Luka 5:29-39

²⁹Lewi gêgôm moasiŋ kapôêŋ teŋ aŋga nê andu kêtu Jesuŋa, ma teloŋ to lau ŋagêdô taêsam seŋ gêŋ tau sêŋgôŋ sêwiŋ êsêac.

³⁰Tec Parisai to nêŋ biŋsutau têtu môsi ma sêsôm gêdêŋ ênê ŋacseŋomi gebe “Amboac ondoc tec amac aeŋ to anôm gêŋ aŋgôŋ awiŋ teloŋ to lau sec nec.”

³¹Ma Jesu gêjô êsêac aweŋ gebe “Lau ôliŋ ŋajam sêpô lêna tauŋ kêtu doktaŋa atom, mago lau gêmac tec sêpô lêna.

³²Aê gamêŋ gabe jakalem lau gêdêŋ atom, jakalem lau secgeŋ gebe sênam tauŋ ôkwi.”

³³Ma êsêac sêsôm gêdêŋ Jesu gebe “Joaŋnê ŋacseŋomi sêjam dabuŋ mo to teteŋ mec elêmê ma Parisainêŋ ŋacseŋomi amboac tonaŋ. Mago aômnêm nec seŋ to sênôm gêŋ.”

³⁴Tec Jesu kêsôm gêdêŋ êsêac gebe “Lau embe sêniŋ awê ŋamoasiŋ, ma ŋac-gebe-ênam-awêwaga êmoa êwiŋ êsêac, oc amac akac êsêac gebe sênam dabuŋ mo me. Masianô.

³⁵Mago ŋabêc oc mêŋêsa ma sêkôc ŋac-gebe-ênam-awêwaga su aŋga êsêacnêŋ. Êndêŋ bêc tônê, go sênam dabuŋ mo.”

³⁶Go kêsôm biŋgôliŋ teŋ gêdêŋ êsêac gêwiŋ gebe “Lau teŋ sêkac obo ŋatali su aŋga ŋakwê wakuc gebe sêsi êpi ŋakwê laŋgwa atom. Embe sêŋgôm, go sêkac ŋakwê wakuc êŋgic ma ŋakwê wakuc ŋatali naêtôm ŋakwê laŋgwa atom.

³⁷Ma lau teŋ sêkêŋ wain wakuc êsêp bôc ŋaôlic laŋgwa atom. Embe sêŋgôm, oc wain wakuc êôc ŋaôlic êpoa e êtaiŋ ma ŋaôlic tau êtu sec.

³⁸Takêŋ wain wakuc êsêp ŋaôlic wakuc ênamaŋ.

³⁹Ma lau, taŋ sênôm wain laŋgwa su naŋ, sebe sênôm wain wakuc atom. Êsêac sêsôm gebe ‘Wain laŋgwa ŋajam kêlêlêc.’”