Luka 5:29-39

²⁹Leviꞌa ane neo Iesu veize ogomu boro haḡairo. Eꞌea takesi azaḡa ḡehaḡa zu vaze nunu zeḡe teite ogau tiburaunu.

³⁰Rehano Farisea azaḡa zu zeḡe moneo Mose goro ḡoeꞌa ihozeꞌeteꞌe azaḡaniꞌa Iesu tahiꞌatahiꞌa mazao maḡune ḡoeriro, raenaꞌa, “Zaꞌe nougadu takesi azaḡa zu sauꞌa azaḡa teite ogau tiburuꞌohe?”

³¹Ebu Iesuꞌa naenaeziro, raenaꞌa, “Ugi oꞌoꞌa azaḡaꞌe gohe vazeḡa mene vaḡeꞌohe, rehano ugi azaḡaniꞌa ani vaḡeꞌohe.

³²Eꞌe teige, eꞌe duduḡa rae zamareꞌeteꞌe azaḡa huzoga radu mene onairo. Rehano haḡai sauꞌa rae zamareꞌeteꞌe azaḡa huzadu zeḡe sauꞌanonoꞌo ḡihuroga veize onairo.”

³³Ebu hena vaze nuꞌa Iesu niro, raenaꞌa, “Ioane bapatizo tahiꞌatahiꞌaꞌe ogomu moneo mada ḡehaḡa zaḡozaḡeꞌohe zu kurauꞌohe. Farisea azaḡa tahiꞌatahiꞌa zuni ꞌouge haḡaeꞌohe. Rehano nougadu ḡa tahiꞌatahiꞌaꞌe iḡaiḡa ogauꞌohe?”

³⁴Ebu Iesuꞌa ziro, raenaꞌa, “Hahureꞌeteꞌe madaḡano, ohoze hahu iziganiꞌa huzeꞌeteꞌe azaḡaꞌe ane teite ogau tiburaune, ze mene zaḡozaḡiꞌuma.

³⁵Rehano zeḡe mazaonoꞌo ohoze hahu izigaꞌe mae vaḡiniꞌuma madaḡaniꞌa onaine, zeꞌe vetuḡa ranadu zeḡeꞌa zaḡozaḡiꞌuma.”

³⁶Ebu Iesuꞌa bare hari ꞌahoga idaniro, raenaꞌa, “Vaze ꞌahoganiꞌa dabua iziga variꞌe madu dabua amahiḡa mene baniniꞌuma. Baninine, dabua izigaꞌe mae zigi borofiꞌuma, ebu dabua izigaꞌe amahiḡa teite horone tibunoga zuni mene manoḡa reꞌuma.

³⁷Ebu vaze ꞌahoganiꞌa vaini vuḡa baige amahiḡa zamaḡano vaini vuḡa iziga mene beꞌune ufiꞌuma. Beꞌune ufine, vaini vuḡaniꞌa baige eꞌe iriꞌavadu beꞌutiꞌuma. Ebu vaini vuḡaꞌe sore rururanadu baige amahiḡa sausauniꞌuma.

³⁸Eꞌanoꞌo vaini vuḡa izigaꞌe, baige izigano beuꞌe ufiꞌuma.

³⁹Rehano vaini vuḡa amahiḡa gagidoteꞌe azaḡaꞌe vaini vuḡa iziga mene urateꞌohe, mazaḡa zeꞌe raenaꞌa, “Amahiḡaꞌe ufeta manoḡa!”