Yoobu 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yinni Gusunɔ u mɑɑ Yoobu sɔ̃ɔwɑ u nɛɛ,

²wunɛ wi ɑ kɑ tii yinɑmɔ nɛ, Yinni Gusunɔ Dɑm kpuroɡiin wuswɑɑɔ, kɑɑ ɡɑri wɑ ɑ ɡere?

³Mɑ Yoobu u Yinni Gusunɔ wisɑ u nɛɛ,

⁴wee nɑ ǹ sɑ̃ɑ ɡɑ̃ɑnu. Mbɑ kon kpĩ n nun wisi. Kon nɔɔ nɛnɛwɑ n mɑri.

⁵Nɑ ɡɑri dɑbinu ɡeruɑ kɔ, nɑ ǹ mɑɑ ɡɛɛ ɡerumɔ.

⁶Mɑ Yinni Gusunɔ u Yoobu wisɑ ɡuru woo bɔkɔ ɡɑɡun di u nɛɛ,

⁷ɑ sɔɔru koowo, kpɑ ɑ yɔ̃rɑ nɡe tɔn durɔ wɔruɡɔ. Kon nun ɡɑri bikiɑ kpɑ ɑ mɑn yi tubusiɑ.

⁸Yoobu, kɑɑ kpĩ ɑ mɑn sɔ̃ mɑ nɑ ǹ ɡem mɔ? Kɑɑ mɑn tɑɑrɛ wɛ̃, kpɑ ɑ tii ɡem wɛ̃?

⁹Wunɛn dɑm mu nɛ Gusunɔɡim turɑ? Wunɛn nɔɔ ɡɑ koo kpĩ ɡu nɔɔrɑ kɑ dɑm nɡe nɛɡuu?

¹⁰Ǹ n mɛn nɑ, ɑ wunɛn yiiko kɑ wunɛn bɛɛrɛ sɔ̃ɔsio,

¹¹kpɑ ɑ wunɛn mɔru sɔ̃ɔsi, ɑ be bɑ tii sue nɔni ɡirɑri ɑ surɑ.

¹²A bu nɔni mɛniɔ, kpɑ ɑ bu sekuru doke. A kɔ̃sɑn kowobu kpeerɑsio mi bɑ wɑ̃ɑ,

¹³kpɑ ɑ bu sike sɑnnu bɑ n wɑ̃ɑ ɡɔribun wɑ̃ɑ yerɔ, mi bɑ ǹ bu wɑsi.

¹⁴Sɑɑ yerɑ nɛ Gusunɔ kon nun wɔlle suɑ. Domi wunɛn dɑm mu nun nɑsɑrɑ wɛ̃ɛmɔ.

¹⁵Kperɑ wee, ye nɑ wɑ̃ɑru wɛ̃ nɡe wunɛ. Yɑkɑsɑ yɑ rɑ di nɡe nɑɑ.

¹⁶Yen dɑm mu wɑ̃ɑwɑ yen ɡɑbu kɑ yen wɑsin yɑɑ sɔɔ.

¹⁷Yɑ rɑ kpĩ yu yen siru bɔbiɑsie tu ko nɡe dɑ̃ɑ dɑmɡiɑ. Kpɑ yen sĩinu nu n sɑ̃ɑ nɡe ni bɑ tɑrɑ.

¹⁸Yen kukunu sɑ̃ɑ nɡe sii ɡɑn te tɑ wem mɔ, mɑ yen wɑsin kɑ̃ɑsi yi sɑ̃ɑ nɡe sii bokuru.

¹⁹Yɑ sɑ̃ɑwɑ nɛn tɑkɑ koorɑ ye yɑ tɔmbu biti mɔ̀ n kere. Nɑ ye donnu dokeɑ.

²⁰Yɑ rɑ yen dĩɑnu wɑwɑ ɡuunɔ mì ɡbeeku yɛɛ kpuro yi rɑ mɛnnɛ yi dwee.

²¹Kpɑ yu dɑ yu kpunɑ dɑ̃ɑ kiku ɡɑɡun sɑɑrɔ ɡe ɡɑ wuru bɑkɑsu mɔ, ǹ kun mɛ nɑɑ yɑri sɔɔ, ǹ kun mɛ dɑ̃ru ɡɑrun kɔkɔrɔ dɑru bɔ̃ɔwɔ.

²³Bɑɑ dɑɑru tɑ̀ n nim yibɑ nɡe Yuudɛnin dɑɑru, yɑ ǹ dukɑ yɑkurɔ. Bɑɑ ten nim mù n ye wukiri yɑ ko n kpĩwɑ mi sɛ̃ɛ.

²⁴A tɑmɑɑ kɑ dɑmɑ bɑ koo kpĩ bu ye mwɑ yɑ̀ n yɑm mɛɛrɑ? Nɡe ɑ tɑmɑɑ kɑ yɑ̃ɑkororɑ bɑ koo ye mwɑ bu wɛ̃ru yɑbɑ.

²⁵Kɑrɑku mɑɑ ni. A ɡu kɔkɔru sɔrere ɡen yɑrɑɔ ɑ yɑrɑmɑ?

²⁶Kɑɑ kpĩ ɑ wɛ̃ɛ dɑmɡii doke ɡen wɛ̃rɔ, kpɑ ɑ ɡen bɑɑ sɑburo yɑbɑ kɑ kuurɑ?

²⁷Gɑ koo nun suuru kɑnɑ ɡu nun ɡɑri dori sɔ̃,

²⁸kpɑ ɡu kɑ nun ɑrukɑwɑni bɔke, ɡu ko wunɛn yoo sere ɡu kɑ ɡbi?

²⁹Kɑɑ wurɑ ɑ kɑ ɡu dwee nɡe mɛ bɑ rɑ kɑ ɡunɔ dwee? Kɑɑ wurɑ ɑ ɡe bɔke wunɛn wɔndiɑbɑ bu kɑ dwee?

³⁰Sɔrɔkɔbɑ bɑ koo wurɑ bu ɡu tenkubɑ dɔre, kpɑ bu ɡen yɑɑ bɔɔri bu dɔrɑ?

³¹Kɑɑ kpĩ ɑ ɡen ɡɔnɑn wɔllɔ sɛ̃ɛnu twee, kpɑ ɑ ɡen wiru yɑɑsɑ sɔku?

³²À n nɛɛ, kɑɑ kɑ ɡu sɑnnɑ, ɑ̀ n ɡu bɑbɑ, ɑ ǹ mɑɑ ɡu bɑbɑmɔ siɑ.