Isaías 43

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Jacob-wagan, Bab-Jehová-be-obinnisadi soged, Israel-dulemar, Bab-Dummad-be-urbisadi, weyob soged: “Melle be dobguo, ar ani an be-nudaksad. Be-nugba an bese gochad. Be an-mimmi gued.

²Be dii-obaknaile, an beba nadapmogoed. Be diwar-obaknaile, be gundilegosulid. Soo-birgi be nadapile, gwen be gummakosulid. Soo-duurmakedi gwen begi naguosulid.

³Ar ade, ani an be-Bab-Dummad-Jehová gued, an Israel-dulamar-e-Bab-Dummad-Isligwaledid, an be-Abonogedid. Ani an, be-onogega, Egipto-dulemar-urmaksad. Be-muchub Etiopía-yar, degi, Seba-yar an urmaksad.

⁴An be-muchubbi dulemar-urmakoed, an be-san-burba-muchubbi, dule-bamalad an urmakoed. Ar an bela-belad bemar-sabed. Be an-asabinni, ibiyob be yeerdaklege, be duledar-nued gued.

⁵Melle be dobguo. Ar an beba gudiid. Dad-nakwed-akale, an be-anagan sedagoed. Dad-argwaned-akale, an be-urboed.

⁶Dulemar-dad-nakwed-argan-sapiledsik yar-baid-baidgi-bukmaladga an sogoed: ‘¡An-dulamar anga udage!’ Dulemar-dad-nakwed-argan-nuedsik yar-baid-baidgi-bukmaladga an sogoed: ‘¡Melle an-dulamar gamalo!’ Be anga an-masmala-dikasuli-bukwad sedage, be anga an-bunamala-napneg-ugakaase-bukwad sedage.

⁷An-nugba-ese-gollemaladi, be anga bela seda. An-nug-odummogega an obinnisadi, be anga seda. Ani an obinnisad, ani an urbisad.”

⁸Bab-Dummad soged: “Dule-aku-atakmalad, amba ibya-nika-inigwele, be anga onimar. Dule-uaya-yallirmalad, amba uaya-nika-inigwele, be anga onimar.

⁹Dule-yar-baid-baidgi-bukmalad bela be oambikumar. Bela dulemar danar ambikumar. ¿Doa we-dulemar-abargi we-ibmar-guoedgi iduakwaa anmarga sunmaksa? ¿Doa ibmar-gusmalad anmarga sogsa gusa? E-daksamalad be oyomardo, nabir-sogmarye be sogmardo, adi, dule-baigan itomalagar, degi, sogmalagar: ‘Napiraye.’ ”

¹⁰Bab-Jehová Israel-dulemarga soged: “Bemar an-barsogega be gumar, anga-arbaega an bemar-susad, adi, bemar magar-an-dakmalagar, melle angi bengumalagar. Adi, be magar-itomalagar, an doa gue. An-iduale, bab-dummad-baid gwen megissulid, gwen an-sorba bab-dummad-baid megosurbalid.

¹¹Ani an Bab-Jehová gued. An-imbagi, dule-abonoged-baid sated.

¹²Ani an bemar-owisosad, ani an bemar-bendaksad. Ani an bemarga sunmaksad. Bemar-abargi, gwen bab-dummad-baid gudii gussulid. Ani an gudii gusad. Ani an Bab-Jehová-guedgi soged: ‘Bemar an-barsogega be gumarye, Ani an Bab-Dummad guye.’

¹³Ani an gebe-negasaila-akale Bab-Dummad gued. Dule gwen angi wakinnosulid. An-ibmar-imakedi, dule gwen obelogosulid.”

¹⁴Israel-dulemar-e-Bab-Dummad-Jehová-Isligwaled bemar-bendakmaidi, weyob soged: “Bemar-ulale, Babilonia-neggweburse sorda-bamalad an barmidoed. Dulemar-wakindiiyobi an bela Babilonia-dulemar-imakoed. Caldea-dulemar urmar-nikadba na nug-dummarba-itodimalad, bela an obelomogoed.

¹⁵Ani an Bab-Dummad-Jehová-Isligwaledid. Ani an bemar-e-rey gued, Israel-dulemar-obinnisad gued.”

¹⁶Bab-Jehová sogdebalid: “Ani an demargi igar-mesisgusad, dii-wilasailadgi igar-egasgusad.

¹⁷Egipto-sordamar, moli-birgi, degi, moli-ur-bila-onomaladgi, Israel-dulemar-bargananai-gusmargua, Bab-Jehová, Egipto-sordamar-bela-obelosgusad. Gwallu-gwillo-akichayob amar-imaksagusad.”

¹⁸Bab-Jehová weyob soged: “Ibmar-nasmalad be iemar, melle bar ibmar-gusmaladgi be binsadii gumar.

¹⁹Ibmar gwapidmar an imakoed. ¿Ar bato ibmar-imaklenaid aku be dakmarsi? Ar nega-dulesulidganba an igar mesnaid, neg-dinnaganba an diwarmar mesnaid.

²⁰Ibmar-durgan-sapurbarmalad-ursilimalad, an-nug ogannomalad. Achu-sapur-uaya-gannagana, nuu-dummad-dukar-suid-avestruzʼye-nugmalad, an-nug odummomalad. An an-dulamar-susad-ogobega, nega-dulesulidganba dii-suurmakega an imaked, neg-dinnaganba diwarmar-megega an imaked.

²¹We-dulemar angadga-guega an urbisad, an-nug ogannomalaga an urbisad.

²²”Degi-inigwele, bemar, Jacob-wagan, gwen an-nug odummossurmalad. Israel-dulemar, bemar angi wiegudmalad.

²³Anga bemar sibad-wawaad-sapingana-ogumakar uksasurmalad, ibmar-durgan-anga-ukedgi gwen be an-nug ogannosurmalad. An bese-ibmar-gwag-ukleged-egichedgi-wieguega, an bemar-imaksasulid. Ina-wawagan-oburmakedgi-budar-itogega, an bemar-imaksasulid.

²⁴Be anga gwen masar-wawadikmalad baksasulid. Gwen be ibmar-durgan-oburgwileged-e-gwallugi an-yeer-itogega, be an-imaksasulid. Aka bur be be-isgumaladgi isdarsunna-itogega be an-imaksamalad. Be-isgumaladi, budarsunna-be-dakega an-imaksad.

²⁵”Degi-inigwele, ani, an nue-be-sabsoggu, a-ulale, an bega isgued elied. An be-isguedgi bar binsaosulid.

²⁶Be angi ibmar-soged-nikale, igar-nabogedneggi be anga sogdado. Be ibmar sogdo, adi, magar-daklegega, bule-nabir be ibmar imaksasuli.

²⁷Ar be-dad-sailaginedi isgusad. Be-odurdakmaladi, angi dummad-nosmalad.

²⁸A-ulale, anse-goled-neg-dakmalad-dummagan nug-bipii an imaksad. Jacob-wagan-bela-obelolegega an imaksad. Israel-dulemar-mesagwar-imaklegega an imaksad.”