Luk 5:29-39

²⁹Ano, Libai mesekei tine nyamon udu asiu tan, i na Jises. Ma hawe iri lau solo-an ta akohok luk ta takis badeh, ame aimon nyamon hawe oro ale.

³⁰Ya oro Parasi rayah, hawe oro lau rayah ta leheya kandriyen tiri Juwis, badu bolo oro nane dah, nunu-uh oro lau ta Jises anya, “Tasah handru ado aimon nyamon hawe oro lau ta akohok luk ta takis, ma hawe oro lau ale ba-en hamon ta batanau ta Moses bwe?”

³¹Ya eme Jises asumon i buku doh, “Iri lau ale babo sik bwe, iri winiyan baso-ok ndramak ta anyumor bwe. Arile, iri lau tiri sik le badeh, aseken seben.

³²Jo eme dah ta aseben lau mwasin le, bwe. Jo eme dah badeh, ta aseben iri lau ta karei ma lomondra ndra-in udu tiri badeh, katubuni ndrine iri, ma iri kasahan mwasin.”

³³Eme ya iri ndremenya Jises anya, “Oro lau ta Jon ta alomwa mene abeles oro ta nyamon, ma hawe oro amekes salom solo-an sese. Ma hawe oro lau tiri Parasi badeh, amekes i le buku oro le; arile oro lau tam badeh, babeles oro ta nyamon bwe.”

³⁴Eme Jises asumon i buku doh, “I buku none ndramak tasou bolohau udu aliy, ado winiyan babilisi oro lau ta molak bwe!

³⁵Arile, na len hamon eme kameh, iri lau ta kaliu tan kuhi iy eme len, ma na len doh kameh oro winiyan baimon nyamon bwe.”

³⁶Ano Jises tiye sahou sokek ari ja i toro i buku doh, “Ari ndramak winiyan batarani kolau ha-un, ya iy winiyan baserehei bala ta ndrabwak, udu ta kolau malen bwe. Ya i buku none iy kaserehei kolau ha-un ki aliy kameh tarani andra-i labai. Ma kolau malen kameh ndrabwak i tinan le gwek, ma winiya kolau ha-un bala winiyan ja bwe.

³⁷Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen doh kameh tuburok, ma kohan kameh tarani ku-i me nane, ma waen kamou ma iu laleyah; ma ku-i me ale kameh andra-i.

³⁸Arile, waen ha-un badeh, ki bolo ku-i me ale ma bweseken kahis le.”

³⁹Eme iy anya, “Ma idah kameh, iri lau ndra-un waen malen kameh bwale iri a-un waen mamakahis le, tasah iri anya waen malen badeh, simidin.”