Génesis 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Bab-Dummadi, gebe-negasailaunni, nibneg, napneg obinnisad.

²Deunni, napneg gwen nabir-daklesulid, neg olloo-dakleged, unnila dii-wilasailad-birgi negsichidbi naid. Bab-Dummad-Burbadi dii-birgi aibannaid.

³Geb degine, Bab-Dummad sogded: “Neg-meegwad nagu.” Agi, neg-meegwad nagunonikid.

⁴Geb Bab-Dummad dakded, neg-meegwad, ibnuedi. Agi, Bab-Dummad neg-meegwad, negsichid-ebo bachikii imaknonikid.

⁵Bab-Dummad neg-meegwad ibginedye onug-imaksad. Negsichiddi mutikidye onug-imaksad. Weyob neg osedosad, geb neg oibosbalid. Deyob, ibagwenadgi neg gusad.

⁶Geb degine, Bab-Dummad sogdebalid: “Neg-ollor-dummad nagu, adi, diimar bachikii naguegar.”

⁷Deyobi, Bab-Dummad neg-olloled-dummad nasiksad. Neg-ollor-dummad-birgi dii nagunonikid, degi, neg-ollor-dummad-urba dii nagunonibalid. Deyob gunonikid.

⁸Bab-Dummad a-neg-olloled-dummad mogir-aradye onugsasad. Weyob neg osedosad, geb neg oibosbalid. Deyob, ibabogwadgi neg gusad.

⁹Geb degine, Bab-Dummad sogdebalid: “Dii-mogir-arad-urba-naid bachiki nagu, adi, neg-dinnagwad naguegar.” Deyob gunonikid.

¹⁰Bab-Dummad, neg-dinnagwad, napaye onugsasad. Geb diidina, demarye onugsanonikid. Geb Bab-Dummad dakded, we-ibmar bela nueganbi.

¹¹Agi, Bab-Dummad sogdebalid: “Bela ibmar-durbamar napagi nagu: Gaganmar-gwag-nikad ambikumar, degine, akar-akar sapi-sunna-sanmakmalad, e-sangi gwag-nika gusun. Ibmar-durbamar akar-akar bela na egad-egad-balibimaladba ambikumarsun.” Deyob gunonikid.

¹²Geb napagi ibmar-durbamar nagunonikid: Gaganmar-gwag-nikamalad bela na akar-akar egad-egad-balibimaladba, degi, sapimar-e-sangi-gwag-nikumalad bela akar-akar na egad-egad-balibimaladba ambikunonimalad. Bab-Dummad dakdebalid, we-ibmar bela nueganbi.

¹³Weyob neg osedosad, geb neg oibosbalid. Deyob, ibapaagwadgi neg gusad.

¹⁴Geb degi, Bab-Dummad sogdebalid: “Nibneggi gwallumar nagu, adi, neg-mutikid, neg-ibgined-ebo bachikii guegar. Adi, ibagan-nagumaid, yolamar-nagumaid, birgamar-nagumaid magar daklegegar.

¹⁵Degi, gwallumar-niba-naid napneg-mee saegar.” Deyob gunonikid.

¹⁶Bab-Dummad gwallu-dummagan gwabo obinyenonikid: Gwallu-dummad, neg-ibginedgi negdaknai guegar. Gwallu-senigwaddi, neg-mutik negdaknai guegar. Degine, niisgwamar obinnisbalid.

¹⁷Bab-Dummad napneg-mee-imakega, gwallumar, niisgwamar, nibneggi nasiksad.

¹⁸Adi, neg-ibginedgi negdaknai guegar, degi, neg-mutikidgi negdaknai gubaligar. Adina, neg-meegwad, negsichid-ebo bachikii imakegar. Bab-Dummad dakded, we-ibmar bela nueganbi.

¹⁹Weyob neg osedosad, geb neg oibosbalid. Deyob, ibabakegwadgi neg gusad.

²⁰Geb degi, Bab-Dummad sogdebalid: “Diigi ibmar-dulamar bela akar-akar ambikumar, degine, nuumar ambikumar, we-napneggi nabir niba gukudii gumalagar.”

²¹Bab-Dummad demargi ibdula-dummagan obinnisad, degine, diigi belagwapa ibmar-dulamar obinnisbalid. Bela na egad-egad-balibimaladba obinnisad. Degine, Bab-Dummad bela nuumar na egad-egad-balibimalad obinnisbalid. Bab-Dummad dakded, we-ibmar bela nueganbi.

²²Bab-Dummad a-ibmar-durgangi ise-nued-binsaedgi amarga sogded: “Bemar dula-mergumai gumarsun. Demargi bukidar-dula-mergumai gumarsun. Degine, nuumar, bemar we-napneggi bukidar-dula-mergumai gumarmosun.”

²³Weyob neg osedosad, geb neg oibosbalid. Deyob, ibataledgi neg gusad.

²⁴Geb degi, Bab-Dummad sogdebalid: “Napagi bela ibmar-durgan na egad-egad-balibimaladba ambikumar: Ibmar-durgan-sunna-akwilemalad, ibmar-durgan-napagi-garmakdimalad, ibmar-durgan-sapurbarmalad, bela na egad-egad-balibimaladba ambikumar.” Deyob gunonikid.

²⁵Bab-Dummad bela ibmar-durgan-sapurbarmalad na egad-egad-balibimaladba obinnisad. Ibmar-durgan-sunna-akwilemalad bela na egad-egad-balibimaladba obinnisbalid. Degine, ibmar-durgan-napagi-garmakdimalad bela na egad-egad-balibimaladba obinnisbalid. Bab-Dummad dakded, we-ibmar bela nueganbi.

²⁶Geb degi, Bab-Dummad sogdebalid: “Emisgindi, anmar, dule-obinyesun, anmar-sunnague anmar imakoed. Dulede, we-ibmar-durganmargi gangued-nika guoed: Uamargi, nuumargi, ibmar-durgan-sunna-akwilemaladgi, ibmar-durgan-sapurbarmaladgi, ibmar-durgan-napagi-garmakdimaladgi, bela we-ibmarmargi we-napneggi gangued-nika guoed.”

²⁷Bab-Dummad dule-obinyenonikid, na e-sunnague obinyenonikid. Bab-Dummad e-sunnague na imaksad. Machered, ome-ebo obinnisad.

²⁸Bab-Dummad we-dulemargi ise-nued-binsasadba, ega sogded: “Bemar mimmigan-bukidar nikumar. We-napneggi dula-bukidar urbemar, degi, bela we-napneg-ugakaase ambikumar. Bemar we-napneggi be gangued-nikadba bela we-ibdurganmargi be obindii gumarsun: Uamargi, nuumargi, degi, ibmar-durgan-napagi-garmakdimaladgi.”

²⁹Geb degi, Bab-Dummad dulega sogdebalid: “We-napneggi bela gagan-nabir-gwag-nikumalad, degi, bela sapimar-e-sangi-gwag-nikumalad, an bemarga uked. A-ibmar-durba bela bemar-masga guoed.”

³⁰Bab-Dummad we-napneggi bela we-ibmar-durganga sogdebalid: “Bela ibdula-unimaladga, bela nuumarga, bela ibdurgan-napagi-garmakdimaladga, bela gagan-ara-aramalad e-masga-guega an ega uked.” Deyob gunonikid.

³¹Geb degine, Bab-Dummad dakded, bela ibmar-na-obinnisadi, bela-bela nueganbi. Weyob neg osedosad, geb neg oibosbalid. Deyob, ibanergwadgi (6) neg gusad.