Isaias 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Pemineg kew! Egkuwaan te Nengazen, sikan is Mekeǥeǥehem he Nengazen, is langun he edseriǥan te menge etew ziyà te Jerusalem wey Juda: is keenen dan wey wahig,

²is menge bentuǥan he menge etew, is menge sundaru, is menge zatù, is menge ebpeneuven, is menge menenagnà, is menge edumala,

³is menge pengulu te menge sundaru, is menge dungganen he menge etew, is menge sumesambag, is memetau he menge selemengkiru zan, wey menge veyilan.

⁴Ibpezizalem sikandan te Nengazen te ǥehem te menge vetan-en.

⁵Edluplupiǥen te kada sevaha he etew is iring din he etew. Is menge vatà edsukul te menge meǥurang, wey edsukul zaan is menge egkaayuayu te menge dungganen.

⁶Dutun he timpu ebeyaan te sevaha he etew is kezuzumahi zin ne egkeǥiyan din te, “Tenged te meupiya pa is bisti nu, ne iyan ke en pengulu kenami kayi te timpu he nevengkag is lugar tew.” Piru egkaǥi haazà te, “Kenè ku sikiyu egketevangan. Wazè man ganì egkekaan wey igkevisti te pemilya ku, umbe kena a keniyu himuwa he pengulu.”

⁸Kenà duwazuwa he egkezeetan is Jerusalem wey is Juda, tenged te iyan dan ebeelan wey ebpengeǥiyen is igkeepes te Nengazen. Wazè dan mebpezizalem te zekelà he keǥehem te Nengazen.

⁹Is dagwey zan midtistiǥus te ebpekesuǥat kandan. Utew keladu is kebaal zan te salà iring te mibeelan te menge tig-Sodom. Wazè dan heini ieles. Mekehizuhizu sikandan! Iyan dan mismu mid-uwit te kandan he kezeetan.

¹⁰Keǥiyi niw is menge metazeng te meupiya is ukur zan, su egkeraǥun dan is beǥas te meupiya he menge vaal zan.

¹¹Piru mekehizuhizu mulà is menge lalung, su ebpekeuma ziyà te kandan is bangkit. Ebelesan sikandan tenged te menge vaal zan.

¹²Migkaǥi is Nengazen te, “Edèdaaǥen te menge vetan-en is menge etew ku. Iyan ebpengulu kandan is menge vahi. “Sikiyu is menge etew ku, edtezinen kew te menge pengulu niw. Diyè kew zan ibpeikul te kenà hustu he zalan.”

¹³Andam en is Nengazen he edhukum te menge etew zin

¹⁴Edhukuman din is menge ebpemendumala wey menge pengulu te menge etew zin. Iyan heini sumbung din kandan, “Midezeetan niw is pemuleey ku te paras he iyan is menge etew ku. Nepenù is menge valey niw te menge azen he mibpenguwa niw ziyà te menge pubri.

¹⁵Maan is edèdaaǥen niw is menge etew ku wey edresayen niw is egkengaayuayu?” Iyan heini migkaǥi te Nengazen he MEGBEVAYÀ he Mekeǥeǥehem.

¹⁶Migkaǥi pa is Nengazen te, “Gelbuwen is menge vahi ziyà te Jerusalem. Henduen be te hentei sikandan emun edhipanew zan wey edtitikes sikandan te menge elahas. Ne emun edtengteng sikandan ne ebpezumahan dan te kebpengendat.

¹⁷Umbe, ibpemezeǥes ku is ulu zan, ne egkeupew sikandan.”

¹⁸Dutun he timpu egkuwaan te Nengazen is menge elahas diyà te menge paa zan, ulu zan, wey lieg dan.

¹⁹Egkuwaan daan diyà te kandan is menge eritis dan, rintì dan, lambung dan,

²⁰tengkulu zan, elahas dan diyà te velad, bagkes dan, pehemut dan, wey hinepetan dan.

²¹Egkuwaan pa is menge sising dan diyà te tezù dan wey ziyà te izung dan,

²²is mahalen he menge visti zan, apid te visti, samput, kahita,

²³peǥelungan, bisti he linu, tengkulu, wey tezung.

²⁴Kenè en hinuun sikandan ebmehemut, kekenà, ebmemahù dan. Pisì dà is bagkes dan, ne ed-upawan is meupiya he vulvul zan. Is mahalen he menge visti zan ed-ilisan te saku, ne egkaawà is kekempet dan.

²⁵Epemematey tenged te tebek is menge maama ziyà te Jerusalem minsan is memevurut he menge sundaru zan.

²⁶Duen edlalew wey ebpemenineǥew ziyà te menge pultahan dutun te inged. Ne haazà is inged egkeiring te vahi ha nekezuzungul ziyà te tanà he nahanew is langun he azen din.