SAN LUCAS 5:29-39

²⁹Tiyaꞌ la liꞌ nguaꞌni Leví sca taꞌa tlyu ca toꞌ tyi yu, chaꞌ cuaꞌni chi̱ yu loo Jesús. Loꞌo juaꞌa̱ ndyalaa tyu̱u̱ tyaꞌa nguꞌ slo, tyaꞌa ndyuꞌni Leví cña nclyo cñi cña loo ñati̱; juaꞌa̱ ndiꞌi̱ xi xaꞌ la ñati̱.

³⁰Liꞌ nguxana nguꞌ fariseo nu tacati tsa nduꞌni nguꞌ, ntiꞌ nguꞌ, loꞌo nu mstru chaꞌ joꞌó biꞌ, nguxlyú nguꞌ chaꞌ hichu̱ꞌ nguꞌ nu ndyaca tsaꞌa̱ jiꞌi̱ Jesús. ―¿Ni chaꞌ laca chaꞌ stuꞌba ti ndacu ma̱ tyaja, stuꞌba ti ngaꞌa̱ ma̱ loꞌo nguꞌ cuxi cua? ―nacui̱ nguꞌ―. Msu jiꞌi̱ nguꞌ xaꞌ tsuꞌ laca nguꞌ cua, nu cuiñi ti nxñi quiñaꞌa̱ tsa cñi cña loo ñati̱. Loꞌo juaꞌa̱ ntucua xi xaꞌ la nguꞌ nu ndyaꞌa̱ calle ti.

³¹Liꞌ nguxacui̱ Jesús chaꞌ jiꞌi̱ nguꞌ biꞌ: ―Ñati̱ nu tsoꞌo tyucui ñaꞌa̱, ná clyana nguꞌ biꞌ jiꞌi̱ sca nu joꞌo; nguꞌ quicha laca nu ndyaana jiꞌi̱ sca nu joꞌo ―nacui̱―.

³²Loꞌo juaꞌa̱ naꞌ, ná lijya̱ naꞌ chaꞌ culana naꞌ jiꞌi̱ ñati̱ nu nclyacua ti tiꞌ chaꞌ tsoꞌo tsa ycuiꞌ ca nguꞌ; na cua lijya̱ naꞌ chaꞌ chcuiꞌ naꞌ loꞌo nguꞌ cuxi, chaꞌ culochu̱ꞌ nguꞌ quiꞌya nu ntsuꞌu jiꞌi̱ nguꞌ.

³³Liꞌ nchcuane nguꞌ jiꞌi̱ Jesús: ―Loꞌo nguꞌ nu ndyaca tsaꞌa̱ jiꞌi̱ Juan, loꞌo nguꞌ nu ndyaca tsaꞌa̱ jiꞌi̱ nguꞌ fariseo, ¿ni chaꞌ luꞌba ti nchcuiꞌ nguꞌ biꞌ loꞌo ycuiꞌ Ndyosi? Loꞌo juaꞌa̱ ná ndacu nguꞌ tyaja tsa̱ biꞌ loꞌo nchcuiꞌ nguꞌ loꞌo Ni. Pana nguꞌ nu ndyaca tsaꞌa̱ jinuꞌu̱ ni, xaꞌ ñaꞌa̱ nduꞌni nguꞌ biꞌ; xcuiꞌ tsoꞌo tsa ndacu nguꞌ, xcuiꞌ tsoꞌo tsa ndyiꞌyu nguꞌ ―nacui̱ nguꞌ jiꞌi̱ Jesús.

³⁴Ndiꞌya̱ nguxacui̱ Jesús chaꞌ jiꞌi̱ nguꞌ biꞌ liꞌ: ―Loꞌo caja clyoꞌo nguꞌ ni, ndacu nguꞌ nu ndyaꞌa̱ loꞌo jiꞌi̱ cutsii; ná ndiꞌi̱ nguꞌ ntyuteꞌ ti nguꞌ tsa̱ biꞌ, nu loꞌo ndiꞌi̱ nguꞌ loꞌo cutsii ―nacui̱ Jesús―.

³⁵Pana nu loꞌo tyalaa tsa̱ nu tyaa loꞌo nguꞌ jiꞌi̱ cutsii, liꞌ ná cacu nguꞌ tyaꞌa tsoꞌo cutsii; caca xñiꞌi̱ tiꞌ nguꞌ liꞌ. La cuiꞌ juaꞌa̱ chaa tiꞌ tyaꞌa tsoꞌo naꞌ juani, pana caca xñiꞌi̱ tiꞌ nguꞌ nde loo la ―nacui̱ Jesús liꞌ.

³⁶Loꞌo liꞌ nda Jesús cui̱i̱ re loꞌo nguꞌ: ―Ná nsaꞌbe nguꞌ sa yuꞌbe steꞌ cucui nguꞌ chaꞌ calya loꞌo sca lateꞌ cusu̱ jiꞌi̱ nguꞌ. Si juaꞌa̱ cuaꞌni nguꞌ, ná tyanu tsoꞌo lateꞌ cucui biꞌ liꞌ, tyati̱ꞌ jlyacua̱ su ngalya biꞌ; loꞌo nu yuꞌbe lateꞌ biꞌ, ná stuꞌba xee loo loꞌo nu lateꞌ cusu̱ biꞌ.

³⁷Loꞌo chaca chaꞌ ni ―nacui̱ Jesús jiꞌi̱ nguꞌ―, ná nsuꞌba nguꞌ jiꞌi̱ lcui nu chca ndyuꞌu ti neꞌ tyacaꞌ cusuꞌ. Si suꞌba nguꞌ jiꞌi̱ neꞌ tyacaꞌ cusuꞌ, yala ti catsu seꞌi̱ tyacaꞌ biꞌ; clyaꞌa tyacaꞌ, tye lcui tyalú liꞌ.

³⁸Neꞌ tyacaꞌ cucui tyuꞌú lcui loꞌo chca ndyuꞌu ti.

³⁹Pana loꞌo cua ndyiꞌo nguꞌ lcui nu cua cusuꞌ, ná ntiꞌ nguꞌ coꞌo nguꞌ lcui nu chca ndyuꞌu ti. “Tyixi la ndyiꞌyu lcui nu cua cusuꞌ biꞌ”, ñacui̱ nguꞌ. Juaꞌa̱ ngua chaꞌ nu nda Jesús loꞌo nguꞌ.