Luke 5:29-39

²⁹Me ngongliy Levi ba madnom ni ba ga’ u tabinaw rok ni fan ngak Jesus, ma bo’or e girdi’ ni yad ba takunuy e tax nge yugu boch e girdi’ nra uned ngorad nga tebel.

³⁰Ma boch e Farise nge pi tamchib ko Motochiyel ni ku yad e Farise e ra gun’gun’gad ngak pi gachalpen Jesus nra fithed ngorad ni lungurad, “Mangfan ni gimed be un ngak e pi’in yad ma kunuy e tax nge pi’in ndabun e girdi’ nu lan binaw dakenrad ko abich nge garbod?”

³¹Me fulweg Jesus ngorad ni ga’ar, “Pi’in yad ba gol e dariyfan e togta ngorad, ya kemus ni pi’in yad mm’ar e bay fan e togta ngorad.

³²Gathi ku gub ni nggu pining e pi’in yad ba yal’uw ni ngar kalgad ngan’rad ngar pi’ed keru’rad ko kireb ni yad be rin’, ya ku gub ni nggu pining e pi’in ndabun e girdi’ nu lan binaw dakenrad.”

³³Me ga’ar boch e girdi’ ngak Jesus, “Pi gachalpen John e yugu yad ma pag e abich ngu’ur meybilgad, ma ku aram e n’en ni be rin’ pi gachalpen e pi Farise; machane pi gachalpem e yad be kay ban’en ma yad be garbod.”

³⁴Me fulweg Jesus ni ga’ar, “Gimed be finey mrayag ni ngam taleged e pi’in nni piningrad ngarbad ko madnom ko mabgol ni ngar pired ndab ra abichgad u n’umngin i nap’an ni bay rorad fare pumo’on ni ir e ngan ngongliy e mabgol rok? Bmuduwgil ndanga’!

³⁵Machane bay ba ngiyal’ ni bayi taw ngay mi ni fek fare mo’on rorad ni ir e nge mabgol, ma aram e bay ra pired ndab ku ra ked ban’en ko pi rran nem.”

³⁶Miki yog Jesus e re fanathin ni ba’aray ngorad ni ga’ar, “Dariy be’ nra guchthuy bangi mad u ba mad nib be’ech ni nge thufeg nga ba mad nike kaday. Ya fa’anra rin’ ma aram e ke guchthuy fare mad nib be’ech, ma fa gi mad nib be’ech nike guchthuy e dabi m’ag ko fare mad nike kaday.

³⁷Ma ku errogon ndariy be’ nma ngal’uweg e wayin nib be’ech ngalan e tutuw ni keru’ e gamanman ntafen e wayin nike kaday. Ya fa’anra rin’ ni aram rogon, ma fare wayin nib be’ech e ra bilig fapi tutuw, me map’ e wayin nga but’ me kireb fapi tutuw.

³⁸Danga’! Wayin nib be’ech e ngan ngal’uweg ngalan e tutuw nib be’ech ni keru’ e gamanman!

³⁹Ma dariy be’ ni ba’adag e wayin nib be’ech ni fa’anra ki i unum e wayin ni kan tay nike n’uw nap’an. Ya ra ga’ar, “Tin nike n’uw nap’an e wayin e ir e bfel’.”