Atuwɑ 28:17-28

¹⁷Wei ɩ nyʋɣʋ tɑɑ lɛlʋ səm tɔm wɛɛ tɔ, ɩ seeki ɩ təɣɩ nɑ ɩ́ hoti pəlɑɑʋ tɑɑ, nɔɣɔlʋ ɩ́ tɑɑ kpɑ-ɩ.

¹⁸Pə kentiɣi wei ɩ tɔntɛ tewɑ tɔ ɩ tɔɔ kɛ́. Amɑ pɑɑ lotu nɑɑlɛ tʋ kɑ lɑ ɩsənɑ ɩsɩɩ ɩ lepɑ.

¹⁹Tɔɣɔnɑɣɑ tɔɔlənɑ wei ɩ hɑləɣɩ tɔɣɔ. Ɩlɛnɑ wei ɩ təŋəɣɩ kpɑɩ nyəm tɔ ɩ wɛ kʋnyɔŋ tɑɑ.

²⁰Pə kooliɣi kʋpɑntʋ kɛ wei ɩ wɛnɑ yʋlʋtʋ tɔɣɔ. Amɑ wei ɩ huliɣinɑ wɛnɑʋ hikuɣu tɔ pɑ kɑɑ yele ɩ ŋkpɑŋʋɣʋ hɔm.

²¹Pə fɛɩ sɩ mɑ nyəmɑ-ɩ ɩ́ wɛɛ hʋʋlɛ tɑɑ. Pɑɑ nɑ mpʋ lɛlɑɑ lɑkɩ yɑɑsi ɩnəɣɩ mʋtʋ ɩcɑʋtɛ mɑɣɑmɑɣɑ nyʋɣʋ tɔɔ.

²²Ɩsɛsɛɛmlɛ tʋ huliɣi wɛnɑʋ tɔɔ kɛ́, ɩ tɑ nyɩ sɩ kʋnyɔŋ kɑ́ kpɑ-ɩ.

²³Wei ɩ kɑləɣənɑ ɩ tɔɣɔntəlɛ kɛ ɩ ɩsɛntɑɑ tɔ, pɑ sɛɛ-ɩ nɑ pə kəlɩ wei ɩ puɣusiɣi tɔ.

²⁴Wei ɩ ŋmɩɩləɣɩ ɩ cɑɑ yɑɑ ɩ too nɑ ɩ́ tɔŋ sɩ: Pə tɑ kɛ ɩsɑɣɑtʋ tɔ, ɩ́ nɑ ŋmɩɩlʋ yʋlʋkʋlʋ pɑ kʋlʋm kɛ́.

²⁵Wei ɩ hɔŋ ɩ tɩ tɔ ɩ kɔŋnɑ yoou kɛ́. Amɑ wei ɩ pɛtɑ ɩ təɣɩ Tɑcɑɑ tɔɣɔ pə lɑkənɑ.

²⁶Wei ɩ lɑkɩ ɩ lɑɣɑtʋ kɛ ɩ tike tɔ ɩ kɛ́ kʋmɛlɛŋ kɛ́. Amɑ wei ɩ lɑkənɑ ləmɑɣɑsɛɛ tɔ ɩ wɑɑlɩ kɛ́ pə tɑkəɣɩ.

²⁷Wei ɩ hɑɑkɩ kʋnyɔntʋnɑɑ tɔ ɩɩ lɑŋəɣɩ pʋlʋ. Amɑ wei ɩɩ nyənəɣɩ-wɛ tɔ, mpusi sɔsɔ kɑ wɛɛ ɩ tɔɔ kɛ́.

²⁸Ye ɑsɑɣɑɑ ɩ tɔɣɔ tɛtʋ, pɑɑ wei ɩ ŋmɛləɣɩ kɛ́. Ye pɑ sɑɑləɣɩ ɩlɛ siɣisilɑɑ nɑ́ɑ́ huki.