¿au?

⁴Chayno ninayquipäga ¿pitaj yachachisha-cashunqui? Chayno parlanayquipäga ¿pitaj yarpayta gosha-cashunqui?

⁵«Wañushacunapis pacha rurincho fiyupami mancharin. Lamar sapincho caycaj wañushacunapis fiyupami sicsicyan.

⁶Wañojcuna caycashan wanwanyaycaj pachaga Tayta Dios ricananpita manami imatapis pacanchu.

⁷Imapis mana cashanmanmi syëluta Tayta Dios mashtaran. Imapis mana cashanmanmi cay pachatapis warcusha.

⁸Paymi pucutaycunamanpis yacuta pitucächin. Lasaywanpis pucutayga manami rachinchu.

⁹Quillapa achicyaynintapis chacächin pucutaywan chapachishpan.

¹⁰Pachapa cuchunchöna lindata churasha junajpäwan chacaypaj.

¹¹Tayta Dios piñacuptenga mancharishpan sicsicyanmi syëluta tucnaraycashan puntacunapis.

¹²Munayniyoj cayninwanmi lamarta manshuyächisha. Waräcuy Rahabtapis yachaj cayninwanmi binsisha.

¹³Pay pücarishpanmi syëlutapis lliuyaj cananpaj camacächisha. Llushway culebratapis paymi charircur wañuchisha.

¹⁴Chayga ichicllata rurashan cajllami caycanpis. Raspilla wiyashallanchïmi caycanpis. ¿Piraj tantiyanman munayniyojpa räyun junrurumur imata nishantapis?»