Duku 5:29-39

²⁹Dɛ kó difɔ̃nkúò kɛ̀ Defii bénnɛ́ tidiitì kɛ́yú Yesu kɛ̀ bɛdɑ̀mpóòcɔutíbɛ̀ nɛ̀ bɛnìtìbɛ̀ tɔbɛ̀ pɛ́u kɛ̀ bɛ̀ nwɛ̃ nkɛ yo.

³⁰Kɛ̀ dɛ̀ɛ yonkɛ Fɑdisĩɛ̃bɛ nɛ̀ ikuɔ́ wɑ̃ɑ̃̀bɛ̀ kɛ̀ bɛ̀ɛ bekɛ Yesu tɑncɔ́ùmbɛ̀ kɛ dɔ̀: Dɛ̀ dòmmɛ kɛ̀ di wɛ̃ńnɛ̀ bɛdɑ̀mpóòcɔutíbɛ̀ nɛ̀ mufòmmu yɛimu yɛmbɛ̀ kɛ̀ di yo nkɛ yɔ̃?

³¹Kɛ̀ Yesu bɛ̀ tɛ̃̀ńnɛ́ kɛ dɔ̀: Dɛ̀ í tú bɛ̀ɛ̀ kɔ̃̀ntì nɑɑti bɛɛ̀ wɑɑ̀ nhotɑ̀ntì, bɛmuɔmbɛ bɛɛ̀ ò wɑɑ̀.

³²N yí kɔ̀tɛní kɛ bo yú bɛ̀ɛ̀ yɛ̀mmɛ̀ dò mbɛ̀ wenni, n kɔ̀tɛní kɛ bo yú bɛnitiyɛibɛ mbɛ kɛ̀ bɛ̀ɛ ceetɛ bɛ fòmmu.

³³Kɛ̀ bɛnìtìbɛ̀ mɑbɛ̀ɛ bekɛ Yesu kɛ dɔ̀: Dɛ̀ dòmmɛ kɛ̀ Isɑ̃ɑ̃-Bɑtiisi tɑncɔ́ùmbɛ̀ nɛ̀ Fɑdisĩɛ̃bɛ kɔbɛ bou dinùù kɛ bɑ́ɑ́ nKuyie nsɑ̃́ɑ̃̀ kɑ̀ɑ kɔbɛ biɛ yo nkɛ yɔ̃̀?

³⁴Kɛ̀ Yesu bɛ̀ tɛ̃̀ńnɛ́ kɛ dɔ̀: Onìtì tòú dìì mɔ̀nnì o pokù o nɛ́pobɛ̀ bo nɑ kɛ́boú dinùù o bɛ̀ bonɛ̀ dìì mɔ̀nnɑ̀ɑ̀?

³⁵Dɛ kó diyiè kpɑɑnímu kɛ̀ bɛ̀ bo dɛitɛ wèè tòú o pokù, dɛ mɔ̀nnì bɛ̀ bo boú dinùù.

³⁶Kɛ̀ Yesu yíɛ́ kɛ́ bɛ̀ nɑ̀kɛ́ nɛ̀ dinɑ́ɑǹhɑ̃ntírì kɛ dɔ̀: Bɛ̀ ɔ̃ɔ̃ í nkèétɛ́ kuyɑɑ̀pɑ̀nkù kɛ́yɑ́ nkukótíkù ĩ́nkɛ̀, kɑ̀ɑ mɛ̀ dɔ̀ɔ̀, ɑ cɑ̀ɑ̀rɛ̀mu kuyɑɑ̀pɑ̀nkù, dɛ kó dikéè mɛ mbɑ́ɑ́ yie nkɛ́tɑunnɛ̀ kukótíkù.

³⁷Bɛ̀ ɔ̃ɔ̃ í ncũɔ̃́ mɛnɑɑ̀ mbɛ́mmɛ̀ tidɔutì kótì miɛkɛ, kɑ̀ɑ mɛ̀ dɔ̀ɔ̀ tidɔutì bo potɛ kɛ̀ mɛnɑɑ̀ ncɑkɛ nɛ̀ tidɔutì dɛmɔu.

³⁸Mɛnɑɑ̀ mbɛ́mmɛ̀ dò nkɛ́ncũɔ̃̀ tidɔutì pɑ̀ntì miɛkɛ nkɛ.

³⁹Òmɔù ɔ̃ɔ̃ í ndɔ́ mɛnɑɑ̀ mbɛ́mmɛ̀ ò yɑ̃̀ dìì mɔ̀nnì mɛ̀ɛ̀ bi, ò ɔ̃ɔ̃ yĩ́ mɛ̀ɛ̀ bi mɛɛ̀ nɑɑti.