1Kamahire doṉo la, se Zihova, sa Tamasa Tadi na Qeto Minate, si nama pude vagi pania koe Zerusalema meke Ziuda sari vinari tokae meke vinari poni tadi na tie, doduru vasina pu mae guadi sari ginani meke kolo,
2sari dia varane meke dia tie varipera, dia tie varipitui meke dia poropita, dia tie matemateana meke dia tie totoli,
3dia palabatu koasa qeto minate meke palabatu vasileana, dia palabatu qavuna, matazoṉa pa tinavete lima, meke tie vakuvakutae.
4Zama se Zihova, “Na koburu kote poni ni Arau pude na dia koimata; na koburu mo pude qavuna ni.”
5Sari tinoni si kote vari ṉoṉovali teledia, keke tie kote ṉovalia si keke tie, na turaṉana kote ṉovalia si keke turaṉana. Sari tie vaqura kote razai sari tie koadi, sari tie kaleadi kote korodia luli sari dia palabatu.
6Keke tie si kote harupu vagia si keke ari tasina pa vetu tanisa tamadia, meke zama, “Agoi si ari mua poko hade, agoi mamu tuturaṉa koa gita; mamu kopu nia sa vasileana ta huarana hie!”
7Ba koasa rane asa si kote olaṉa si asa, “Arau lopu boka salaṉia sa ginugua hie. Arau loke qua poko na ginani pa qua vetu. Lopu va koimata au koari na tie hire.”
8Ura, Zerusalema si tubarae nia, meke Ziuda si hoqa nia. Sari dia zinama si va karikari la koe Zihova, va ekeki si arini pa Kenuna.
9Sa dinoṉo mo pa isumatadia si va sosode puleni; va dodogoro ni rini sari dia sinea gua ari tie pa Sodomu; lopu podekia rini pude tomei. Ke kote kamoi tinasuna si arini! Teledia mo va tutuvu puleni sa tinasuna.
10Tozi ni sarini pu toṉoto sapu kote leana mo si arini, ura, kote hena valeani rini sari vuadi ri dia tinavete.
11Ba sari tie kaleadi si kote kamoi tinasuna! Kaqu vagia rini vuana sapu tavete lani rini koari votiki tie.
12Ari na tie vaqura ṉovali sari Qua tie, meke ari barikaleqe na koimata ni si arini. Gamu na qua tinoni, ari mia tie tuturaṉa, si ta turaṉa va seu gamu; garunu gamu rini pude lulia sa siraṉa seana.
13Zihova si habotu pa Nana habohabotuana pa vetu varipitui; gasa turu si Asa pude pitui sari Nana tinoni.
14Zihova si podalae pitui sari na palabatu na koimata koari Nana tinoni; “Gamu na ṉovalia sa Qua inuma vaeni; na likakalae tadi na habahuala si siṉi pa mia vetu.
15Na sa gua ke ṉoṉovali gamu sari Qua tinoni meke luli mia hiniva koa rini pu habahuala?” isana gua si zama vura nia sa Baṉara, Zihova Tadi na Qeto Minate.
16Zama se Zihova, “Va titie hola sari na barikaleqe pa Zaione, va gelegele rua pana ene lamae si arini, sari mata dia si liṉana hata tie pude roroi gua, sari inene si vari tatai meke va doṉodoṉo lea gua, meke sari na hokata vinasari pa tuṉutuṉu nene si vevevehe kumana.
17Gua ke kote la se Zihova meke va kamo ni tubu sari batudi rina barikaleqe pa Zaione; kote la se Zihova meke va golu beo i sari batu dia.”
18Koasa rane vinari pitui asa si kaqu saputu pani e Zihova sari doduru tiṉitoṉa vina titie tadirini: sari hokata pa tuṉutuṉu, pusi batu, paku sivara;
19sari vikulu taliṉa, hokata pa lima, meke poko paere isumata;
20sari poko vinasari pa batu meke seni pa nene, poko pusi pa kopete, lumu humaṉa lea, na dia vina roro;
21sari na riṉi pa kakarutudi meke pa isudi;
22doduru poko tolavaedi, poko gele, poko korapae, poko hake ulue, meke huneke vovoina poata;
23meke sari qelasi tiroana, poko maramara, haqese, toropae patu ṉedala, meke sari hadehade batu.
24Kote humaṉa hikare si arini, meke lopu humaṉa lea; na iku si pusi pa kopete meke lopu na poko; na golu batu meke lopu na kalu doṉo lea; na poko baika meke lopu na poko tolavaedi; na kinurekure meke lopu na dinoṉo lea.
25Sari mua tie si kote mate pa vedara, sari mua varane si kote mate pa vinaripera.
26Sari na sasada koasa goba pa Zaione si kote lukalukana meke kuliusu; kote guana barikaleqe dododohona meke habotu pa pepeso sa vasileana.
