ESAII 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Ti Yiɛ̀ nKuyie Mpɑkɛdɑɑ yóó dɛitɛmu dɛ̀ɛ̀ te kɛ̀ Sedisɑdɛmmu kɔbɛ nɛ̀ Sudɑɑ kɔbɛ kɛ̀ bɛ̀ fòù, bɛ diitì nɛ̀ bɛ niɛ nnɛ̀ bɛ̀ tɑ̃́ dɛ̀ dɛ̀ɛ̀ tu:

²Bɛkpɑ̀rìnuɔmbɛ nɛ̀ bɛhɑ̃ɑ̃pɔ̀nkperíbɛ̀ nɛ̀ bɛbeémbɛ̀ nɛ̀ bɛ̀ɛ̀ nɑ̀ɑ́ Kuyie mpɑ̃ɑ̃nɑ́ɑǹtì bɛ̀ɛ̀ tu bɛdiɛbɛ̀ nɛ̀ bɛkotibɑɑbɛ̀.

³Bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ nɛ̀ sikpɑ̀ɑ̀tìbìí nɛ̀ bɛhɛikɛ̀nkótíbɛ̀ nɛ̀ bɛnitinɔ̀ndiɛbɛ̀ nɛ̀ bɛtediibɛ̀ diɛbɛ̀.

⁴N yóó duɔ́ nkɛ̀ idɑpùmbí iì di bɑɑtɛ́, kɛ́ ndi dɔɔri ì dɔ́mɛ̀.

⁵Di botí miɛkɛ, di bo nkɛ̀ fɛ̃́ũnko ditɔbɛ̀ onìtì bo nfɛ̃́ũnko o kou, kòo bíɛ̀ nni nfɛ̃́ũnko tɛdɑkótɛ̀, bɛsĩ́ntɛ́nìtìbɛ̀ bo nfɛ̃́ũnko bɛnitimɔ́mmɔmbɛ.

⁶Onìtì níí bo pĩ́ nho tebitɛ bɛ cicɛ cĩ́ɛ̃̀tɛ̀ miɛkɛ kóò nɑ̀kɛ́ kɛ dɔ̀: A mɛ̀ nkpɑɑ́ mɔkɛmɛ̀ diyɑɑ̀bòrì, nɑɑ́ nti kóo kpɑ̀ɑ̀tì, bɑɑtɛ́ kubotí kùù í mɔkɛ okpɑ̀ɑ̀tì.

⁷Kɛ̀ dɛ yiɛ̀ nhò bɑ̀ɑ̀ní kɛ dɔ̀: N yí tú otɑ̀ntì, n yí mɔkɛ mudiì n cĩ́ɛ̃̀tɛ̀, m mɛ nyí mɔkɛ diyɑɑ̀bòrì di bɑ́ n dɔɔ̀ okpɑ̀ɑ̀tì.

⁸Sedisɑdɛmmu kɔbɛ bètɛ́mu, Sudɑɑ kɔbɛ domu. Bɛ nɑ́ɑǹtì nɛ̀ bɛ dɔɔ̀rìmɛ̀ kɛ̀ dɛ̀ yóù Kuyie. Bɛ̀ yetɛmu ti Yiɛ̀ nKuyie nkɛ kù fuonnɛ̀ kunku Kuyie nkperíkù kɛ̀ dɛ̀ feío.

⁹Kɑ̀ɑ wèńtɛ́ bɛ ììkɛ̀ ɑ pɑ̃̀nkɛ ɔ̃ɔ̃ yɑ̀mu bɛ yetɛ́mɛ̀ bɛ fei mbɛ yɛi mmɛ Sodɔmmu ɛì kɔbɛ kɔ̃mɛ, Ifɛi í bɛ̀ bonɛ̀ mɛyɛi mbɛ̀ dɔ̀ɔ̀ri mɛ̀. Bɛ̀ bo yɑ̀! Bɛ̀ ce mbɛmɑ́ɑ̀ ndi mɛyɛi.

¹⁰Di bo yĩ́ wèè yìé nKuyie nkpɛti, weè tu diwɛ̀ì yiɛ̀ nkɛ yɛ̃́ ò yóó dimɛ̀mu, o tɔ̃mmú kó ticɔ̃nti.

¹¹Bɛyɛibɛ bɛ̀ɛ̀ dɔ̀ɔ̀ri mɛyɛi, mbɛ̀ bo yɑ̀! Bɛ̀ yóó bɛ̀ yietí bɛ dɔɔ̀rìmɛ̀ dòmmɛ̀ mmɛ.

¹²Mí nKuyie n kó bɛnìtìbɛ̀, ibí iì bɛ̀ bɑkɛ́, bɛnitipòbɛ̀ bɛɛ̀ bɛ̀ ni. Bɛ̀ɛ̀ bɛ̀ ni bɛ̀ bɛ̀ fétìnkomu, kɛ bɛ̀ kɔɔ́ mbɛ̀ kèrí kùù cɛ.

