1 BƐKPÀÀTÌBƐ̀ TƆ̃MMÚ 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Dɛndɛ kó difɔ̃nkúò kɛ̀ Amɔniibɛ kóo kpɑ̀ɑ̀tì Nɑɑsii kú kòo birɛɛ sɔɔtɛ́ o kpɑ̀tì.

²Kɛ̀ Dɑfiti dɔ̀: M bo dɔɔ̀ Nɑɑsi birɛ Anunni mɛsɑ̀ɑ̀, kɛ yɛ̃́ o cicɛ do n dɔ̀ɔ̀mɛ̀ mɛsɑ̀ɑ̀. Mɛm̀mɛ ò tɔ̃mmɛ̀ bɛnìtìbɛ̀ kɛ̀ bɛ̀ bo ò dɔu nho cicɛ kṹṹ kóò bɑ̀ńtɛ̀. Kɛ̀ bɛtɔ̃mbɛ̀ɛ tuɔkoo Amɔniibɛ ɛì Anunni borɛ̀ kɛ bo ò bɑ̀ńtɛ̀.

³Kɛ̀ Amɔniibɛ kóo kpɑ̀ɑ̀tì tũ̀mbɛ̀ɛ nɑ́kɛ́ Anunni kɛ dɔ̀: A yɛ̀mmɛ̀ dò nDɑfiti dɔ́ kɛ́dɛ́úkùnnɛ ɑ cicɛ yètìrì ndi kɛ tɔ̃nní kɛ̀ bɛ̀ bo dɑ bɑ́ntɑ̀ɑ̀? Ò í bɛ̀ tɔ̃nní kɛ̀ bɛ̀ bo pɑɑtɛ́ dihɛì ndi kɛ́wɛ̃tɛní kɛ́ dì pɔ̀ntɑɑ̀?

⁴Kɛ̀ Anunni duɔ́ nkɛ̀ bɛ̀ɛ pĩ́ nDɑfiti tɔ̃mbɛ̀ kɛ́kuó bɛ dɛɛ̀mbìi kɛ́kékɛ́ bɛ yɑɑ̀bòrɛ̀ kɛ́bennɛ́nɛ̀ bɛ fɔ̃̀ kɛ nɛ́ bɛ̀ bɛ̀ti.

⁵Kɛ̀ ifɛii bɛ̀ ɑutɛ́ mɛdiɛ̀ nkɛ̀ Dɑfitii keè tìì tùɔ̀kɛní o tɔ̃mbɛ̀ kɛ́tɔ̃ mbɛnìtìbɛ̀ kɛ̀ bɛ̀ɛ bɛ̀ co, kɛ́ bɛ̀ nɑ̀kɛ́ kɛ dɔ̀: Dɑfiti yɛ̃ ndi nkpɑɑ́o Sedikoo kɛ kémmúnɛ̀ di dɛɛ̀mbìi bo yɛ̀nnímɛ̀ kɛ̀ dì nɛ́ nɑ kɛ́konní.

⁶Kɛ̀ Amɔniibɛɛ bɑntɛ́ bɛ̀ wɛ̃̀ńtɛ́mɛ̀ Dɑfiti, kɛ̀ Anunni nɛ̀ o kɔbɛ Amɔniibɛ kɛ̀ bɛ̀ɛ yietí mɛdítíbii tɛkɔupípíítɛ̀ (10000) Sidii ɛì kɔbɛ bɛ̀ɛ̀ bo Mɛsopotɑmii, nɛ̀ Mɑɑkɑ kɔbɛ nɛ̀ Tisobɑ kɔbɛ kɛ̀ bɛ̀ bo bɛ̀ duɔnní bɛhɑ̃ɑ̃pɔ̀mbɛ̀ nɛ̀ bɛhɑ̃ɑ̃pɔ̀nsɑ̃ndèèbɛ̀ nɛ̀ sikpɑ̀rìnɑɑsɛ̃ĩ́.

⁷Kɛ̀ bɛ̀ɛ túótɛ́ sikpɑ̀rìnɑɑsɛ̃ĩ́ sikɔupípísìtɑ̃ɑ̃ti nɛ̀ sikɔupísìdɛ́ (32000) nɛ̀ okpɑ̀ɑ̀tì Mɑɑkɑ nɛ̀ o kɔbɛ kɛ̀ bɛ̀ɛ kɔtɛní kɛ́bɑ́tɛ́ Mɛdebɑɑ ììkɛ̀. Kɛ̀ Amɔniibɛ yɛ̀nní bɛ ɛkɛ̀ kɛ̀ bɛ̀ɛ wɛ̃nnɛ́ kɛ bo do Dɑfiti nɛ̀ o kɔbɛ mudoò.

⁸Kɛ̀ Dɑfiti tì kèè kɛ́duɔ́nko o ɑ̃ɑ̃pɔ̀nkótì Soɑbu nɛ̀ bɛhɑ̃ɑ̃pɔ̀mbɛ̀ bɛmɔu bɛ̀ɛ̀ nɔ mmudoò.

⁹Kɛ̀ Amɔniibɛ yɛ̀nní kɛ́pénnɛ́ kudookɔti dihɛì kó dibòrìnùù kɛ̀ bɛkpɑ̀ɑ̀tìbɛ̀ bɛ̀ɛ̀ do kɔ̀tɛní kɛ bo bɛ̀ tee kɛ̀ bɛmbɛ nhokɛ dikpɑ́ɑ̀ miɛkɛ.

