Text copied!
CopyCompare
Kâte Bible - Binaŋ Qâhâc I

Binaŋ Qâhâc I 19

Help us?
Click on verse(s) to share them!
1Eme irec faicnao Amoŋ ŋicwofuŋ Nahasi e hâmome ŋokâ‐ticnezi tucticne qarâ ŋicwofuŋ juwec.
2Juhame Dawidizi muwec, “Mamac‐ticnezi ehâmo‐narewecte no Nahasi ŋokâ‐ticne Hanuŋ ehâmocnezepac.” Iŋuc murâ mamac‐ticne hâmowec irec mu bâmiriŋ ecneniŋte Hanuŋtao kiŋaŋ sorec‐jopawec. Sorec‐jopame Dawidire kiŋaŋŋicfâc jaŋe Hanuŋ mu bâmiriŋ ecneniŋte raku Amoŋŋic jaŋerao fisimbiŋ.
3Fisipie Amoŋŋic fekicne jaŋe Hanuŋ ʒiŋuc âzâcnembiŋ: “Dawidi e mamacgere maname feha bâmiriŋguniŋte ŋic ʒi sorec‐jopajec me? Go manatec iŋuc mi ezejec. Dawidi e kiŋaŋŋic jaŋe mâreŋ ʒi hone tâcneku imackeniŋte râec‐jopajec.”
4Iŋuc mupie Hanuŋ e Dawidire kiŋaŋŋic rocjoparâ mecʒâwâ‐jeŋic hejarewec. Erâ ŋaqi qoruc‐jeŋic hoqaŋeŋ‐jeŋickoa bâtâcne‐jare‐fârerâ râec‐jopame rambiŋ.
5Eme jaŋe mâretec mimiembiŋ; ehame Dawidizi biŋe manarâ kiŋaŋ sorec‐jopawec. Ehuc ʒiŋuc muwec: “Ŋoŋe Jeriko haeoa juhapie mecʒâwâ‐ŋeŋic wefume sâcne risienʒepieŋ.”
6Eme Amoŋŋic jaŋe Dawidi mâsi repicne ecnembiŋ i ʒâŋitarâ Hanuŋ â ŋicfâcne jaŋe Mesopotamia Aram‐Maka â Zoba mâreŋkonec keretac â becâsicko rara ŋic rocjopaniŋte siliwa ŋemâc‐ticne 1 tauseŋ râepie rawec.
7Eme keretac 32 tauseŋ rombiŋ. Ehame Maka ŋicwofuŋ e momorifâcne jaŋehec fisirâ Medeba maickehuc teuŋ âtembiŋ. Eme Amoŋŋic jaŋe ʒawierâ hae‐jeŋic ŋerawec irecnec ʒikao fisimbiŋ.
8Eme Dawidizi biŋe manarâ Joabe â momori ŋic tâpirihec sasawa sorec‐jopawec.
9Ehame Amoŋŋic jaŋe fisirâ hae motâcko ʒikare birickembiŋ. Â ŋicwofuŋ fisimbiŋ jaŋe ine jaŋackoaŋ mâreŋ taniŋnao birickembiŋ.
10Eme Joabe e ʒikazi orâŋ bârâŋ ecnehuc fisiwec i honerâ Israe ŋic bâwosâec‐jopakicne jaŋe bâfâuc‐joparâ gâcne jaŋe Siria ŋic jaŋehec qaqac eniŋte biric‐jopawec.
11Erâ ŋicfâc‐ticne gâcne jaŋe ɋaticne Abisairao râec‐jopame eki Amoŋŋic jaŋehec qaqac eniŋte biric‐jopawec.
12Eme Joabezi muwec, “Siria ŋic jaŋe boc sanaŋkeniŋmuo ine goki baficnuzemec â Amoŋŋic jaŋe boc sanaŋkeniŋmuo ine noni fârâ baficguzepac.
13Nâŋâc hâbihec ehuc ŋicfâc‐nâŋec jaŋere erâ â Anutu‐nâŋecte hae ŋerakac irec erâ sanaŋkehuc ʒika qanʒepeneŋ. Eme Wofuŋ e jahac manakac sâc ezejec.”
14Iŋuc murâ Joabe â ŋicfâcne e jahacnehec jumbiŋ jaŋe Siria ŋic jaŋehec qaqac ehuc Siria ŋic jaŋe dockerâ wisembiŋ.
15Eme Amoŋŋic jaŋe Siria ŋic jaŋe wisepie honerâ iŋuc jaha Joabe ɋaticne Abisaihec qaqac embiŋ i beherâ wisehuc hae sacmaŋko raʒimbiŋ. Raʒipie Joabe e Jerusalem haeo risiewec.
16Eme Israe ŋic jaŋe Siria ŋic bawahac‐jopambiŋ. Irec Siria ŋic jaŋe kiŋaŋ sorec‐jopapie rarâ Eufrata opâ ocniŋucnao Siria ŋic âgofâc‐jeŋic jumbiŋ jaŋe jowac‐jopapie Hadadezere momori micne Sofakazi bânie‐jareme fisimbiŋ.
17Iŋuc epie Dawidizi biŋe manarâ Israe ŋic rocjopa‐fâreme Jordaŋ opâ fotâcnerâ jaŋerao fisimbiŋ. Ehuc jaŋehec qaqac eniŋte momorifâcne biric‐jopawec. Ehame Siria ŋic jaŋe iŋuc jaha momorifâc‐jeŋic biric‐joparâ Israe ŋic jaŋehec qaqac embiŋ.
18Eku Israe ŋic jaŋere hâwic‐jopame wisembiŋ. Wisepie Dawidizi Siria ŋic keretacko jujune 7 tauseŋ jopawec, â kikezi rara momori 40 tauseŋ jopawec. Ehuc momori jaŋere micne Sofaka e wâc iŋuc jaha qâhâmowec.

19Ehame Israe ŋic jaŋe Hadadezere rurumaŋko jumbiŋ ŋic i jaŋe bawahac‐jopambiŋ. Bawahac‐jopapie Dawidihec wama qaqac erâ ere rurumaŋko jumbiŋ. Siria ŋic jaŋe iŋuc juhuc Amoŋŋic mocwâc bafic‐jopaniŋte mi afeckembiŋ.