ኢብራዌ 1

1

2

3

4

5

6

7

8

9

10

11

12

13

¹ካሴ ፆሳይ፥ ኑ ኣዋታስ ናቤታ ባጋራ ዱማ ዱማ ኦጌን ዳሮ ዎዴ ኦዲስ።

²ሺን ሃ ዉርሴꬃ ዎዲያን ኡባ ኢያ ላቲሲዳ ቃሲ ኣላሚያ ኢያ ባጋራ ሜꬊዳ ባ ናዓ ባጋራ ኑስ ኦዲስ።

³ናዓይ ፆሳ ቦንቹዋ ጶሌꬃኔ ኩሜꬃ ፆሳ ፆሳቴꬃ ኤኪዲ፥ ባ ዎልቃማ ቃላን ሃ ኣላሚያ ካቲሲዲ ኦይኪስ። ኣሳ ኤንታ ናጋራፔ ጌሺዳፔ ጉዬ ኡባፌ ቦላ ፆሳ ኡሻቻ ባጋን ሳሉዋን ኡቲስ።

⁴ኢያው ኢሜቲዳ ሱንꬃይ ኪታንቾታ ሱንꬃፌ ቦላ ጊዴይሳዳ ኢ ኤንታፌ ቦላ።

⁵ሂዛ፥ ፆሳይ ኪታንቾታፔ ኦዴኮ፥ «ኔኒ ታ ናዓ፤ ታ ሃቺ ኔው ኣዋ ጊዳስ» ጊዴ? ዎይኮ ቃሲ ኦዴኮ፥ «ታኒ ኢያው ኣዋ ጊዳና፤ ኢካ ታው ናዓ ጊዳና» ጊዴ?

⁶ቃሲ ፆሳይ ባ ባይራ ናዓ ሃ ኣላሚያ ኪቲሼ፥ «ፆሳ ኪታንቾቲ ኡባይ ኢያው ጎይኖ» ያጊስ።

⁷ፆሳይ ኪታንቾታባ ኦዲሼ፥ «ፆሳይ ባ ኪታንቾታ ጫርኮ፥ ባ ኣይሌታ ታማ ላጮ ኦꬄስ» ያጌስ።

⁸ሺን ባ ናዓባ ኦዲሼ፥ «ፆሳው፥ ኔ ካዎቴꬃይ ሜሪናው ዴዔስ። ኔ ካዎቴꬃ ኔ ፂሎቴꬃን ኣይሳሳ።

⁹ኔኒ ፂሎቴꬂ ዶሳዳሳ፤ ኢታ ኢፃዳሳ። ፆሳይ፥ ኔ ጎዳይ፥ ኔና ኔ ላጌታፔ ኣꬂዲ ዶሪስ፥ ኡፋይሳ ዛይቴ ኔና ቲዪስ» ያጌስ።

¹⁰ፆሳይ ዛሪዲ፥ «ጎዳው፥ ኮይሮ ኔኒ ሳዓ ሜꬋዳሳ፤ ሳሎቲ ኔ ኩሼ ኦሶ።

¹¹ሄሳቲ ኡባይ ꬋያና፤ ሺን ኔኒ ዳና። ኤንቲ ኡባይ ኣፊላዳ ዉራና።

¹²ኔኒ ኤንታ ሳሌናዳ ፃፃና፤ ቃሲ ኤንቲ ኣፊላዳ ላሜታና። ሺን ኔኒ ኡባ ዎዴ ኔና፤ ኔ ላይꬃይካ ዉሬና» ያጌስ።

¹³ሺን ፆሳይ ኪታንቾታፔ ኦዴኮ፥ «ታኒ ኔ ሞርኬታ ኔ ቶሆይ ዬꬊያሶ ኦꬃና ጋካናው፥ ሃይሳን ታፔ ኡሻቻ ባጋን ኡታ» ጊዴ?

¹⁴ኪታንቾቲ ኡባይ ኣቶቴꬂ ዴማናው ዴዒያ ኣሳታ ማዳናው ፆሳይ ኪቲዳ ኣያናታ ጊዶኮናዬ?