¹⁰Kɛ̀ Soɑbu yɑ̀ ò yóó bootɛmɛ̀ o dootitɔbɛ̀ tipíìtì tìdɛ́tì biɛ nho ììkɛ̀, bɛtɔbɛ̀ o fɔ̃̀nkúò, kɛ́tɑ̃ɑ̃tɛ́ Isidɑyɛɛribɛ ɑ̃ɑ̃pɔ̀mbɛ̀ miɛkɛ bɛ̀ɛ̀ nɔ mmudoò kɛ̀ bɛ̀ɛ wetínnɛ́ Sidii kɔbɛ.

¹¹Kɛ̀ Soɑbuu túótɛ́ bɛhɑ̃ɑ̃pɔ̀mbɛ̀ sɔmbɛ kɛ́duɔ́ nho tebitɛ Abikɑii kɛ̀ wenwe nɛ̀ bɛtɔbɛ̀ kɛ̀ bɛ̀ɛ wetínnɛ́ Amɔniibɛ.

¹²Kòo nɑ́kɛ́ Abikɑii kɛ dɔ̀: Kɑ̀ɑ yɑ̀ kɛ̀ Sidii kɔbɛ bo n nɑ, ɑ́ kɔtɛní kɛ́ n teennɛ̀. Kɛ̀ Amɔniibɛ bɛɛ̀ mɛ ndɔ́ kɛ́ dɑ nɑ, n kɔtoo kɛ́ dɑ teennɛ̀.

¹³Yɑ́úkùnnɛ ɑ kɔ̃̀ntì kɛ̀ tí dokɛ́nɛ̀ dikɔ̃m̀bùɔ̀ kɛ́dɛɛtɛ́ ti nìtìbɛ̀ nɛ̀ ti Yiɛ̀ nKuyie nti tũ nkù kó yɛhɛkɛ̀. Kùu dɔɔ̀ kù dɔ́mɛ̀.

¹⁴Soɑbu nɛ̀ o kó dihɑ̃ɑ̃pɔ̀ntĩ̀nnì kɛ̀ bɛ̀ɛ kétɛ́ kɛ bo dokɛ́nɛ̀ Sidii kó bɛhɑ̃ɑ̃pɔ̀mbɛ̀ kɛ̀ bɛ̀ɛ cokɛ́.

¹⁵Amɔniibɛ yɑ̀ dìì mɔ̀nnì Sidii kɔbɛ cokɛ́mɛ̀, kɛ́cokɛ́ Soɑbu tebitɛ Abikɑii kɛ́kò mbɛ ɛì. Kɛ̀ Soɑbuu kò nSedisɑdɛmmu.

¹⁶Kɛ̀ Sidii kɔbɛɛ yɑ̀ Isidɑyɛɛribɛ bɛ̀ nɑmɛ̀, kɛ́tɔ̃ nkɛ̀ bɛ̀ɛ íinní bɛ kɔbɛ bɛ̀ɛ̀ bo kukó nhEfɑdɑti kó diyɑ́ɑ̀. Kɛ̀ Adɑdesɛɛ kóo ɑ̃ɑ̃pɔ̀nkótì Sofɑki mbɛ̀ ni.

¹⁷Kɛ̀ bɛ̀ɛ ti nɑ̀kɛ́ Dɑfiti kòò tìí nyIsidɑyɛɛribɛ bɛmɔu kɛ́séntɛ́ Suditɛ̃ɛ̃ kɛ́tuɔkɛ kɛ́cómmú kɛ́ bɛ̀ wetínnɛ́ kɛ́ bɛ̀ do mudoò.

¹⁸Dɑfiti nɛ̀ o kó bɛhɑ̃ɑ̃pɔ̀mbɛ̀ kɛ̀ bɛ̀ɛ bɛ̀ nɑ kɛ̀ bɛ̀ɛ cokɛ́ kɛ̀ Dɑfiti nɛ̀ o kɔbɛ kɛ̀ bɛ̀ɛ kuɔ bɛ̀ɛ̀ dèkɛ sikpɑ̀rìnɑɑsɛ̃ĩ́ sikɔupísìyiekɛ̀ (7000) nɛ̀ bɛ̀ɛ̀ cèntì sinɑɑ̀cɛ̀i sikɔupípísìnɑ̀ɑ̀ (40000) kɛ́kuɔnɛ̀ ohɑ̃ɑ̃pɔ̀nkótì Sofɑki wèè do bɛ̀ ni.

¹⁹Kɛ̀ bɛkpɑ̀ɑ̀tìbɛ̀ bɛ̀ɛ̀ do teénnɛ̀ Adɑdesɛɛ kɛ̀ bɛ̀ɛ yɑ̀ Isidɑyɛɛribɛ bɛ̀ nɑmɛ̀ kɛ̀ bɛ̀ɛ yie Dɑfiti kpɛti kɛ́mpĩ́ nho tɔ̃mmú bɑ́ Sidii kɔbɛ tɛ̃́nkɛ í nyie nkɛ teennɛ̀ mudoò Amɔniibɛ.