¹³Ti Yiɛ̀ nKuyie nyìtɛ́ kɛ còḿmúmu kɛ sɛí nku kɔbɛ, kù ìtɛ́ kɛ còḿmúmu kɛ bo bekɛ́nɛ̀ yɛbotɛ̀.

¹⁴Ti Yiɛ̀ nKuyie nkpɑ̀nnɛ̀mu bɛ̀ɛ̀ tu bɛkótíbɛ̀ ku kɔbɛ miɛkɛ nɛ̀ bɛkpɑ̀ɑ̀tìbɛ̀ kɛ tú: Díì mɑɑnko fínyĩ̀ kó yɛbɛ kɛ fèkɛ bɛsénnìbɛ̀ kpɛrɛ kɛ píɛ ndi cɛ̃́ĩ.

¹⁵Nɛ̀ ɔ̃̀mmu wɛ̃rímú mmu di fɛ̃́ũnkomɛ̀ n nìtìbɛ̀? Kɛ nɑù bɛsénnìbɛ̀? Mí ndi Yiɛ̀ nKuyie Mpɑkɛdɑɑ míì tì ndi békú.

¹⁶Kɛ̀ ti Yiɛ̀ nKuyie mbɛ́i nkɛ dɔ̀: Sedisɑdɛmmu kó bɛnitipòbɛ̀ mɔ̀kɛ sifeí nsi kɛ ɔ̃ nkérí kɛ́yíéo, kɛ tú pìì bɛ̀ wèímɛ̀, kɛ nɑù dɛtɔ́ɔ́nnɛ̀, kɛ̀ kɔnnìnko bɛ nɑɑ̀cɛ̀nɛí.

¹⁷Nɛ̀ dɛ kpɛ́í mmí ndi Yiɛ̀ nKuyie m bo fɔ̃ri bɛ yùtì, kɛ́ bɛ̀ còńnɔ́ɔ mɛyùbii.

¹⁸Dɛ yiè bo tuɔkɛ dìì yiè mí ndi Yiɛ̀ nKuyie m bo dɛitɛ di sɑ̃tì. Bɛ nɑcɛ̀nɛí kó dɛmɑ́mɑ́nnɛ̀ nɛ̀ dɛ̀ɛ̀ boú bɛ yùtì nɛ̀ sinɛí dudúúnsì nɛ̀ mɛdɛ̀ì.

¹⁹Yɛtootɔ̃rɛ nɛ̀ sinɛí nɛ̀ ifɑ́tíyì.

²⁰Tiyɑɑ̀bomboúntì nɛ̀ sinɑcɛ̀nɛí kó dɛmɑ́mɑ́nnɛ̀ nɛ̀ inɑɑkũ̀ɔ̃ nɛ̀ tùdɑ̀ɑ̀ríbɛ̀ kó yɛdíè nɛ̀ mɛfĩmmɛ,

²¹nɛ̀ dɛmɑ́mɑ́nnɛ̀ nɛ̀ dɛ̀ɛ̀ tũɔ̃̀ yɛwũɔ̃̀.

²²Tiyɑɑ̀kpetì nɛ̀ yɛyɑɑ̀bòrɛ̀ pɛ̃kùyɛ̀, tiyɑɑ̀bomboúntì nɛ̀ tidɔutì.

²³Siwéi nɛ̀ mupɑ̀ɑ̀konkperímù kó tiyɑ̀ɑ̀tì tìì iri nɛ̀ tiyɑɑ̀yɑuti bɛ̀ dɑɑti tì yɛyɔ.

²⁴Dɛ yiè tùdɑ̀ɑ̀rí bo ceetɛ́ kɛ́ɑ̃nnɛ́ kunɔ́ú, bɛ̀ bo yi iwɛ̃ĩ inɑɑkũ̀ɔ̃ ntɛ̃mɛ̀, bɛ̀ bo kuó iyùpɑ̃ɑ̃tí kɛ́yóu mɛyùbii, kɛ́yóu tiyɑɑ̀sɑ̀ɑ̀tì kɛ́yi tifɔ̀ɔ̀tɔ̃̀ntì kɛ̀ bɛ wennikuu nɑɑ́ nkuhɑ̃ɑ̃tɔ̀ntɔ̀nkù kó kufíɛ̀kù.

²⁵Sedisɑdɛmmu, ɑ kó bɛnitidɑɑbɛ̀ yóó kú mudoò miɛkɛ nkɛ, bɛhɑ̃ɑ̃pɔ̀nkperíbɛ̀ iwɛ̃ĩ yɛmbɛ̀ í kũntiní mudoò.

²⁶Sedisɑdɛmmu nìtìbɛ̀ bo nkɑri o ɛì kó yɛbòrɛ̀, kɛ kuɔ̀ nyɛkúdɑbùò. Bɛ̀ bo pɑɑ̀ bɛ bí kɛ́nkɑri mutɑ̃́ɑ̃́ mmiɛkɛ kɛ kuɔ̀.