1Dage Israel dabe, dage Jekopgo hani, Genuai Bidigo dage deli hani pedalumainu ilali, agai te tiwai po wai, “Dage wi igio, magi baso meni, eno dage ma sali dao. Eno dageba nogi menama, tama dage te ena da olama, sa muyu dąį ilai dao.
2Dagego te ąį gebo aiyanu dulai te nogebo sogo, te ena dage dali bidaibao, tama te ąįgo dage me dologobeo. Awe, dage te soabo ąį nogebo si, te ąįgo dage mesegelegobeo. Tama dage te posolo yai sia tomoba mu pabo sogo, te siago dage me dogobeo. Te sia bogoligo dage dogobeo.
3Magi baso meni, ena Genuai Bidi, ena te Israel dabe duga God, te eno dage tau saibao. Ena te Wiegi Yai Doloba Pai Kolesaga Ebo God dao, eno naga eno dage ma dobola sobao. Dage te boi bidi dabego nogode bidibo sogo, eno te Isip dabe, me Sudan dabe, me Seba dabe menama, dobu si eyu, dage Israel bage ma saibao.
4Tama eno te gasa hani we bidi dabe me siyu, te dage ma dobu si yaibao, te dage bugagia bidimainu yaibao. Magi baso meni, dage eno godolo homu ebo umabo mu idu, te eno dageba genuai nogi mawainu ebao.
5Ena dage dali bidibao, dage wi me igio. Dage hani dabe te giliga pedalubo badu, me giliga dega sabo badu bidibo, te augwali eno ma odasa asaibao.
6Eno te bidi dabe te not badu, me saut badu bidibo bidi dabebolo olama, te dage ma asomainu ilao waibao. Te eno we bidi dabe te digibulu mu, te tǫ sesege badu bidali me, te augwali eno ma odasa asaibao.
7Dage te eno nogi elalubo hani mu da, te ena digi eno dage nigali, te gasa hani dabego dage sulama, te enaba genuai nogi momainu ebo dao,” wali.
8Godigo te po wai, “Te eno we bidi dabe i olama, sisinagasomainao. Te mu tama, augwaligo te nai subo gedu elalu, te po odobo olo elalubao. Tiali goli augwali gedu widai me olo degai tiwai bidibao.
9Te gasa bulu tǫ kantri we bidi dabe te po tų yabo pesageba sisingasalio. Te augwaligo mena godigo te mena sę nosali pedelaibao wabo po hania pusaliwe? Te augwaligo mena godigo polobadu po weyu, te pedelaibao wali nai megi pedalubowe? Te augwaligo ebo sę suali mena bidi hani dolugulama, te tiwai po weyu, agai te god me deligo te nai me pedelaibao po wali, tama nosali agai suali, te wali sę mu pedalubo dawe?”
10“Tialima, dage Israel, dage te eno po odolama, pusubo bage dao. Eno dage sa muyu, dąį ilama, te ena sę bidi bidimainu yalio. Tama tiyu da, te dagego ena koneama, enaba homu dąų weyu, tama te tiwai dagego bugagia koneyu, te ena deli naga te God mu da omainu ebao. Polobadu te god me deli me pedalisiąma, te aga polasa bidiyu, te ena nosali badu me elalubeo. Tama nosali me, te god me deligo ena bidali pesage me hasegelegobeo.
11Ena naga ena Genuai Bidi dao, tama sesemane sogo eno dage ma sabo dao. Te gasa god dage dali me bidiyu, te dage tau me sabeo. Menio.
12Eno naga enade po hanilama weyu, eno dage ma dobola saibao, te eno dage ma saibao po wali gilama yaibao. Te dage eno po odolama, pusubo bage elalubao, tama dagego e po pusaibao, te ena deli naga ena God, Genuai Bidi dao.
13Megi me, tigidali sogo, ena te God mu bidibao. Te eno we bidi me deli te bonogo kębo tiwai eyu da, te niwai bidi me deligo te eno bomo sela sąnama, te augwali eno nogode ma dobola sogobeo. Te sę me deli eno ebaso da, te mena bidi me deligo eno te sę ebo me paligobe,” te po wai.
