Ayuba 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Alatala man naxa a masen Ayuba bɛ,

²«I tan naxan Ala Sɛnbɛ Kanyi kalamuma, i suusama a rakiitide? Xa lɔnnila na i tan na, yaabi nde ti yi birin ma ba.»

³Ayuba naxa Alatala yaabi,

⁴«Mixi xuri di nan n na. N tan i yaabima munse ra? N bara n dɛ suxu n bɛlɛxɛ ra, n dundu yen.

⁵N wɔyɛn nɛ keren, n naxa wɔyɛn firin. Na xanbi, n mu sese sama na fari sɔnɔn.»

⁶Ala man naxa a masen Ayuba bɛ turunnaadɛ foye kui,

⁷«I i tagi xiri gben alɔ gbangbalanyi, n xa maxɔrinyi ndee ti i ma, i xa n yaabi.

⁸I mu laxi a ra n ma kiiti tinxin? I wama nɔndi bafe n yi ra nɛ, a xa lu i tan bɛ?

⁹I sɛnbɛ gbo Ala gbe bɛ? I xui magaaxu alɔ a gbe?

¹⁰Na kui, i i maxiri nɔrɛ nun xunnakeli ra ba, i xa tofan, i xa i sɛnbɛ masen.

¹¹I xa i xa xɔnɛ magaaxuxi ramini ba, i yɛtɛ igboee xun nakana.

¹²E birin kuntan, mixi ɲaaxie igbantu e yire.

¹³Bɛndɛ radin e birin xun na, e balan gaburi kui.

¹⁴Na tɛmui n fan yɛtɛ yati i matɔxɔma nɛ, barima i yɛtɛ sɛnbɛ bara i rakisi.»

¹⁵«Mali mato ba a fanyi ra, na sube magaaxuxi n naxan daaxi alɔ n i fan daaxi ki naxɛ. A ɲooge donma alɔ ninge.

¹⁶A sɛnbɛ gbe na a gungui nɛ, sɛnbɛ malanxi a furi kiri bun.

¹⁷A xuli sɛnbɛ gbo alɔ konde bili, a sanyi fasɛe wuya, e gadara.

¹⁸A xɔrie luxi alɔ yɔxui, xa na mu a ra wure.

¹⁹Ala xa daalise fisamante nan a ra, kɔnɔ a gaaxuma Ala xa santidɛgɛma ya ra.

²⁰A a baloe fenma geyae kɔn sube xaaɲɛe ya ma.

²¹A xima niini bun ma, a a nɔxun dabonyie kui.

²²A a malabuma wuri bilie niini bun ma, naxee na dabon dɛ ra.

²³Dabonyi ye xa gboe mu a magaaxuma. Yurudɛn xure na banbaran yɛ, a mu a tɔɔrɔma.

²⁴A ya rabixi nɔma suxude? A nɔma suxude gantanyi ra, a ɲɔɛ xa tunba?»

²⁵«I nɔma sɔɲɛ suxude kɔnyi ra? I nɔma a dɛ xiride, i a ba ye xɔɔra?

²⁶I nɔma a ɲɔɛ, xa na mu a ra a dɛ tunbade, i luuti sa a ma?

²⁷A i mayandima i xa a fulun? A hayi na wɔyɛnyi ɲɔxunmɛ ma a falafe ra i bɛ?

²⁸Wo saatɛ xirima? A findima i xa konyi ra a xa simaya kui?

²⁹I nɔma berede a ra alɔ xɔni di? I nɔma a xiride, a findi i xa die xa bere se ra?

³⁰I nɔma a matide? Yulɛe a itaxunma e bore ma?

³¹I nɔma a kiri masɔxɔde tanbɛe ra? I nɔma a xunyi sɔxɔde sɔxɔse nde ra?

³²Gere ti a bɛ, na mu nɛɛmuma i ra. I mu na ifirinma sɔnɔn.»