Luka 5:29-39

²⁹Erâ Jesure bâzi rikerâ takesi roro â ŋic gâcne hefârec‐jopame fisirâ mâmâc nâmbiŋ.

³⁰Eme farisaio â miti qaqazu âgofâc‐jeŋic jaŋe irec manapie sâqoreme Jesure motecfâc ʒiŋuc jazambiŋ: “Ŋoŋe wemocte takesi roro ŋic â sâqocne bapa jaŋehec tiwa bâzi nâŋgopieŋ?

³¹Mupie Jesuzi manarâ ʒiŋuc jazawec: Ɋiɋicne jaŋe doktare mi mueŋgopieŋ, huchec jaŋe ine mueŋgopieŋ.

³²Ŋic tiŋne mâcne, sâqocne bapa hefârec‐jopape maŋjeŋic bârisieniŋte wahapo.”

³³Jesuzi iŋuc mume jaŋe dâŋ ʒiŋuc âzâcnembiŋ: “Johanere motecfâc jaŋe gâbâ jaha nânâ sowa juhuc nunumu gie baeŋgopieŋ â fârisaio jaŋerezi iŋuc jaha eeŋgopieŋ, â go gahacne jaŋe ine nânâ opâ kosa nâeŋgopieŋ.”

³⁴Mupie Jesuzi ʒiŋuc jazawec: “Ŋicwofuŋ e kikefuŋfâc‐ticne jaŋehec juhame ŋoŋe sâcne ejarepie sowa juniŋmu me?

³⁵Juku ŋicwofuŋ jowac ropie basahuc dameŋ ira sowa juniŋmu.”

³⁶Iŋuc murâ dâŋ herâricne moc ʒiŋuc jazawec: “Mozi ŋaqi ɋâricnaonec qoruc susuc moc bâtâcnerâ ŋaqi raŋɋanao ɋâtâocmu? Moc e iŋuc erâ muzac ŋaqi ɋâricne maŋgâŋ sipirickezac â qoruc susuc ɋâricnezi ŋaqi raŋɋanao sâctiri jaha ezac.

³⁷Erâ wâc waiŋ opâ ɋâricne ʒopo raŋɋanao mi qoŋgiŋkepie huekac. Iŋuc eniŋmuo wiaŋ ɋâricnezi ʒopo raŋɋane âtefâuckeme waiŋ mecne ʒopo mecne mâmâc sipirickenicmu.

³⁸Irec hâcne waiŋ ɋâricnezi ʒopo ɋâricnao hume sâckeocmu.

³⁹Â moc e waiŋ raŋɋane nâku maŋne eweczi waiŋ ɋâricne ʒiŋuc muhuc qikiŋneocmu: Raŋɋane nâpe aŋacne ekac.”