Fufua 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Dameŋ fufuŋkenao Anutuzi sambâŋ â mâreŋ bâfuac‐jofawec.

²Ehame mâreŋ e sisifucne â tacne fowec, â ʒâkâŋ ʒora duŋdapâczi foŋkewec, ehame opâ faicko Wofuŋte Mârozi teŋ hâmorâ rac warec ewec.

³Eme Anutuzi ʒiŋuc muwec: “Tamaeoc!” Mume tamaewec.

⁴Eme Anutuzi tatamac honeme biaŋkeme tatamac â dapâc bâtâc bacjofawec.

⁵Ehuc tatamacte ʒâŋe ʒoaŋ â dapâcte ʒâŋe ŋafe mujactewec. Iŋuc eme hae ŋaferâ fureme ʒoaŋ 1 tarawec.

⁶Tarame Anutuzi ʒiŋuc muwec: “Opâ ŋondeŋko aka sanaŋ moc fuaoc, ehuc izi opâ bâtâc bazejec.”

⁷Iŋuc mume opâ ŋondeŋko aka sâko fuarâ izi opâ bârâwiŋneme tâcnerâ faic moc ewec â juwic moc ewec.

⁸Iŋuc fuame Anutuzi aka irec ʒâŋe sawa muwec. Eme hae ŋaferâ fureme ʒoaŋ 2 tarawec.

⁹Tarame Anutuzi ʒiŋuc muwec: “Sambâŋ rurumaŋnao opâ mockoa qâzuckepie kereŋnezi fua tâcneoc!” Mume iŋuc fuawec.

¹⁰Eme Anutuzi kereŋne irec ʒâŋe mâreŋ muwec â opâ ʒâkâŋ sâko irec ʒâŋe hâwec muwec. Eme honeme biaŋkewec.

¹¹Eme Anutuzi muwec: “Mâreŋte faio wiac fofone i âkeʒurâ wefuoc! Nânâ monʒaŋ ʒariŋ wiac ukichec sasawa, â jâc wiac hândâŋ ukichec sasawa, iŋucne fuŋne fuŋne wefunʒepieŋ!” Mume iŋuc hâcne fuawec.

¹²Mâreŋzi âke sueme nânâ monʒaŋ ʒariŋ wiac fuŋne fuŋne, ukic‐jeŋichec sasawa wefumbiŋ, â jâc fuŋne fuŋne fârihec â fârimaŋko ukic‐jeŋichec sasawa. Eme Anutuzi honeme biaŋkewec.

¹³Iŋuc eme hae ŋaferâ fureme ʒoaŋ 3 tarawec.

¹⁴Tarame Anutuzi ʒiŋuc muwec: “Sambâŋko ʒoctamac fua raniŋ. Jaŋe hâcne ʒoaŋ â ŋafe bâtâc bacjofanʒepieŋ, ehuc hoemaŋ â sâko ʒoaŋ, gie bapa â jara irec dameŋ mufua‐nârehuc doma ranʒepieŋ!

¹⁵Ehuc sambâŋte ʒoctamac erâ mâreŋ âke tamaenʒepieŋ!” Mume iŋuc fuawec.

¹⁶Anutuzi iŋuc ehuc ʒoctamac sâko jajahec bâfuac‐jofawec, kâcɋene moc e ʒoaŋko micne barâ juocte â kâkâcɋene moc e ŋafeo micne barâ juocte. Erâ wâc bâpiŋ mâmâc bâfuac‐jopawec.

¹⁷Jaŋe mâreŋ âke tamaeniŋte â ŋafe ʒoaŋ soŋaŋ‐jofahuc dapâc â tatamac bâtâc bacjofaniŋte Anutuzi sambâŋko hâcne râec‐jopawec.

¹⁸Eme Anutuzi honeme biaŋkewec.

¹⁹Iŋuc eme hae ŋaferâ fureme ʒoaŋ 4 tarawec.

²⁰Tarame Anutuzi ʒiŋuc muwec: “Opâ jaŋere maŋko opâ qowi fuŋne fuŋnezi fuarâ fusucmapie qiriŋ sâko fuazejec â wipe jaŋe sawao furuc furuc qahuc junʒepieŋ!” Mume fuawec.

²¹Anutuzi hâwec qowi sâko mako mecne â wiac jujune fuŋne fuŋne opâmaŋko qiriŋhec foŋgopieŋ, â wipe fakechec fuŋne fuŋne, iŋuc bâfuac‐joparâ honeme biaŋkewec.

²²Eme Anutuzi ʒiŋuc muhuc jambuŋ‐jopawec: “Ŋoŋe ukichec erâ sawe mâririackehuc opâ hâwec sâcke‐fârenʒepieŋ â wipe jaŋe mâreŋ faio sawenʒepieŋ!”

²³Iŋuc mume hae ŋaferâ fureme ʒoaŋ 5 tarawec.

²⁴Tarame Anutuzi ʒiŋuc muwec: “Mâreŋzi wiac jujune fuŋne fuŋne kiweckerâ rozejec, hae qowi â homa gisic â kâte qowi fuŋne fuŋne!” Mume iŋuc fuawec.

²⁵Anutuzi hae qowi fuŋne fuŋne â kâte qowi fuŋne fuŋne erâ homa gisic wiac fuŋne fuŋne iŋuc hâcne bâfuac‐joparâ honeme biaŋkewec.

²⁶Eme Anutuzi ʒiŋuc muwec: “Ajoc! Nâŋâc nâŋâcne hawarire sâcko ŋic bâfuac‐jopanaŋ! Jaŋe hâwec qowi â sawa wipe â hae qowi â kâte qowi sasawa erâ homa gisic wiac mâreŋko babarâ jueŋgopieŋ jaŋe ŋicwofuŋ ejarenʒepieŋ!”

²⁷Eme Anutu e hawari‐ticnere sâcko ŋic bâfuawec hâcne. Ŋic â ŋokac bâfuac‐jofawec.

²⁸Erâ jambuŋ‐jofahuc ʒiŋuc jasawec: “Ɋârichec ehuc fua sawec erâ mâreŋ ŋefusucmahuc ruckenʒepieŋ. Ehuc hâwec qowi â sawa wipe â mâreŋ qowi gisic wiac sasawa ŋicwofuŋ ejarenʒepieŋ!”

²⁹Anutuzi iŋuc murâ ʒiŋuc jasawec: “No monʒaŋ wiac ukic‐ticne tie raekac â jâcfâri nânâne ukic‐ticnehec ʒi râe‐ŋactekopac, izi nânâ‐ŋekic ezejec.

³⁰Â mâreŋ qowi â sawa wipe â homa gisic wiac nokafehec bâfuac‐jopakicne, jaŋere nânâ ine sopâc hofâ qinʒiŋ wiac râekopac.” Eme iŋuc fuawec hâcne.

³¹Eme Anutuzi wiac bâfuawec i hone‐fâreme biaŋne jâmbâŋ ewec. Eme hae mocwâc ŋaferâ fureme ʒoaŋ 6 tarawec.