1Israel, KAUN-O me ketin kapikuhkada mahsanih, “Ke dehr masak, pwe I pahn doareiukala. I ekerkinuhkehr mwaromwen—nei kowe.
2Ni omw pahn kotehwei pihl loal akan, I pahn ieiang uhk; omw apwal akan sohte pahn kakihruhkala. Ni omw pahn keidwei nan kisiniei, ke sohte pahn mwasingkihla; omw apwal laud akan sohte pahn kauweiukala.
3Pwe iet ngehi, KAUN-O, omw Koht, Koht sarawien Israel, omw Sounkomour. I pahn pangala Isip pwe I en kapituhkala, I pil pahn pangala Sudan oh Sepa.
4I pahn pangala wehi kan unsek pwe I en komouruhkala, pwehki ei nohn kesempwalkin uhk, oh pwehki ei poakohng uhk oh waunekin uhk.
5Ke dehr masak—pwe I kin ieiang uhk! 1 “Sang wasa doh ni palimese lellahng wasa keieu doh ni palikapi, I pahn kapwurehdo noumw aramas akan nan dewerail.
6I pahn mahsanihong mehn paliepeng re en kasaledekirailla, oh mehn palieir en dehr kin kolokol irail. Nei aramas akan en sapahldo sang ni sahpw doh kan, sang wasa koaros nin sampah.
7Pwe iei irail nei aramas, oh I wiairailda pwe re en kin kalinganai ie.”
8Koht ketin mahsanih, “Nei aramas akan en pwarodo ni mwoalen kopwung. Mie masarail, re ahpw sohte kin kilang wasa; mie salengarail, re ahpw sohte kin rong wasa.
9Ekerodo wehi kan pwe re en iang wia kadeik. Ihs rehn arail koht kan me kak kohpada irair en ahnsou me pahn kohdo? Ihs rehrail me kohpadahr irair kan me pweidahr ahnsou wet? Re en kapwarehda arail sounkadehde kan me pahn kadehdehda arail pwuhng, me pahn kadehdehda mehlel en arail lokaia kan.
10“Kumwail mehn Israel kan, kumwail me iei ei sounkadehde; I pilkumwaildahr nin duwen ei ladu men, pwe kumwail en eseiehla oh kamehlele ie, oh dehdehkihla me ngehite, me Koht. Sohte emen koht mie, pwe ngehite; sohte mwahn emen mie, pil sohte me pahn mie mwuhr.
11“Ngehite me KAUN-O, ngehite me kak komourkumwailla.
12I kohpadahr irair wet mahsie, I ahpw kodohn sewesei kumwail. Sohte kohten liki men wiahiong kumwail met; kumwail me ei sounkadehdehn irair wet.
13Kumwail ese me ngehi Koht soutuk. Sohte me kak pitsang ei roson oh manaman; sohte me kak wekidala wiepen nin limei kan.”
14KAUN-O, omw Sounkomour, Koht sarawien Israel, ketin mahsanih, “Pwe en kapituhkala, Israel, I pahn kadaralahng Papilon karis ehu; I pahn kauwehla wenihmwen kahnimwo, oh ngilen towe kan pahn wekiong ni mwahiei laud.
15Ngehi, KAUN-O, omw Koht me sarawi. Ngehi me wieiukada, Israel, oh ngehi me omw nanmwarki.”
16Mahsie KAUN-O ketin wiahda ahllap pwoat nan madau, oh ketin koasoanehdi wasahn kot nanpwungen pihl ile kan.
17E ahpw ketin kahluwahla karis kalaimwun ehu pwe re en mwomwla, karis en werennasapw oh oahs kan. Re ahpw pwupwudi, sohla pwurehng pwourda, rasehng wihk en lamp ehu me kunlahr!
18KAUN-O eri ketin mahsanih: “Ke dehr tengala nan mwekid en kawa ko, de medemedewehte dahme wiawiher kawao.
19Ahpw tehk mwahu irair kapw me I pahn wiahda met. E wiewiawiher met—ke kakehr kilang! I pahn wiahda ahl pwoat kotehla sapwtehn, I pahn kihong uhk pwarer en pihl kei wasao.
20Mahn lawalo kan pahn pil kapingahkin ie ei kapwilewehr pillap nan sapwtehn, pwe en kanampilehki nei aramas pilipildahr akan.
21Irail nei aramas akan me I wiadahr ong ni kalinganpen mwarei, re pahn kin kokouliong ie oh kapikapinga ie.”
22KAUN-O ketin mahsanih, “Israel, kaidehkin ngehi me ke kaudokiong pwe ke pwangahkiniedahr.
23Ke sohte meirongkihong ie meirong isihs en sihpw; kaidehkin ngehi me ke waunekihki omw meirong kan. I sohte katoutouwihekin uhk omw mehn meirong kan, de kapwunodehkin uhk ei pekipeki meirong en warpwohmwahu.
24Ke sohte pwainohng ie warpwohmwahu, de kaperenehkiniehda wihen noumwail mahn akan. Ahpw ke katoutouwihkin ie dipomw kan, oh kahngiangihkiniehda sapwung kan me ke wiadahr.
25Eri, a ngehi, iei Koht me kin kupwur mahkihong uhk dipomw kan; I ahpw wiadahr met, pwehki eh ngehi iei ngehi. I sohte pahn kupwukupwure dipomw kan.
26Eri, kitail ketila oh uh mwohn mwoalen kopwung; ke ahpw kasalehda omw iren kadip! Kasalehda audepen omw repenpwung pwe ke en kadehdehda ma kowe me pwung!
27Omw pahpa kahlap en nin tapio dipadahr; omw sounkaweid en kawa ko pil dipadahr mwohi.
28Omw kaunen kawa ko kasaminelahr ei wasa sarawio. Ihme I mweidkihong Israel en ohla laud, pwe nei aramas akan en sarohdi oh namenekla.”
