4Ye yʋlʋ pɑsəɣɩ ɩ tɩ nɑ ɩ́ nyɑŋnɑ Tɑcɑɑ, pə kɑsəyɑɣɑ ntɛ́ wɛnɑʋ nɑ teeli nɑ weesuɣu.
5Sɔwɑ nɑ kɑtɔsɩ pə wɛ yʋlʋ ɩsɑɣɑʋ mpɑɑʋ tɑɑ kɛ́. Ye wei ɩ́ sɔɔlɑ ɩ tɩ pə wɛɛ sɩ ɩ́ cɔlɔ-kʋ.
6Hʋ́lə́ɣɩ́ pəyɑɣɑ kɛ mpɑɑʋ ŋku kɑɑ təŋ tɔ. Pɑɑ kɑ kɔmɑ nɑ kɑ́ kpɑtəlɩ kɑ kɑɑ yele-kʋ.
7Liɣitee tʋ ŋmɑkələɣɩ kʋnyɔntʋnɑɑ kɛ́. Ɩlɛnɑ kəntəlɑɑ nɑ́ɑ́ pəsɩ mpɑ pɑ kəntəɣɩ-wɛ tɔ pɑ yomɑɑ.
8Wei ɩ́ tuuwɑ mpi pə tɑ siɣisi tɔ, wɑhɑlɑ kɛ ɩ kʋŋ. Nɑ ɩ pɑ́ɑ́nɑ́ kpɑ́tʋ́ɣʋ́ kɑ́ sɑɑlɩ yem.
9Pɩɩ təŋsɩ kʋpɑntʋ lɑtʋ kɛ nɔɔsɩ kʋpɑŋsɩ kɛ́. Mpi tɔ, ɩ hɑɑkɩ kʋnyɔntʋ kɛ ɩ tɔɣɔnɑɣɑ.
10Tɔɣɔnɩ woŋlu, ɩlɛnɑ yoou tɛ, nɑ hɔm nɑ kʋtʋɣʋ sɩɩ tənɑɣɑ.
11Yʋlʋ ɩ́ sɔɔlɑ wei ɩ lotu tɑɑ wɛ tənɑŋŋ, nɑ ɩ́ yɔɣɔtəɣɩ pɛɛlɛɛ tɔm tɔ, wulɑʋ ntɛ́ pʋntʋ tɑɑpɑlʋ.
12Tɑcɑɑ kentiɣi nyəm tɔɔ kɛ́, nɑ ɩ́ liɣitiɣi ɑsɑɣɑɑ kʋyɔɣɔtʋtʋ.
13Felentú kʋyɔɣɔtʋtʋ ntɛ́ sɩ: Tɔɣɔlɑɣɑ wɛ ɑwɑlɩ. Kɑ́ tɑɑ kɔɔ nɑ kɑ́ kʋ-m hɑpəlɛ tɔɔ.
14Alʋ tɛtɛlɑtʋ kʋyɔɣɔtʋtʋ kɛ́ pʋ́ʋ́ɣʋ́ lumɑŋ nyəŋkʋ kɛ́. Tɑcɑɑ lɔwɑ wei tɔ pʋntʋ hotiɣinɑ kʋ tɑɑ.
15Kpɑŋʋɣʋ nyɔnɑ pəyɑɣɑ tɑɑ. Ɩlɛ sɛɣɛsʋɣʋ tipilɑɣɑ kɑ́ wɑɑsənɑ-kɛ.
16Ye n muɣuliɣi kʋnyɔntʋ n wɑɑsəɣɩ-ɩ kɛ́, nɑ wei ɩ hɑɑkɩ toŋ tʋ tɔ, ɩ təɣɩ ɩ sʋsəɣɩ kʋnyɔŋ.
17Ke ŋkpɑŋŋ nɑ ń nɩɩ ləmɑɣɑsɛɛ nyə́mɑ tɔm, nɑ ń tɔ́kɩ mɑ nyəm kɛ nyɑ́ tɑɑ.
18Mpi tɔ, pə wɛ teu sɩ ń tɔ́kɩ-təɣɩ nyɑ́ tɑɑ nɑ tə́ wɛɛ nyɑ́ nɔɣɔ tɑɑ.
19Nɑ pə́cɔ́ ń tʋ́ Tɑcɑɑ kɛ nɑɑni, ɩlɛ mɑɑ sɛɣɛsɩ nyɑ́ mɑɣɑmɑɣɑ kɛ sɑŋɑ.
20Mɑ tɑsɑ-ŋ lɑɣɑtʋ nɑ ləmɑɣɑsɛɛ tɔm ɩsɩɩ hiu nɑ nɑɑnʋwɑ,
21sɩ pə sɛɣɛsɩ-ŋ tɔm nɑɑni nyəntʋ nɑ tɑmpɑnɑ nyəntʋ, nɑ ń cɔ tɑmpɑnɑ kɛ wei ɩ tilɑ-ŋ tɔ.
22Tɑɑ lɛɛkɩ kʋnyɔntʋ kɛ ɩ ɩcɑntʋ tɔɔ. Pə́cɔ́ tɑɑ muɣuli wɑhɑlɑ tʋ kɛ təhʋʋlɛ.
23Pə tɑɣɑ pʋlʋ, Tɑcɑɑ kɑ́ sɛɛnɑ pɑ tɔɔ nɑ ɩ́ ləsɩ mpɑ pɑ lɛɛkɑ-wɛ tɔ pɑ weesiŋ.
24Tɑɑ puki pɑ́ɑ́nɑ́ tʋ tɛ, pə́cɔ́ nyɑ́ nɑ mʋsʋŋtʋ ɩ́ tɑɑ tɔ.
25Pə́ tɑɑ kɔɔ nɑ ń kɛɛnɑ-wɛ nɑ pɑ́ pəsɩ-ŋ ɩsɩɩ kɑtɔkɑ.
26Tɑɑ sʋʋ mpɑ pɑ sɩɩkɩ nɔɔsɩ kɛ yem, yɑɑ pɑ mʋɣɩ lɛlɑɑ kəmɑ tɔ pɑ tɑɑ.
27Ye ń fɛɩnɑ sɩ ń fɛlɩ, pɑɑ kʋsɩ-ŋ nɑ pɑ́ kpɑɣɑ nyɑ́ kʋhəntʋɣʋ mɑɣɑmɑɣɑ.
Atuwɑ 22
Atuwɑ 22:4-27