Lukas 5:29-39

²⁹Nò, nighimu si Libi to dakol no pagkoonan dio to baloy rin oyow woy ki Hisus. Mohon-ing ka mgo talagkubla to buhis no nig-amut to pagkoonan, woy duon dod duma no mgo otow no nig-amut no nigkoon.

³⁰Nigbayo dio ka duma no mgo Parisiu woy ka duma no talag-anad to Balaod. Nigmugongmugong sikandan no inso dan to mgo hibatoon ni Hisus to, “Manio to og-amut kow no ogkoon woy og-inum to mgo makasasalo woy ka mgo talagkubla to buhis?”

³¹Si Hisus ka nigtabak kandan to pananglitan din to, “Ka otow no waro dalu, kono din og-awos ka talagtambal. Ka otow no duon dalu, sikandin ian ka og-awos to talagtambal.”

³²Kagi ni Hisus, “Wara a moghondini to ogbulig to mgo otow no matuwarong ko kono ian ku ogbuligan ka mgo makasasalo oyow ogbalbalawan dan ka mgo batasan dan.”

³³Duon ka mgo otow dio no kagi ran ki Hisus to, “Ka batasan to mgo hibatoon ni Huan ko ogtuud to og-ampu to Magboboot, malasi oglangkad ogkoon. Songo ogkounawa rod ka batasan to mgo Parisiu. Di ka koykow no mgo hibatoon, ogkoon atag woy og-inum dod.”

³⁴Nigtabak si Hisus to pananglitan. Nig-inso din, “Litos to goinawa now to kono ogkoon ka mgo pigtugunan to pagkoonan to kasal? Ka ku kow! Ko duon pad ka lukos no ogpangasawa kono ogkaayun no oglangkad ki ogkoon.

³⁵Di duon allow no ogdakopon on ka lukos no ogpangasawa no warad sikandin dio to kandan, sikan ian ka allow no oglangkad to ogkoon sikandan.”

³⁶Duon dangob no pananglitan ni Hisus. Kagi ni Hisus, “Kono tad ogtabason ka iam no kinabo oyow igtupak to tahan no kinabo. Ko oghimuon ta ka soini ogkaraat ka iam no kinabo woy ka igtupak no iam kono no unawa to tahan no kinabo.”

³⁷Duon dangob no pananglitan ni Hisus. Kagi rin to, “Ka iam no inumanon, kono ta igtagu dio to tahan no taguanan no nohimu to laplap to ayam su ko ogtulin on ka inumanon, ogbotu ka sikan no tahan no taguanan no ogkaraat ka inumanon woy songo ogkaraat ka taguanan.

³⁸Ian do litos ko ian igtagu ta ka iam no inumanon dio to songo iam no taguanan su ogkalanat pad ka sikan no nohimu to iam no laplap to ayam.

³⁹Di,” kagi ni Hisus, “ka mgo otow no natagam on to tahan no inumanon, konad ogkoiniat to iam no inumanon su kagi ran, ‘Maroyow ka tahan.’ ”