Job 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Tayta Diosga jinalla parlaycaran. Chaymi Jobta niran:

²«Munayniyoj Dios caycaptë gam jusgamayta munarcur ¿canan nishäcunatapis cutichimaytarächuraj yarpanqui?»

³Chaura Jobga Tayta Diosta cutichishpan niran:

⁴«¿Imataräshi nogaga nëman pasaypa manacajlla caycashpäga? Chaypa ruquenga upällallana cacushaj.

⁵Yaparir-yaparir achcatanami rimashcä. Masta rimanäpäga mananami cannachu.»

⁶Chaura Tayta Diosga shucucuy wayrapita Jobta nimuran:

⁷«Canan mä rasunpa runano camaricuy. Cananmi llapan tapushäcunata willamanqui:

⁸Gamga ¿pantaycashätachu yarpaycanqui? ¿‹Juchaynajmi cä› nishpayquichu, nogataga ‹juchayoj canqui› niycämanqui?

⁹¿Gam noganöchu sinchi canqui? ¿Räyuno busnënöchu gampapis busniqui?

¹⁰Chayno captenga mä munayniyoj rispitädu ricacuy. Achicyaypa achicyaycaj röpayquita jaticuy.

¹¹Mä ricay llapan alli-tucojcunata: Rabyasha caycashayquiwan castigay. Nircur pengacachiy.

¹²Ricärishallayquiwan ushariy. Fiyu runacunataga caycashallancho mä llapiriy.

¹³Cay pachacho cajtaga llapanta pampariy. Nircur wichgarcuy wañushacuna prësu caycashan cajman.

¹⁴Chauraga quiquëpis nishämi ‹Munayniquiwanmi salbacushcanqui› nir.

¹⁵«Masqui ricay ‹Behemot› jutiyoj manchacuypaj animalta. Chaytapis gamta rurashäno nogallami rurashcä. Wäcacunanömi guewata micun.

¹⁶Ricay, imano sinchishi matancancuna, imano callpayojshi ricrancunapis.

¹⁷Chupanpis fiyupa chucru sedru guerunömi. Atacancunacho caj ancuncunapis pillucasha-pillucasharämi.

¹⁸Tulluncunapis caycan runsi tübunöraj, fyërrupita garutinöraj.

¹⁹Chayga caycan noga yachaj caynëwan rurashämi. Rurashä captin nogallami chaytaga binsëman.

²⁰Jirca animalcuna tiyar gochpashan jircachömi wiñan guewacunapis chay animalpäga.

²¹Öjasapa jachacunapa öjan shicwaj rurincho puñun. Gocha-gocha, shatacuna caycashallanchömi pacaräcunpis.

²²Öjasapa jachacuna llantupan. Yacu aywajpa cantuncunacho caj wayau guerucunana intërunpa tumaraycan.

²³Mayu chayaptinpis manami manchacunchu. Sengancamana yacu ñitiptinpis imatapis mana gocuypami cacun.

²⁴Ricchaycaptenga ¿piraj charinman? ¿Piraj sengantapis uchcuparinman arguyllata churacurcunanpaj?