Lucas 5:29-39

²⁹Tut bluz, mtsow Leví thib ani liz Leví par Jesús, ne tya mkaltaa kwaro re zha kuu ntsow kobral temi chaan yezlyu kuu nzhax lo zha Roma, ne noga nzi tedib net re zha kuu ngeyow kon re zha roo mes.

³⁰Per lee re fariseo ne re maestr kuu nloo xkiiz Diox, mndelo zha mrezta zha loo re zha kuu ngeteed lo Jesús, ne nzhab re zha: ―¿Chebee nzhow goo ne nzhuu goo kon re zha kuu ntsow kobral temi chaan yezlyu, ne kon re zha kuu ntsowt kuu wen?

³¹Jesús mkab ne nzhab lo re zha: ―Re zha kuu net ndak, ndechet zha zha kuu tegwe zha, per lee re zha kuu ne ndak, ndeche zha zha kuu tegwe zha.

³²Ne ndyaltʼn ndyaadchezʼn re zha wen, sinke leen ndyal ndyaadchez re zha kuu nap falt, tsa tsee zha mod went kuu nak zha ne yelaaz zha Diox.

³³Tsa mnaabdiz re zha lo Jesús, ne nzhab zha: ―¿Chebee lee re zha kuu ngeteed lo Juan ne re fariseo kwathoz ntsow zha ayun, ne noga kwaro ndediz zha lo Diox, per lee re zha kuu ngeteed loʼa thibka nzhow zha ne nzhuu zha?

³⁴Jesús mkab ne nzhab: ―¿Chu tak tsow goo, wut re zha kuu nzi lo fandan, or kuu lee zha kuu mtseya ndoka lo re zha?

³⁵Per too thib wiz kib zha zha kuu mtseyaʼa lo re zha, tsyasi tatsow zha ayun.

³⁶Ne noga mndaa Jesús thib kwent nanzee lo re zha, ne nzhab Jesús: ―Neeka thib zha ngat lut lar kub, ne ngib zhay chu lar gox. Os lee zha tata tsow zhay, ntetsaa zha lar kub, tak lee lar kub nzaalte gwataak cho lar gox.

³⁷Ne neeka ngot zha xit ub kuu kub leen gom yid gox. Tak os lee zha tata tsow zhay, lee xit ub kuu kub luux gom gox. Tsa lee xit ub zho ne lee gom gox lux.

³⁸Kona lee xit ub kuu kub ndobloy yo leen gom yid kub, tsa roptay lortsin.

³⁹Ne reta zha kuu nzhuu xit ub kuu ndaʼa wiz mroo, yowt leettsoo zha gu zha kuu kub, tak gab zha: “Mas wen ndee kuu gox”.