LUKA 5:29-39

²⁹Ndipo Levi adamucitira cikondweso cikulu kwene-kwene kumui kwace. Pamwepo pakhana anyakupimisa mtsonkho azinji na winangombo omwe akhadakhala nawo patsantsali la kudyera.

³⁰Ndipo afalizeu na apfundzisi wawo wa mtemo akhang'ung'udzikira ateweri wacewo, acimbati: “Thangwe ranyi muli kudya na kumwa pabodzi na anyakupima mtsonkho na anyakuphonya?”

³¹Ndipo Jezu adawatawira aciti: “Wanthu wakulimba an'funa lini mulapi, tsono wale omwe ali kuduwala.

³²Ine ndiribe kubwera kudzacemera anyakulungama, tsono ndabwera kudzacemera anyakuphonya kuti akhumbule.”

³³Ndipo iwo adamubvundza kuti: “Thangwe ranyi ateweri wa Juwau ambabzimana cakudya kazinji, acimbapemba? Na atweri wa afalizeumbo ambacita bzibodzi-bodzibzo. Tsono wakowa thangwe ranyi ambadya na kumwa?.

³⁴Ndipo iye adawatawira aciti: “ Mungakakamiza anyakucemeredwa kumsinda wa malowozi, kuti abzimane kudya uko na namwali wa cimuna ali pamwepo?

³⁵Tsono in'dzakwana nthawe yomwe an'dzamutenga namwali wacimuna, pamwepo ndipo iwo an'dzabzimana cakudya.”

³⁶Ndipo iye adawatsikira pomwe matere aciti: “Palibe munthu omwe ambasona cigamba cipsa pa pacakubvala cakusakala, thangwe cigamba cipsaco cin'bwerera cicing'amba cakubvala cakusakalaco, nakuti cigambaco cin'bverana lini na nguwoyo.

³⁷Palibe pomwe munthu omwe ambaikha vinyu ipsa m'mabiyau ya kale-kale. Nakuti vinyuyo imphokesa mabiayau ndipo vinyu icitaika na mabiyauyo yacipsweka..

³⁸Tsono vinyu ipsa, mbaiyikhidwembo m'mabiyau mapsa,.

³⁹Palibe pomwe munthu omwe ambamwa vinyu ya kale-kale acifuna pomwe ipsa, thangwe iye anilewa kuti: “Ya kale-kale ire n'jabwino.”