Pakanemo 1

1

2

3

4

6

7

8

9

11

12

13

14

15

16

17

18

19

21

22

25

26

28

35

37

39

40

41

42

45

46

48

49

50

¹Pakanemo Maimaituwa mala bi dobu i waitubudi.

²Wala dolinemo dobu geḡa mote i laumaḡata mai niganana ta kitakitana bi boimatuwa taunaḡa. Bi Maimaituwa Aluwina topa dabanemo i waidagudagu.

³Bi Maimaituwa i giuna gado, “Yana ku tubuḡa.” Bi yana i tubuḡa.

⁴Maimaituwa i kita te i visu bi ḡome yana bi dudubala i dailidi.

⁵Yana i wai isana laḡan bi boimatuwa i wai isana dudubala. I dudubala bi laḡan i sako, niga laḡan pakana i waitubu.

⁶Bi Maimaituwa i giuna gado, “Sawasawa ku tubuḡa bi gauba noke galewemo bi nove dobumo kwa wabaḡavukidi.”

⁷Kamaina bi Maimaituwa sawasawa i voiye te gauba dabana bi dibuna edi wabaḡavuka. Bi mainana i tubuḡa.

⁸Maimaituwa wabaḡavuka i wai isana, galewa. I dudubala bi laḡan i sako, niga laḡan wailabuna.

⁹Kamaina bi Maimaituwa i giuna gado, “Gauba galewa dibunemo ko nato gabu ḡemota bi dobu ḡasaḡasalina ya laumaḡata.” Bi mainana i tubuḡa.

¹⁰Bi Maimaituwa doḡa ḡasaḡasalina i wai isana dobu bi gauba i wai waiḡemotina i wai isana nisa bi Maimaituwa i kita te i visu.

¹¹Bi kota Maimaituwa i giuna gado, “Doḡamo ḡawaḡawa, pesi poudimo bi banidimo dugedugedi bi kai votevotemi tabudi bi tabudi ko tubuḡa.” Bi mainana i tubuḡa.

¹²Kamaina bi doḡamo ḡawaḡawa, pesi banidimo bi poudimo dugedugedi bi kai votevotedi kitedi tabudi bi tabudi a duga. Bi Maimaituwa i kita te i visu.

¹³I dudubala bi laḡan i sako. Niga laḡan wai faionina.

¹⁴Bi Maimaituwa i giuna gado, “Yanayana galewemo ko tubuḡa te laḡan bi dudubala ko dailidi. Bi sa noya te sauga, laḡan bi kwalabu ani luvedi.

¹⁵Bi yanayana galewemo ko yana bi dobu ko laiyana.” Bi mainana i tubuḡa.

¹⁶Maimaituwa yana nananakidi labu i voiyedi. Suwala laḡan yai badaye bi nawalai dudubala yai badaye bi kota kipola vaitedi i voiyedi.

¹⁷Maimaituwa galewemo yana i wai dubudi, te dobu sa lai yana.

¹⁸Tedi laḡan bi dudubala sa dailidi bi sai badayedi. Bi Maimaituwa i kita te i visu.

¹⁹I dudubala bi laḡan i sako. Niga laḡan wai 4-na.

²⁰Bi Maimaituwa i giuna gado, “Mwali yawayawasanidi nisa koi wanavu bi mwanuwa sawasawa koi wanavu.”

²¹Tana iyana nananakidi bi keikeilikidi bi mwali matabudi nisamo miyemiyedi kitedi tabudi bi tabudi bi mwanuwa poupou dabalalidi kitedi tabudi bi tabudi i voiyedi. Maimaituwa i kita te i visu.

²²Tana mwali matabudi nisamo miyemiyedi i kavisuvisudi bi i giuwedina gado, “Koi natuna dabalala te nisa koi wanavu bi mwanuwa dobumo ko pou dabalala bi dobu koi wanavu.”

²³I dudubala bi laḡan i sako bi niga laḡan wai 5-na.

²⁴Bi Maimaituwa i giuna gado, “Ḡamoḡamo yawayawasanimi tabumi bi tabumi, gunuwala ḡamoḡamomi, malamalaḡamimi bi ḡamoḡamo daledalemi dobumo ko tubuḡa.” Bi mai i tubuḡa.

²⁵Mba mainana gunuwala ḡamoḡamodi, malamalaḡamidi bi ḡamoḡamo daledaledi tabudi bi tabudi i voiyedi. Maimaituwa i kita te i visu.

²⁶Bi kota Maimaituwa i giuna gado, “Niganana lava ta voiyedi kitedi mai tada. Te tedi iyana, mwanuwa, ḡamoḡamo bi ḡamoḡamo daledaledi kitedi tabudi bi tabudi dobumo sai badaedi.”

²⁷Lava i voiyedi kitedi mai tana. Tedi oloto bi waivini a voiyedi.

²⁸Maimaituwa i kavisuvisudi bi i giuwedina gado, “Koi natunatuna bi dobu koi wanavu bi koi badaye. Iyana, mwanuwa bi mwali matabudi yawayawasanidi dobumo koi badaedi.”

²⁹Bi Maimaituwa i giuna gado, “Tagu kai votevotedi pesi bi kani e voiyedi aubaimi.

³⁰Mwali miyemiyedi matabudi, mwanuwa bi gunuwala ḡamoḡamodi tedi kediya ba kailugulugu bi kai votedi.” Bi mainana a tubuḡa.

³¹Maimaituwa mwali matabudi i voiyedi bi i kitedi te a visu kauwa. I dudubala te laḡani i sako. Niga laḡani wai 6-na.