1Isaías Jerusalén-dulemarga, degi, Judá-dulemarga sogded: “¡Nue bogi be an itomalo! Bab-Jehová-Bela-Gangued-Nikadi Jerusalén-neggweburgi, degi, Judá-yargi, bela ibmar-nabir-gullemalad obelogoed: Bela masgullemalad, bela gobedmarse-bakale, obelogoed.
2Bab-Jehová, bela we-dulemala, Jerusalén-neggweburgi, degi, Judá-yargi, osulogoed: Bela dule-gandikmalad, bela dule-bila-onomalad, dule-igar-nabomalad, e-gayaburba-barsogmalad, dule-ibmar-guoedgi-iduakwaa-sunmakmalad, girmar-dummagan,
3sorda-bila-onomalad-e-idumalad, dule-nug-nikamalad, dule-binsaed-dakmalad, galagwensuli-ibmar-sobmalad, degine, dule-burgwismaladse-gabgin-ibmar-egismalad, wemar, bela obelogoed.”
4Bab-Jehová soged: “An negsemalaga, sapingana urboed. Dule-dummaganga-gumalaga, masmala-ibmar-abes-abesdamalad urboed.
5Dulemar na muchub-muchub sabsur-imakdemaloed: Dule e-neg-dikarba-maidbo, na abin-abin nagudmaloed. Sapingwa, dador-sarsodoed. Dule-binsaled, dule-nug-nikadbo na sabsur-imakdemaloed.
6”Dule-gwensak e-bab-neggi e-gwenadga sogdagoed: ‘Ar bedi mor-nued-ise-nudakar be yoisoggu, we-neg-gagalenaid nudake, be anmar-dummadga gue.’
7Geb e-gwenaddi e-abin sogdagoed: ‘An nersuli. Ar an-neggi mas sated, morbela satebalid. Melle neggwebur-dummadga-guega be an-imake.’ ”
8Ar Jerusalén-neggwebur nue-bergus mellesiid, Judá-yar nue-oitoles naid. Ar e-sunmakedi, e-ibmar-imakedi, Bab-Jehováʼgi ise-yolegaled. Amarde, Bab-Dummad-e-gangued-yeerdakleged bai daksulid.
9E-ichakwadamaladgi na dukin e-daed barsoged. Sodoma-dulemar-isgusadyobi, e-isguedgi bule-bule-gudiid odukusurmalad. ¡Emar na dummad-wilesmar! Na dukin sabsur-odurdaklegega gunanaid.
10Dule-napira-nanadiidga be sogmalo, “bega ibmar nueganbi guoye.” Ar na e-arbadiidgi nue-ibmar nikuoed.
11¡Dule-isgana, be nue-wiles! Ar bega ibmar-nuegan guosulid, ar be-arbasadgi na be odurdaklegoed.
12Bab-Jehová sogbalid: “¡An-dulamar, be nue-wilesmar! Sapinganse mesagwar-gudimalad, Omegan ega dummadga-negdakmamaid. ¡An-dulamar, be nue-wilesmar! Ar dule-be-idumaladi begi dododimalad, ar igar-isganaba be-nidimalad.”
13Bab-Jehová, e-dulemarga-igar-nabogega, gwichigudasokalid. Dulemar-sabsur-odurdakega, gwichigudasokalid.
14Bab-Jehová, girmar-dummagangi, degi, dummagan-negsemamaidgi, gwichigudasokalid. Bab-Dummad ega weyob sognonikoed: “Ar bemar uva-nainu-naid bela obelosmalad. Be-negyagi dule-wilemalad-ibe-be-ibmar-atursasmalad bukwad.
15¿Doa bega sogsa, an-dulamar mesagwar imakmaloye? ¿Doa bega sogsa, dule-wilesagwar-gudimalad be wiomaloye?”
16Bab-Jehová weyob sogbalid: “Omegan-Sión-yalaginmalad san-bule-bule-imakmaladi, emargi-obine-itogedba bule-bule nanamalad. A-omegan dule-mesagwale dakdaed. San-bule-bule-imakedba, e-maligi ibmar-nanaid-ogolegala, yamo nag-bana-bana nadapdamalad, adi, e-ibmar-maligi-naid-goled itomalagar.
17A-ulale, ani, omegan-Sión-yalaginmalad-e-nonogi, boni-yaa-dummagan yaisur-nikuega imakoed, an bela amar-nono swana imakoed.”
18A-ibagine, Bab-Jehová, we-ibmarmar osulogoed: Maligi-ibmar-nagumalad, bebegi-ibmar-nasiklemalad, morgi-ibmar-nasiklemalad.
19Bela dukargi-ibmar-nasiklemalad, sakwagi-ibmar-nasiklemalad, muswe-wagar-odukumalad.
20Dunwemar, maligi-ordubyob-ibmar-nasiklemalad, saderba-mordub-atillemalad. Ina-wawagan-nuegan, olargan-matar-dummagan,
21olarganmar, olasumar.
22Ibagi-mor-yoleged-gargerbamalad, mor-dummagan, mor-suigan, mor-sakwa-metegana.
23Isbe-wagar-dakmalad, lino-mor-nued, mor-obipirmakar-nonogi-silemalad, degi, dukarba-biar-mor-nasiklemalad. Bela e-ibe we-ibmarmar osulolegoed.
24A-ibagine, ina-wawadikidbi-yapannedi, nunu-yapanne naoed. Saderba-mordub-atillemalad-muchubbi, saderba gasdub nasikdemaloed. Ise-gwialed-muchubbi, sailagia-sate gumaloed. Ibagi-mor-gargerbamalad-yoleged-muchubbi, wilegedba mor-yaara-dakle yodmaloed. Wagar-yeerdakleged-muchubbi, bingedar-dakle itodmaloed.
25Be-machergan es-suidgi oburgwiledmaloed. Be-dule-bulegan bila-onolenaidgi oburgwiledmaloed.
26Bela dulemar ogormakdemaloed, burgwed-ibagi-mor-yoleged yodmaloed. Neggwebur bela olloo dakle nadoed.
