1Isaraele wambu dupwa, nakama wasiyamo Kamongo Anatu dokome lao, Nambame nakama kyawa minyaroŋo paka nalapape, letamo. Nambame nakama kingi leyoŋo. Nakama nambana angingyuo karaminyiŋi.
2Nakama ipwa rapu koko kyuwa dupwa yalo paraminyi dokopa namba range nakama role kararo. Nakamana randa dupwame nakama kapa nyuo anamasi minya nara. Isare rao kararamo dupwana sukusa parami dokopa nakama isare dokome kapa raa narami. Dee makande pingi andake dupwa nakama keta eparamo dokopa randa nyii narami.
3Namba nakama Isaraele wambunya Kamongo Anatu poo pyasi nakama kyawa lete nyingi doko. Nambame nakama mona seramo karalapase lao Isipi wambu dupwa kyawa yaki nyuo nakama kiiramo nyero. Dee namba Itiopia wambupi Sepa wambupi opetae kyawa yaki nyeroko.
4Nambame nakama pipya mona reto dee ketae pyambuo pilyu. Dee nambame nakama moname nyuo rungi rungi pyapunu karaminyi. Dokona lao nakama kyawa lete nyuo wambu peparae yuu lapona palaminyi dupwa kame soo kyawa yaki nyero.
5Namba nakama role karoŋo dokona paka nao karalapape. Nambame neta pyakaenge dorena pisowape dee neta yalyingi dorena pisowape nakamana wambu dupwa range nyuo anda lanyoko eparo.
6Dopa pyuo karaminyi dokopa yuu dulurena wambu dupwa lamaiyuo dokopa nambana wambu dupwa kakaso pena kaeyakana laro. Dee donorena wambu dupwa lamaiyuo dokopa penaleŋe minya sili sili laa nana lao piru. Dokopa kamame panda lao saka nange yuu muu wakale wakale dupwana naneta kararaminyi dupwape dee yuu muu peparae kipwa kipwa dupwana kararaminyi dupwape andako kili kali pyuo epena.
7Nakama namba rangena wambu. Nakamame nambana kingi andakinyi nembo yulu pirami lao nambame nakama wasiyu.
8Anatumi lao, Nambana wambu dupwa kote lala epena lao lamailapape. Nakama lenge rao karaminyipape lenge koo ingilyaminyi. Dee nakama kale kata siminyipape kalepoenge ingilyaminyi.
9Yuu muu peparaena rara dupwa api mende porailyamo doko makande pyuo kandala epena lare. Dopa pirinyi dokopa nakamana mee bange anatu dupwana api mendeme rengya piramo dupwana larase? Dee nakama dupwa anjuku mendeme dakepa pyaka silyamo dupwa dopa piraŋa lao leyase? Mee bange anatu dapwame nakama kinyi angi rolae leyamiŋi lao lakarami usinisi dupwa lanyuo epena.
10Isaraele wambu dupwa nakama nambana usinisi lakarami. Namba nakamame soo nyuo suu pyao dee namba Anatu mendaki iki lao serami lao nambame nakama nambana kendemande wambu ingyuo rombo palyiyu. Namba iki Anatu karo. Anatu wakale mende kara nalyamo. Dokonako ingyuo wamba mende kara nange. Dee rengyape mende kara narako.
11Nakama lete wai pyao nyeramo Kamongo doko nambako iki karenge.
12Rengya nyera dupwana see nao kareyaminyi dokopa dopa piralyamo lao langingi. Langipala dee paki kata palipala nakama nyiso epenge kandape. Doko suu pyao yuu pandape wakale dupwana mee bange anatu mendeme dopa pyuo pingiŋi leyaminyi see nayami. Dokona lao nakama nambana usinisi ingyuo karaminyi.
13Namba Anatuŋu lao leto doko mee karengenyili pyuo kararo ingyapyasa leto. Mendemepe nambana porainya renge doko wanja narami. Dee nambame pingi lengepe dupwa mendeme kapa alowa pii naramiko.
14Isaraelena Anatu poo pyasi nakamana Kamongo nyiso kyawa lete nyingi dokome lao, Nakama nyiso kyawa lete nyuo nambame ami yanda singi dupwa yuu Bapilone pyala pena lao peyaro. Nambame yuu taonena kame kambu dupwa pyao lalyapala dee Bapilone wambu pii poraiyuo lao mambo pyao karaminyi dupwa dee nyuo ee lena lao piru.
15Namba Kamongo doko nakamana Anatu poo pyasi ingyuo karo. Nambame nakama Isaraele wambu dupwa pyuo wasiyu. Wasapala namba nakamana kiŋi ingyuo karo.
16Yuu wamba dokopa ipwa kota pete pyao karalyiyamo dokona Kamongo dokome kata wapuo reteya.
17Baame ami yanda singi poraipi uliuli mename ipilyamo piso papingipi mena osepe peparae pyao kokwa soo nembo oteya kande. Nakama isa paleyaminyi doko lambe puku lapala kunjapala raa nalamuli pyuo nakama kamba lete sipurao epa nao isa palu palyuo paleyami.
18Dopa piyamopape Kamongome lao dokopa wambowana piyunu dupwako paka pyao soo lao kara nalapape.
19Nambame yulu enenge lapo piru ingilyamo dokona kandaro karalapape. Doko dakepa lapo pilyamo dupwa nakama angi kandelyaminyi. Namba yuu muiyane dokona kata wapwakaro. Dee dokona ipwa guu lao epena laro.
20Nambana rombo palyuo nyiyunu wambu dupwana lao yuu muiyane dokona ipwa endangi palyuo epo karena lao mairunu dokopa yaka kameyape yana suwa kararopepe mena rae lengepe dupwa peparaeme kandapala nambana kingi ketae pyambuo lakandarami.
21Nakama nambana wambu namba rangeme wasiyunu petaminyi dupwame namba lakando kenane pyarami ingilyamo.
22Kamongo dokome lao, Dopa piyunupape Isaraele wambu nakamame nambamoo pipya makame kumapala namba lakanda nayami.
23Nakamana mena sipisipi kiso jingi doko kaeyami. Nakamame mena pyao kiso joo nambana kingi lakanda nayami. Nambame dopa pyuo kiso jipa lao mona kendanyi pyambuo piso see nayo. Dee parali angae lao rendamu pingi jipa lao piso see nayo kande.
24Nakamame rendamu pingi bange lapo ropo pyao nyaka nayami. Dee mena kapa rukisipi kiso jiminyi namba sikya pipyamo karonde daa. Dopa pii nayaminyipape nakamame koo pipala namba mona kendanyi pyambuo kareyami. Nakamame kopetame piyaminyi dokome yame yame lanyi pyambuo karo piyami.
25Dopa pyuo kareyaminyipape namba Anatu dokome nakamana koo renge dupwa nyuo kame sakao karo. Doo pilyu doko nambaŋa lao sepala dopa piru, leya. Nakamana koo dupwana suu pingi nyepala minyuo karo nakama pipya yanda pimwaiyuo yango palya naro.
26Nakamana pii larami dupwa minyuo epo dokopa kotena minyuo pao lamanale. Embena pii angi palamo doko lamairinyi dokopa emba rolae doko panenale.
27Nakamana akali kyawa wamba kanda soo kareyamo dokome koo piya. Dee nakamana akali mupwa dupwame koo piyamiko.
28Nakamana akali isingi dupwame nambana tembole anda kokwa soo kwaenyi nembeyami. Dokona lao nambame Isaraele wambu dupwa keta randa maiyuo nakama namba rangena wambu dupwa elya nyinya lao pyuo piyu.
