SAN LUCAS 5:29-39

²⁹Chi Leví mayjäy yajcay yaj'uucy ma ytɨjc, cham may yajcogüejtpɨ ajcxy etz jacjadyii jäy huɨdi ɨñaayb ma yɨ mesa mɨɨd Jesús etz yɨ' ydiscípulos ajcxy.

³⁰Chi je' ajcxy huɨdibɨ yaj'ixpɨjcp Dios ñecy etz je ixpɨcytɨjc huɨdi naydíjɨgɨxp fariseojäy tzachni'ameechycápxcɨxy ni'ojɨɨygɨxy je Jesús ydiscípulos ajcxy, ymɨnaangɨxy: ―¿Na'amy co mgaaygɨxy m'uuccɨxy mɨɨd yajcogüejtpɨ etz mɨɨd pocyjäy ajcxy?

³¹Chi Jesús ymɨnañ: ―Ca' yajmayjaty tzoydumbɨ huɨdibɨ ca' ajcxy ypɨgyii, jëyɨ huɨdi ajcxy pɨ́jcɨp.

³²Ca' ɨɨch tɨ nmiñɨch ma je jäy ajcxy huɨdibɨ ca' pocy mɨɨdɨty. Ɨɨch tɨ nmiñɨch mɨɨd yɨ pocyjäy ycɨxpɨ co huen jothuimbijttaaygɨxy ma Dios.

³³Chi je mayjäy ajcxy Jesús nɨmay: ―Nej co yɨ' (Juan) ydiscípulos ajcxy janam jadzojc jaygay y'íjtcɨxy etz ycapxtáccɨxy, nañ jadu'n je fariseojäy ydiscípulos ajcxy janam jadzojc jaygay y'íjtcɨxy. Chi miich mdiscípulos ajcxy ca' ajcxy jaygay y'ijtcɨxy, caaby uucp ajcxy jabom jabom.

³⁴Chi Jesús ymɨnañ: ―¿Nej jëbɨ yaj'ayuu'aty jäy ajcxy huɨdi yajpatpɨ ma je pɨjcpɨ yajnixɨɨduñ, pen quipxyɨ yam yajpaady mɨɨd je huɨdibɨ pɨjcp?

³⁵Minamb je xɨɨ je tiempo mɨna je pɨjcpɨ yajtzonɨɨyb, huin'it janchtɨy ajcxy jëbɨ y'ayuu'ájtcɨxy.

³⁶Nañ jadu'n ajcxy yajnɨmay tüg jɨhuimbit ayuc: ―Ni pɨn ca' huaad agɨyɨ̈y tuc-huit mɨɨd jemyhuit, canaan jëyɨ ycɨ́ɨdzɨp yɨ jemybɨ, nañ jadu'n je tucpɨ ca' oy yhuɨ'ma'ñ mɨɨd je jemyhuit agɨyɨ'ñ.

³⁷Ni pɨn ca' pɨdägy jemy vino ma je tucpɨ cochac, pen janch jadu'n octuñ, je vino jemybɨ ycɨ́ɨdzɨp je tucpɨ cochac, chi y'ixyojctähuɨpy je vino etz je cochac ñitɨgoydähuɨpy.

³⁸Pɨdägɨpy ajcxy jemy vino ma tüg jemybɨ cochac, chi jadu'n ca' ytɨgoyɨpy je vino ni je cochac.

³⁹Ca' ni pɨn tzocy vino jemybɨ, pen tɨ anajty ügy vino tɨɨbɨ yjejcnɨ, co jadu'n ymɨna'ñ co jac oy je tɨɨbɨ yjejcnɨ.