1Ngain tiempo are saho, Dios joinchegonda profeta para que Dios nichja tsje nttiha co de tsje manera ngain nindogoelitoa na ẍanc̈hjen.
2Pero jai, ngain nchanho tehe, Dios joinchegonda Xenhe para que jehe nichjá na ján na. Dios joinchechjian cainxin cosa que jí ngain mundo jihi pero de ixin jehe Xenhe, co jehe cointtoehe Xan cainxin cosa jihi para que jehe Xan tsetonha Xan.
3Jehe Xenhe Dios mé tti Xan tjago glorié Ndodé Xan, co jehe Xan jí Xan mero ẍajeho inchin Dios jí, co jehe Xan, Xan jiquehe cainxin cosa de ixin palabré Xan, ixin palabré Xan chonda anto tsje joachaxin. Co are joexin jointtaroa na Xan ján na de cain tti jianha que teca na, jehe Xan sajoiguehe Xan ngain lado jian de tti lugar que retaha Dios nttiha ngajni.
4Mexinxin Xenhe Dios joiguehe Xan icha importante que cain ángel de Dios, ixin Dios chjé jehe Xan de herencia ná cargo icha importante que cargoe cain ángel.
5Ixin Dios ẍonhi tiempo ndac̈ho ngain ni ná ángel janhi: Jaha tti Xanhna; janha chjaha vida jai. Ni ndac̈hoha Dios de ixin ni ná ángel: Janha sarihi Ndodé jehe, co jehe sehe Xanhna janha.
6Pero are Dios rroanha tti nacoa Xenhe, xansaho co icha jian ngataha nontte jihi, jehe ndac̈ho: Cainxin ángel de Dios chonda que sinchesayehe jehe Xan.
7Co de ixin cain ángel de Dios, jehe Dios ndac̈ho: Janha nchao nttacjamanga cain ángel inchin c̈hintto que jitja, co cain ángel que nchehe ẍana janha nchao nttacjamanga inchin neje ẍohi.
8Pero de ixin Xenhe Dios, jehe ndac̈ho janhi: Tti joachaxin que jaha chonda, oh Dios, ẍonhi tiempo tsjexin; co tti jaha ttetonha, ján rrittetonha inchin jiquininxin.
9Jaha cain tiempo rinao cain cosa jian, co ningaconhe cain cosa jianha; mexinxin janha, tti Dios de jaha, coinchiá jaha co ndac̈hjan que jaha icha rrochaha que cain nicompañeroa.
10Co cai ndac̈ho Dios ngain Xenhe: Jaha, tti chonda cain joachaxin, desde are saho jaha tti joinchechjian nontte, co jaha joinchechjian ngajni conixin rá.
11Nontte co ngajni ndatsjexin, pero jaha sarihi para cainxin tiempo. Nontte co ngajni ndatsonttaxí inchin lontto.
12Co jaha tsjadoho nontte co ngajni jian inchin rrocji ná vestido, co jaha tsentoxinhi cayoi cosa jihi inchin chojni ttentoxinhi lonttoe na. Pero jaha cainxin tiempo sarihi ẍajeho, co vidá ẍonhi tiempo tsjexin.
13Co Dios ẍonhi tiempo ndac̈ho ngain ni ná ángel: Jaha darihi lado jian na hasta que janha sinttagacha jaha de ngain cain tti ningaconha.
14Cain ángel jehe espíritu para ngain ẍé Dios, co Dios rroanha ángel mé para tsjenguijna cain tti chojni que sayé iná vida naroaxin.
