San Lucas 5:29-39

²⁹Gdöd niꞌ, benëꞌ Leví naꞌ tu güiꞌi huagu queëꞌ Jesús ga nac lu yuꞌu lidxëꞌ, atiꞌ gulacuꞌë niꞌ zian bönniꞌ uquízxj len yelaꞌquëꞌ bönniꞌ taꞌbö́ꞌlenëꞌ lequëꞌ tahuëꞌ.

³⁰Niꞌr gulanë́ꞌ quequëꞌ bönniꞌ usë́d queëꞌ Jesús bönniꞌ gdauꞌ tuꞌsëdi len yuguꞌ bönniꞌ gdauꞌ fariseo, taꞌnë́ꞌ: ―¿Bizx quië riꞌj rágulenliꞌ yuguꞌ bönniꞌ uquízxj len yelaꞌquëꞌ bönniꞌ dul‑laꞌ?

³¹Bubiꞌë didzaꞌ Jesús, rëꞌ lequëꞌ: ―Cutu naquincnëꞌ nu un bunách bönniꞌ nacuꞌë dxiꞌa, san bönniꞌ téꞌinëꞌ naquincnëꞌ nu un bunách.

³²Zaꞌa, clëg ulídzgacaꞌ‑nëꞌ bönniꞌ tsahuiꞌ, san zaꞌa ulídzgacaꞌ‑nëꞌ bönniꞌ dul‑laꞌ quië lubíꞌi ládxiꞌquëꞌ.

³³Niꞌr gulanabnëꞌ Jesús bönniꞌ gdauꞌ naꞌ, taꞌnë́ꞌ: ―¿Bizx quië tunëꞌ gubás zian lzu bönniꞌ daꞌquëꞌ Juan, len tuꞌlidzëꞌ Dios, atiꞌ tunëꞌ caꞌ cni bönniꞌ daꞌquëꞌ yuguꞌ bönniꞌ gdauꞌ fariseo, san bönniꞌ daꞌquëꞌ Liꞌ tiꞌj tahuëꞌ?

³⁴Jesús rëꞌ lequëꞌ: ―¿Naruꞌ huactsa gunliꞌ ga lunëꞌ gubás bönniꞌ nacuꞌë lni qui yöl‑laꞌ rutság naꞌ tsal niꞌ zóalenëꞌ lequëꞌ bönniꞌ rutság nëꞌë?

³⁵Huadxín dza catiꞌ gduëꞌ ga nacuꞌë bönniꞌ rutság nëꞌë. Dza niꞌr lunëꞌ gubás.

³⁶Niꞌr benëꞌ lsaquiꞌ ca nac lë ni Jesús, rëꞌ lequëꞌ: ―Nutu nu bönniꞌ gchuguëꞌ lariꞌ cub chnadía len cuijëꞌ tstacaꞌ le udë́ꞌë lëꞌi lariꞌ tëb. Chquiꞌ gunëꞌ cni, clëgz gac ditj lariꞌ cub naꞌ, san láriꞌdauꞌ naꞌ gruj lëꞌi lariꞌ cub naꞌ cutu tsajlö́z lariꞌ tëb naꞌ.

³⁷Lëzcaꞌ cni, nutu nu bönniꞌ rguëꞌë xisi uva cub lu röꞌö gul náquini guid. Chquiꞌ nu gun cni, uláꞌa röꞌö gul naꞌ náquini guid xisi uva cub naꞌ, atiꞌ glalj xisi uva naꞌ, atiꞌ gac ditj röꞌö gul naꞌ.

³⁸Qui lë ni naꞌ ral‑laꞌ caꞌaruꞌ xisi uva cub lu röꞌö náquini guid cub, atiꞌ groptë lac chiꞌi.

³⁹Chquiꞌ zoa nu riꞌj xisi uva gul, cutu guë́ꞌnitë guiꞌj xisi uva cub, le rna: “Nacr szxiꞌ xisi uva gul naꞌ.”