Isaías 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹¡Ricay-llapa! Munayniyoj Tayta Diosmi Judá nasyuntawan capitalnin Jerusalenta cachayconga. Micuytawan yacutapis apacongami.

²Chaynöpis manami canganachu jinyu runacuna, pillyay yachajcuna, juezcuna, profëtacuna, musyacojcuna, mayur runacuna,

³mandaj capitancuna, mas rispitädu runacuna, tantiyachejcuna, sumaj yachajcuna, brüjucunapis.

⁴Nircorga mana yachaj wamracunallatanami mandajnin cananpaj churapanga.

⁵Chaura runacunaga rimanacullarnami goyangapaj. Chaymi jucnin-jucnin amïgu carpis jucwan-jucwan chiquinaconga, pillyanga. Mösucunapis auquincunata mana rispitar chiquicarcärenga. Pobricunapis rïcucunata chiquicarcärenga.

⁶Chayno captinnami juc runaga papäninpa wasincho wauguinta nenga: «Gampaga caycanrämi röpallayquipis jaticunayquipaj. Nogacunapa mandajnë cay ari. Mana alli goyarcaycajta jorgamay.»

⁷Chaura wauguenga nengapaj: «Fiyupa mana allicho caycajtaga ¿imanöpataj gamta jorgöman? Nogapaga manami canchu micuynëpis ni röpäpis. Ama churamaychu cay marcapa mandajnin canäpäga.»

⁸Rasunpami Jerusalenga juchonga. Judá nasyunnami pasaypa mana allicho ricaconga. Chaynöga canga munayniyoj Tayta Dios nishanta mana cäsushpan llutancunata rurashanpitami, Tayta Diospa contran mana allicunata rimashanpitami.

⁹Juchata rurashancunaga alayrimi musyacaycan. Juchata rurashancunataga manami pacanchu. Sodoma runacunapaj mayacashannömi may-chaymanpis mayacaycächin. ¡Ay imanöraj canga paycunaga! Quiquincunallami castigasha caytapis ashircaycan.

¹⁰Alli runacunatami ichanga ima rurashallanpis alli llojshipanga. Allita rurashanpitami alli cawanga.

¹¹¡Ay imanöraj canga juchasapacuna! Paycunataga imatapis rurashanman-tupumi Tayta Dios cutichenga.

¹²Marca-masëcuna, wamracunallami llutanta ruraycächishunqui. Mandajniquicunapis warmicunallami caycan. Mandajniquicunallami engañaycäshunqui. Llutantami ruraycächishunqui.

¹³Tayta Diosga acrashan runacunata dimandananpänami caycan. Paycunata juchanpita jusgananpänami caycan.

¹⁴Tayta Diosmi arriglananpaj gayachishpan dimanducho arriglajcunatawan mandajcunata nenga: «Gamcunami übas wertäno caycajcunatapis illgächishcanqui. Pobricunatapis suwapashcanqui. Suwacushayquicunatanami wasiquicunaman juntaycächinqui.

¹⁵¿Imanirtaj chaynöga acrashä runacunata ñacaycächinqui? ¿Imanirtaj pobricunata ñacachishcanqui?»

¹⁶Mastapis Tayta Diosga nin: «Sión warmicunaga fiyupami alli-tucun. Ñuquiycachaycar guepishtaycachar-raj purinpis. Chaquinman watacushancunata suynachinanpämi jinallanman jinallanmanraj japaycunpis.

¹⁷Chaypita castigashpämi umantapis garachuwan galayächishaj. Llapan runa ricaymi gala-umalla purenga.»

¹⁸Chay junäga Tayta Diosmi ushajpaj illgächenga warmicuna camaränanpaj jaticunancunata: chaquincho camarächinanpaj caj shall-shallyajcunata, vinchancunata, coröna-niraj adurnuncunatapis,

¹⁹wallgacunata, brasalëtancunata, uman shucutancunata,

²⁰uma adurnuncunata, chaquinman churacunan brasalëtacunata, chegllanman watacunan sintillucunata, pömuwan perfümicunata, surtipaj charashancunata,

²¹surtïjacunata, camaränanpaj senganman jaticunancunata,

²²cuyayllapaj alli röpacunata, jacucunata, pañuylucunata,

²³espëjucunata, fïnu tëlacunata, uman shucutacuna tëlacunata, mantïllacunata.

²⁴Chay junäga perfümipa ruquin canga melanaypaj asyayllami. Chegllantapis watacongapaj wascawannami. Cuyayllapaj ñajchasha cananpa ruquin ajchaynaj gala-umami cangapaj. Alli röpacunata jaticunanpa ruquin jaticongapaj gachga röpatami. Cuyayllapaj gagllan cananpa ruquin cangapaj wayllasha fyërruwan rupachishami.

²⁵Jerusalencho tiyaj ollgu cajcunaga llapanmi guërracho wañonga. Guërrachömi pillyay yachajcunapis ushacanga.

²⁶Siudächo caycajcunaga wagar llaquicur lütu röpata jaticongapaj. Mana pipis washaptinmi llaquicur allpaman jamacongapaj.