Hebreos 1

1

2

3

4

5

6

7

8

9

10

11

12

13

¹Zian lzu len zian ca benëꞌ Dios, bë́ꞌlenëꞌ xuz xtauꞌruꞌ didzaꞌ dza niꞌtë lu rúꞌaquëꞌ bönniꞌ gluꞌë didzaꞌ uláz queëꞌ.

²Naꞌa, ga ruúdx xtidzëꞌë, dza ni zoaruꞌ naꞌa, Dios bë́ꞌlenëꞌ rëꞌu didzaꞌ lu ruꞌë Zxiꞌnczëꞌ. Dios buzóëꞌ Lëꞌ quië gaqui queëꞌ Zxiꞌnëꞌ yúguꞌtë le naqui queëꞌ Lëꞌ, atiꞌ lu nëꞌë Zxiꞌnëꞌ naꞌ, Dios benëꞌ yödzlyú ni.

³Zxiꞌnëꞌ naꞌ naquëꞌ ca tu le rguꞌu yeníꞌ qui yöl‑laꞌ yeníꞌ queëꞌ Dios, len ca naquëꞌ Zxiꞌnëꞌ ruluíꞌ lahui gdu ca naquëꞌ Dioscz. Runczëꞌ ga nacuaꞌtecz yúguꞌtë, rugunëꞌ dxin didzaꞌ ruꞌë len yöl‑laꞌ huac queëꞌ. Catiꞌ budx benëꞌ le ruún rëꞌu dxiꞌa ca nac dul‑laꞌ nabágaꞌruꞌ, yajchöꞌë cuit lëꞌë yubél Dios, Nu röꞌ rna bëꞌ xtsaꞌtër.

⁴Zxiꞌnëꞌ Dios náctërëꞌ blau ca yuguꞌ gbaz laꞌy queëꞌ Dios, le nactër blau le lëꞌ, lë naꞌ Dios gluꞌë Lëꞌ le naquëꞌ Zxiꞌnczëꞌ, ca laquëꞌ gbaz laꞌy queëꞌ naꞌ.

⁵Dios gatga gudxëꞌ tuëꞌ gbaz laꞌy queëꞌ ca naꞌ gudxëꞌ Zxiꞌnëꞌ, gnëꞌ: Zxiꞌnaꞌ nacuꞌ, Buzóaꞌ Liꞌ naꞌa. Gatga bëꞌë didzaꞌ queëꞌ tuëꞌ gbaz laꞌy ca naꞌ bëꞌë didzaꞌ queëꞌ Zxiꞌnëꞌ, gnëꞌ: Gacaꞌ Xuzëꞌ, Atiꞌ Lëꞌ gaquëꞌ Zxiꞌnaꞌ.

⁶Lëzcaꞌ cni, catiꞌ Dios buzóëꞌ Biꞌi queëczëꞌ lu yödzlyú ni, gnëꞌ: Laꞌyíj ládxiꞌquëꞌ Lëꞌ yúguꞌtë gbaz laꞌy queëꞌ Dios.

⁷Ca nacquëꞌ gbaz laꞌy queëꞌ, rna: Lëꞌ runëꞌ ga nacquëꞌ ca böꞌ reycj gbaz laꞌy queëꞌ, Atiꞌ gbaz laꞌy tunquëꞌ xchinëꞌ, runëꞌ ga nacquëꞌ ca guiꞌ.

⁸Naꞌa, ca nacczëꞌ Zxiꞌnëꞌ, rnëꞌ: Ga röꞌu rna bëꞌu, gna bë́ꞌteczuꞌ, Dios. Tsahuiꞌ nac ca rna bëꞌu.

⁹Nadxiꞌinuꞌ le nac tsahuiꞌ, len clëg le cunác. Qui lë ni naꞌ Dios budödëꞌ lu naꞌu yöl‑laꞌ uná bëꞌ, Len benëꞌ ga ruzíꞌtëruꞌ Liꞌ xbey yöl‑laꞌ uná bëꞌ Ca le tuꞌzíꞌ xbey lzaꞌu.

¹⁰Lëzcaꞌ cni rnëꞌ: Liꞌ, Xan, catiꞌ gzu lau, benuꞌ yödzlyú, Len lu naꞌzuꞌ buzúꞌ luzxbá.

¹¹Huadö́d quegac, san Liꞌ, tsaz gdiꞌu. Yúguꞌtë gtëbgac ca rtëb lariꞌ,

¹²Len ca lariꞌ utubcuꞌ lei, len utsaꞌcuꞌ lei, San Liꞌ, gatga utsáꞌ cuinuꞌ Len gatga gguluꞌ.

¹³Dios gatga gudxëꞌ tuëꞌ gbaz laꞌy queëꞌ ca gudxëꞌ Zxiꞌnëꞌ, gnëꞌ: Gröꞌ cuit lëꞌa yubél Catiꞌ gunraꞌ ga luzechu zxibgac lauꞌ Nup cutaꞌleꞌi Liꞌ dxiꞌa.

¹⁴Yúguꞌtë gbaz laꞌy queëꞌ Dios nacquëꞌ böꞌ huen dxin queëꞌ Dios, nasölëꞌë lequëꞌ láclenëꞌ nup ni nulagac.