14Genuai Bidi, aga te dage Israel Dabego te Wiegi Yai Doloba Pai Kolesaga Naga Mu Ebo God, te aga dage ugwaba sagoalu, te dage ma dobola sabo bidi, agai te po wali, “Te eno we bidi dabe dage tobade eno te ami bidi dabe te Babilonba hwįagasomainu tagala palaibao. Te Babilon dabe tigidali augwa te wiegi yai homu pemene ebo te sip dabe daiba holama, te augwa bidali bulu pesage tagalama, wi paibao.
15Ena naga ena Genuai Bidi, ena dagego te Wiegi Yai Doloba Pai Kolesaga Naga Ebo God dao. Eno dage Israel dabe te deli hani we bidi pedalumainu ilama, te megi ena duga king bidibo dao.”
16“Polobadu ena Genuai Bidi, eno te tamu ąį tomode sunumi nigai dao. Awe, eno te bomai ąįdu soabo tų nigai dao.
17Tama eno te boi bidi hauwa dali, te augwa karis me hos dabe dali, augwa te tamu ąį sunumi tomodu wali asobadi, te augwali mu dolama, te munu ma hogodalubeo. Augwali te polo tama mu isila pali, te lam sole bidigo pona palobode isibo tiwai yalio.
18Tialima, megi eno te po obao, dagego eno te polobadu yali sęde naga homu kone paligio. Menio.
19Dagego te gesi sę eno eboba tonono yao. Te megi pedaludubo sę te dagego sube da, agawe? Te wa pai pesage badu te eno sunumi nigilama, tama eno te ąį dabe tebadu pomainu ilaibao.
20Te bulu uni hasa dabe te uni yowi dabe tiwai, te ba uni dabe me, te augwaligo ena genuai nogi mawaibao, eno te ąį te wa pai bulu pesageba asomainu ilama, pedalubo side, te ena digi eno sa muyu dąį ilali we bidi, augwa te ąį tumainu tiaibao.
21Eno te we bidi dabe te ena hani we bidi digi pedalumainu ilali, te augwa wiegi yai pemene eyu, te eno genuai nogi po pusumainu te tama tiaibao wali.” Genuai Bidigo te po wali.
22Genuai Bidigo te po wai, “Dage Israel dabe, dage te Jekopgo hani, eno dage te eno hani we bidi digi pedalumainu ilali goli, dagego eno nogi wasiąyu, enaba lotu wabeo. Tama magi naigo tibaso, te dagego enaba hagela eyu, te dagego ena godolo mu isiąyu ebawe?
23Te dagego haliga homu kolesaga enaba beaga sisąma, te dagego haniani ofa ebo sogo tama tibao. Te dagego te sipsip dabe te tigidali siaba mu uluyu, ofa tiwai ebo sogo, tama dagego te tobage awi te denami ebo nai abelama, te agaba ofa ebo sogo, te dagego te kibu hasa ili hauwa pesage holama, te ofa tiwai eyu ebo sogo, te dagego enaba homu kone palama, te ofa dabe ebeo. Eno dageba te sęgę mayu, te dageba po bomo eyu, dagego te wit ofa me, te wiegi yai denami ebo hano ebo ofa me, sesao po wabe, tama te sę dene ebaso, te dagego enade hagela homu ebeo. Mu menio. Tiali goli, dagego genuai sęgę enabolo menama, tama ena dagego te dwai sę ebode, me haniani dwai kolesaga ebode hagela mu ebo dao.
25Tialima, ena Genuai Bidi, ena genuai nogiba digi homu kone palama, te eno dagego dwai sę ebo sęgę tigidali sela sąbo dao. Tama eno te dwai sę dabeba homu kone me palogobeo,” te po wali.
26“Tialima, dagego homu kone palao, te dagego dwai sę me ebe homu eba wida, teda dagego eno homu dodolama, te da tede po minao.
27Tiali goli, menio. Te dagego hasia wąį nǫųgo te dwai sę yali, te dagego tobolu bidi dabego me eno po sela sąwai dao.
28Tama tibaso, eno te het pris dabe eno gedude meda yai pedalumainu ilali. Te eno dage Israel dąį ilali, te Jekopgo hani dabe, te tigidali mu dolomainu yaibao. Tama eno te gasa hani we bidigo te posobo po weyu, te dageba gisugu momainu yaibao,” wali.
